“İş də gedir, həyat da”

İsmayıl İbrahimov: «Məndən sonra indiki akademiklərdən 90 yaşında olanları yoxdur»

“Bu il dekabrın 31-də 95 yaşım tamam olacaq. 95 yaş mənim üçün möcüzədir. Məndən sonra indiki akademiklərdən 90 yaşında olanları yoxdur. Bizim akademiklərdən Ulyanişev 96 yaşında, Qambay Əlizadə 95 yaşında dünyasını dəyişib. Üçüncüsü mənəm”. Görkəmli ictimai-siyasi xadim, Dövlət mükafatı laureatı, Sosialist Əməyi Qəhrəmanı, Respublika Uşaq Fondunun sədri, akademik İsmayıl İbrahimov bu sözləri mənə bu ilin yanvar ayında evində qonaq olub ondan müsahibə götürərkən söyləyib. Budur, hörmətli akademik 95 yaşını qeyd edir.

“Mənim həyatım çox gərgin başlayıb” deyən İsmayıl müəllimin həyat yolu doğrudan da keşməkeşli və şərəfli olub. Söhbət düşəndə yaşanan illərini nağıl kimi xatırlayır. Amma bu nağılda hər şey həqiqətdir: “Demək olar ki, 60 yaşıma çatandan sonra müstəqil yaşamağa başlamışıq. 1947-ci ildə Məryəm xanımla ailə qurmuşuq. Onunla ailə qurandan sonra 60-cı ilə qədər həyatımız çox gərgin keçib. 2 yaşımda atamı itirmişəm. Savadsız qadın olan anam iki uşaqla tək qalıb. Qardaşım məndən 10 yaş böyük idi. O işləyib ailəmizə kömək edirdi. Sonra qardaşım Bakıya təhsil almağa getdi və bizi də öz yanına gətirdi. Tələbə qardaşımın himayəsində yaşadıq”.

Sonra İ.İbrahimov Sənaye Texnikumuna daxil olub. Texnikumu bitirdikdən sonra Azərbaycan Sənaye İnstitutuna, indiki Neft Akademiyasına göndərilib. 1941-ci ildə institutu qurtarıb mühəndis işləyib. Bir aydan sonra isə müharibə başlayıb. Könüllü hərbi xidmətə yollanıb. 3 ay Leninqradda oxuyandan sonra kiçik leytenant rütbəsi ilə cəbhəyə göndərilib. Müharibənin odu-alovu keçib ömründən. İndi də “o illər həyatımın qızıl səhifələridir” deyir: “Cəbhədə mənim üçün ağır olsa da, şanlı günlər yarandı. İlyarımlıq bir müddət ərzində taqım komandiri vəzifəsindən əlahiddə hissə-rabitə batalyonunun komandiri vəzifəsinə yüksəldim. Zabit kimi fəaliyyətimi təltif etdilər. Həm cəbhədə döyüşmüşəm, həm də işləmişəm. Müharibənin ağırlığını hamı kimi mən də hiss etmişəm. Bu, təbii çətinlik idi”.

Müharibədən qayıdandan sonra ona çoxlu vəzifələr təklif etsələr də, heç birini qəbul etməyib. Azərbaycan Sənaye İnstitutunda baş laborant vəzifəsində işləməyə başlayıb. Daha sonra assistent, baş müəllim, dosent, professor - bu pillələrin hamısını keçərək kafedra müdiri vəzifəsinə yüksəlib.

Neftçıxarma və neft emalı, neft-kimya və kimya sənayesində, energetikada ölçmə, nəzarət və avtomatlaşdırma elmi axtarış sahələrində uğurlara imza atıb. 1960-cı ildə isə institutun rektoru təyin edilib. Bu vəzifədə 10 il işləyəndən sonra Heydər Əliyevin dəvəti ilə Respublika Nazirlər Sovetinin sədr müavini vəzifəsinə təyin edilib. 8 il bu vəzifədə işlədikdən sonra öz xahişi ilə yenidən instituta qayıdıb. 1978-ci ildə təzədən institutun rektoru təyin edilib. Bu vəzifədə yenidən 10 il işləyib. 70 yaşında ittifaq respublikaları arasında Sosialist Əməyi Qəhrəmanı fəxri adına layiq görülən 7 rektordan biri kimi adı elm tarixinə yazılıb. İ.İbrahimov 73 yaşında rektorluqla vidalaşıb. Ümummilli lider Heydər Əliyevin göstərişi ilə Uşaq Fonduna sədr təyin olunub. Elə o vaxtdan Uşaq Fondunda işləyir.

İsmayıl müəllim bu gün də iş başındadır. Bir guşəyə çəkilməyi, rahat həyatı sevmədiyini deyir. İnsanlarla ünsiyyətdə olmağı, gözəl işlər görməyi daha üstün tutur: “İndi həyatıma nəzər salanda görürəm ki, 95 yaşımda təminatlı həyat yaşayıram. Akademiyanın həqiqi üzvü, Prezidentin fərdi təqaüdçüsüyəm. Dövlət təqaüdü alıram. İnsani nöqteyi-nəzərdən yanaşsam, evdə otura bilərəm. Amma mən evdə oturmuram. İnformatika Problemləri İnstitutunda və Kibernetika İnstitutunda elmi məsləhətçi işləyirəm. Hər iki institutdan əmək haqqı alıram. 22 ildir ki, Respublika Uşaq Fondunun ictimai əsaslar üzrə sədriyəm. Oradan əmək haqqı almıram. Hər ay Fonda 200-300 manat pul xərcləyirəm. Ona görə 95 yaşımı çox razılıqla hiss edirəm. Bu da cəmiyyətin mənə olan diqqətidir. Məhz bu diqqətin nəticəsidir ki, bu yaşda asudə olaraq yaşayır, ailəmi saxlayıram. İki oğlum elmlər doktoru, qızım fəlsəfə doktorudur. Böyük oğlum Aydın Türkiyədə, kiçik oğlum Akif isə Amerikada professor kimi çalışır. Qızım Ləman fəlsəfə doktorudur. 5 nəvəm, 4 nəticəm var. İş də gedir, həyat da”.

Təranə Məhərrəmova

Kaspi.- 2010.- 31 dekabr.- S. 8.