"Sonuncu romantik" Bakıda tanınmış rus şairi Andrey Dementyevin yaradıcılıq gecəsi keçirildi

Tanınmış rus şairi, SSRİ dövlət mükafatı laureatı Andrey Dementyev Bakıdadır. Müslüm Maqomayev adına Azərbaycan Dövlət Filarmoniyasında şairin yaradıcılıq gecəsi keçirildi. Gecəni açıq elan edən Bakı Musiqi Akademiyasının rektoru, xalq artisti, professor Fərhad Bədəlbəyli Dementeyvin poeziyasından danışdı: "İstərdim onun həyatının bir neçə istiqamətini qeyd edim. Valideynə sevgi, müəllimlərinə sevgi. Bütün bunlar onun poeziyasından qırmızı xəttlə keçir. Və təbii ki, qadına sevgi. Çünki sevgi və şair iki ayrılmaz bir amildir".

Azərbaycan ədəbiyyatı ilə yaxından tanış olan Andrey Dementyev Nizami Gəncəviyə şeir də həsr edib. Filarmoniyanın səhnəsində qurulan monitorda həmin şeir səsləndi.

Mədəniyyət və Turizm Nazirliyinin dəstəyi ilə reallaşan tədbir "Sonuncu romantik" adlanırdı. Eyni adlı mahnını da vokalçı Rizvan Sədirxanov ifa etdi.

Tədbir boyu Andrey Dementyevin şeirlərinə bəstələnmiş mahnılar ifa olundu.

Kaspi.- 2010.- 9-11 oktyabr.- S.14.