Havada caz ətri var

Paytaxtımız növbəti festival əhval-ruhiyyəsi yaşayır. Bakı Beynəlxalq caz festivalının artıq ənənəyə çevrilməsi cazsevərlərin böyük sevincinə səbəb olub. Belə ki, oktyabrın 16-da Heydər Əliyev Sarayında keçirilən II Beynəlxalq caz festivalının təntənəli açılış mərasimi əsl musiqi hadisəsinə çevrilib. Mədəniyyət və Turizm Nazirliyi, Azərbaycan Mədəniyyət Fondu və “Sweet Production”ın təşkil etdiyi festivalın açılışı tamaşaçılara əsl bayram əhval ruhiyyəsi bəxş edib.

Sarayın foyesində festivalda çıxış edən caz kollektivlərinin fotoşəkillərindən ibarət sərgi maraqla qarşılanıb.

Mərasimdə çıxış edən mədəniyyət və turizm naziri Əbülfəs Qarayev bildirib ki, son illər Azərbaycanda caz musiqisinin təbliği, inkişafı baxımından çox iş görülüb. Nazir ölkəmizdə musiqinin caz janrına önəm verildiyini və Bakının keçmiş SSRİ zamanında caz paytaxtı adlandırıldığını söyləyib.

“Bunun bariz nümunəsi olaraq 7-ci ildir Bakıda caz festivalı keçirilir. Dünyanın ən tanınmış cazmenləri Bakıda konsert proqramları ilə çıxış etmişlər. Bu gün də paytaxtımız ənənəsinə sadiq qalaraq belə möhtəşəm bir tədbirə ev sahibliyi edir. Azərbaycan cazının bünövrəsi ötən əsrin 30-cu illərinin sonunda böyük musiqi xiridarları Niyazinin və Tofiq Quliyevin yaratdıqları “Dövlət cazı” adı ilə tanınan Dövlət estrada orkestri tərəfindən qoyulub. Orkestrin ilk konsert proqramına klassik caz musiqisi nümunələri ilə bərabər Niyazinin və Tofiq Quliyevin pyesləri də daxil edilib. 1941-1945-ci illər müharibəsi dövründə və müharibə qurtardıqdan sonra “Dövlət cazı”na bəstəkar Rauf Hacıyev rəhbərlik edib. Amma 1950-1960-cı illərdə SSRİ-nin Qərb əleyhinə yönəlmiş təbliğat maşını ölkədə bu musiqi janrının inkişafına güclü ziyan vurub. 1960-cı illərdə Qara Qarayev, Niyazi, Tofiq Quliyev və Rauf Hacıyevin dəstəyi və rəhbərliyi ilə Azərbaycanda estrada və caz musiqisinin ikinci həyatı başlayıb. Rafiq Babayevin “Qaya” vokal kvarteti yaranıb və nəhayət, Vaqif Mustafazadə dövrü başlanıb”.

Əbülfəs Qarayev xüsusi olaraq vurğulayıb ki, prezident İlham Əliyevin müvafiq Sərəncamı ilə dünya şöhrətli caz ustası Vaqif Mustafazadənin 70 illik yubileyinin geniş şəkildə qeyd edilməsi ölkəmizdə musiqiyə və əsl sənətə verilən qiymət və qayğının bariz nümunəsinin göstəricisidir. Nazir qeyd edib ki, bu il festivalda iştirak etmək üçün müxtəlif ölkələrdən 80-ə yaxın musiqiçi Azərbaycana gəlib.

Qeyd edək ki, dünyanın ən böyük caz musiqisi bayramlarından birinə çevrilən II Beynəlxalq caz festivalında Azərbaycanın və müxtəlif xarici ölkələrin ən məşhur caz ifaçıları çıxış edəcəklər. İştirakçılar arasında Mat Bianko, Al di Miola, Keiko Matsui, Monti Aleksandr, Vijay İyer Trio, Erik Vloeimaens, Diane Rives kimi məşhur ifaçılar, “Jazzamor” və “Şakatak” kimi tanınmış caz qrupları vardır.

Açılış mərasimində çixiş edən Əməkdar artist Həsən Abasquliyevin rəhbərliyi ilə “Arena” caz orkestrinin konserti maraqla dinlənilib. Orkestrin məharətlə ifa etdiyi caz improvizasiyaları alqışlarla qarşılanıb. İsrailli Amikam Kimelmanın dirijorluq etdiyi orkestrin ifasında dünya caz bəstəkarlarının məşhur kompozisiyaları da səslənib.

Festivalın 2-ci günü – oktyabrın 17-də Heydər Əliyev Sarayında növbəti konsert keçirilib. Belə ki, ingilis pop cazının liderlərindən olan “Matt Bianko” caz ansamblının virtuoz ifası cazsevərləri əyləndirib. Qrupun ifasında Avropada ən hit sayılan kompozisiyalar səsləndirilib. Qeyd edək ki, bu konsert “Matt Bianco”nun Azərbaycanda ilk çıxışıdır. 1982-ci ildə keçmiş “Blue Rondo A La Turk” ansamblının üzvlərindən təşkil edilmiş “Matt Bianco” caz qrupu hazırda ingilis pop-cazının liderlərindən biri kimi dünyada məşhurdur. Kollektiv dünyanın bir çox ölkələrində uğurlu çıxışları ilə yadda qalıb. “Matt Bianko” caz ansamblının tərkibində bir neçə dəfə ciddi şəkildə dəyişiklik olub. Onlar dens-pop üslubunda ifa edirlər. Bu ifa isə qrupun Kuba rəqs ritmləri ilə ifa etdiyi caz aranjemanları ilə əlaqələndirilir.

Qeyd edək ki, festival çərçivəsində paytaxtın musiqi salonlarında caz axşamları keçiriləcək. Təşkilatçıların qeyd etdiyi kimi – havadakı caz ətri hələ oktyabrın 30-a kimi duyulacaq.

Təranə Məhərrəmova

Kaspi.- 2010.- 19 oktyabr.- S. 16.