Bakı və ölkə məktəblərində 62 müəllim yeri boş qaldı

226 müəllim isə ümumtəhsil məktəblərindəki vakant yerlərə işə qəbul olundu

"Ölkəmizdə ilk dəfə olaraq 2010-2011 -ci dərs ilində ümumtəhsil məktəblərindəki vakant yerlərə müəllimlərin işə qəbulu elektron vasitələr əsasında iki mərhələli müsabiqə mexanizmi tətbiq olunmaqla həyata keçirilib. Avqustun 20-dən bu barədə mətbuatda və Təhsil Nazirliyinin rəsmi saytında elanın yerləşdirilməsi ilə başlayan və təxminən bir ay davam edən müsabiqə proseduru artıq başa çatıb, müsabiqədə qalib gələn müəllimlər öz yeni iş yerlərində fəaliyyətə başlayıblar". Bu barədə SİA-ya açıqlamasında Təhsil Nazirliyinin Strateji təhlil, planlaşdırma və kadrların idarə olunması şöbəsinin müdiri Fərzəli Qədirov məlumat verib. O bildirib ki, 2010-2011-ci tədris ili üçün ölkənin ümumtəhsil məktəblərində 198-i Bakı, 90-ı isə 11 şəhər və rayonda olmaqla 288 vakant müəllim yeri olub.

Şöbə müdirinin sözlərinə görə, namizədlərin vakant yerlərlə tanışlığına və elektron ərizələrinin doldurulmasına avqustun 20-dən başlanıb və bu proses avqustun 27-dək davam edib. Ümumilikdə 3171 nəfərin elektron ərizə verdiyini deyən F.Qədriov vurğulayıb ki, onlardan yalnız 1815 nəfərin ərizəsi təsdiqlənib. O qeyd edib ki, ərizələri təsdiq olunan 1815 nəfər 288 vakant yerə qarşı müsabiqəyə qatılıblar.

"Müsabiqə reqlamentə uyğun olaraq iki formada – müsahibə və test imtahanı formalarında həyata keçirilib. Fiziki tərbiyə, gənclərin çağırışaqədərki hazırlığı, əmək hazırlığı, rəsmxət, təsviri incəsənət, musiqi və nəğmə fənlərindən müəllimlərin vakant yerlərə işə qəbulu nazirliyin müsabiqə komissiyası tərəfindən müsahibə yolu ilə aparılıb. Digər fənlərdən, yəni dil və ədəbiyyat, riyaziyyat, informatika, fizika, kimya, biologiya, tarix, coğrafiya, xarici dil (ingilis, fransız, alman dilləri), həmçinin ibtidai sinif müəllimi ixtisası üzrə vakant yerlərə müsabiqə test imtahanı yolu ilə keçirilib. Beləliklə, aparılmış müsabiqə nəticəsində 288 vakant yerə qarşı 226 nəfər işə qəbul olunub, 62 yer vakant qalıb. Buna səbəb həmin yerləri seçənlərin az bal toplaması, eyni zamanda, vakant yerlərin olduğu məktəblərin uzaqlığı üzündən onları seçənlərin az olmasıdır. Həmin vakant yerlərə növbəti mərhələdə işə qəbulun həyata keçirilməsi nəzərdə tutulur", - deyə o əlavə edib.

Təhsil Nazirliyinin şöbə müdiri bildirib ki, 288 vakant yerə qarşı ərizəsi təsdiqlənən 1815 iddiaçı iştirak etdiyindən işə qəbul prosesində yüksək müsabiqə vəziyyəti qeydə alınıb. Ümumilikdə orta hesabla bir boş yer uğrunda, təxminən 6 iddiaçının mübarizə apardığını deyən F.Qədirov bəzi fənlər üzrə isə daha yüksək müsabiqə vəziyyətinin yarandığını söyləyib: "Belə ki, ibtidai sinif müəllimi ixtisası üzrə 10-u Bakının, 10-u isə ölkənin digər şəhər və rayonlarının ümumtəhsil məktəblərində olmaqla cəmi 20 vakant yer olduğu halda, 361 nəfər müsabiqədə iştirak edib. İngilis dilindən 28 vakant yerə qarşı 340 nəfər, dil və ədəbiyyatdan 12 vakant yerə qarşı 266 nəfər, riyaziyyat fənni üzrə 16 vakant yerə qarşı 201 nəfər mübarizə aparıb".

F.Qədirov qeyd edib ki, vakant yerlərə seçim insan amilinin iştirakı olmadan, müvafiq proqram tərəfindən imtahan verənlərdən hər birinin topladığı ballara və etdiyi seçimə uyğun aparılıb. Onun sözlərinə görə, ölkənin ümumi təhsil müəssisələrini daha keyfiyyətli kadrlarla təmin etmək üçün gələcəkdə tədris ili ərzində 2 dəfə (tədris ilinin əvvəlində və I yarımilin sonunda) işə qəbulun aparılması nəzərdə tutulub.

Kaspi.- 2010.- 6 oktyabr.- S. 9.