Alim və Fərqanə Qasımovlar İstanbul tamaşaçılarını heyran etdilər

Dünya şöhrətli muğam ifaçısı, xalq artisti Alim Qasımov və qızı Fərqanə Qasımova İstanbulda keçirilən beynəlxalq konsertdə çıxış ediblər

Artıq vətənə dönən Alim Qasımovun Lent.az-a verdiyi məlumata görə, konsert İstanbulun Yerebatan Sarıncı konsert salonunda baş tutub:

“Bura yeraltı məkandır. Bizans imperiyası dövründən qalıb. Çox gözəl yerdir. Konsertimiz də elə burada baş tutdu. Böyük maraqla qarşılandıq. Tamaşaçılar musiqimizə, ifamıza heyran qaldılar. Bir neçə kanala müsahibə verdik, çəkilişlər oldu. Bir sözlə, səfərdən məmnun qaldıq”.

Konsertdə xanəndələri Rauf İslamov, Rafael Əsgərov, Cavidan Nəbiyev və Zəki Vəliyev müşayiət edib. 90 dəqiqəlik konsert proqramı ərzində “Mahur” dəsgahı və “Bayatı-Şiraz” təsnifi ifa olunub.

Muğam ifaçıları bir neçə yeni təklif də alıb. Belə ki, Qasımovlar Ramazanda və dekabrda da İstanbul və Ankarada yenidən türkiyəli tamaşaçıların qarşısına çıxacaqlar.

Xəyalə

Kaspi. – 2010. – 10 iyun. – S.16.