Yaşar Nuri "Muskomediya"da

Akademik Milli Dram Teatrın aktyoru, Xalq artisti Yaşar Nuri Musiqili Komediya Teatrının dəvətini cavabsız qoymayaraq yenicə məşqləri başlanan "Ər və arvad" tamaşasında oynamağa razılıq verib.

Ona Üzeyir Hacıbəylinin bu məşhur komediyasında Kərbəlayi Qubad rolu həvalə olunub. Teatrın baş rejissoru Yusif Əkbərovun quruluşunda hazırlanan operettada tamaşaçıların çox sevdikləri Xalq artistləri Afaq Bəşirqızı, İlham Əhmədov, Arif Quliyev, Fatma Mahmudova, Əməkdar artistlər Elçin Həmidov, Əkbər Əlizadə, aktyorlardan Ülviyyə Əliyeva, Ema Məlikova da çıxış edəcəklər.

Teatrin mətbuat xidmətindən verilən məlumatda bildirilir ki, teatrın 100 illik yubileyi münasibətilə səhnəyə qoyulan bu əsərə şöhrətli artistlərin cəlb olunması heç də təsadüfi deyil. Çünki 1910-cu ildə may ayının 24-də bu əsərlə Musiqili Komediya Teatrının əsası qoyulub. İlk tamaşada Mirzağa Əliyev, Hüseynqulu Sarabski, Əhməd Ağdamski kimi böyük sənətkarlar çıxış ediblər. Diriyor pultu arxasında dahi Üzeyir bəy özü dayanıb. Sonralar "Ər və arvad" komediyası 1911-ci , 1913-cü, daha sonralar isə 1939-cu illərdə tamaşaçılarla görüşə gəlib. 1942-ci ildə isə görkəmli rejissor, Xalq artisti Şəmsi Bədəlbəylinin quruluşunda bu əsər Musiqili Komediya Teatrında maraqlı səhnə həyatı yaşayıb.

Məlumatda bildirilir ki, Musiqili Komediya Teatrı bir əsrlik yubileyinə ciddi hazırlaşır. Teatrın tarixi isə bu əsərlə başlayır. Deməli, 100 ildən sonra bu əsəri yenidən səhnəyə gətirmək də sevindirici bir hadisədir. Yaşar Nuri bildirib ki, Musiqili Komediya Teatrı ona çox doğma olan kollektivdir. "Şadam ki, bu tarixi sənət dostlarım Afaq Bəşirqızı, İlham Namiq Kamal, Arif Quliyev kimi sənətkarlarla birlikdə gerçəkləşdirəcəyik. Atam bu teatrın sevilən aktyorlarından olub. Hər dəfə bu teatra gələndə elə bilirəm ki, öz doğma evimə gəlirəm. Çünki burada mənə doğma olan çoxlu xatirəm var. Kərbəlayi Qubad roluna dəvət olunmağım ürəyimdəndir. Mən eyni zamanda, son vaxtlar ölkənin tanınmış bəstəkar, diriyor, rejissor və aktyorlarının, rəssamların "Muskomediya"da hazırlanan tamaşalara cəlb olunmasını alqışlayıram. Çünki bizim ümumilikdə bir teatrımız var - Azərbaycan teatrı və biz böyük sevgi ilə bu teatra xidmət edirik".

Qeyd edək ki, əsərin musiqi redaktoru Əməkdar incəsənət xadimi, Üzeyir Hacıbəylinin ev muzeyinin direktoru, bəstəkar Sərdar Fərəcovdur. Tamaşanın quruluşçu diriyoru Əməkdar incəsənət xadimi Nazim Hacıəlibəyov, bədii tərtibatçısı Əməkdar rəssam Eldar Qurbanov, quruluşçu xormeyster Vaqif Məstanov, quruluşçu baletmeysterlər isə Zakir Ağayev və Yelena Ağayevadır.

Təranə

Kaspi. -2010. – 5 fevral. – S.15.