Dəbə çevrilən yarışma

Bu ilin oktyabr ayında Azərbaycanda “Best Model of Azerbaijan-2010” müsabiqəsi keçiriləcək

“Best model of Azerbaijan 2010” müsabiqəsinin rəhbərləri Validə Abbasova və stilist Anar Ağakişiyev model müsabiqəsinin keçiriləcək məkanını və dəqiq vaxtını müəyyənləşdirərək yarışmanın 22 oktyabr tarixdə, “HEZZ Club Restaurant”da baş tutacağını bildiriblər.

Artıq müsabiqə ilə bağlı seçim turu da başa çatıb. Belə ki, müsabiqənin münsiflər heyəti, eləcə də “Fashion model school” model agentliyinin rəhbəri Lyubov Qutorovanın iştirakı ilə qız və oğlanlardan ibarət modellər qapalı şəraitdə seçilib. 60-dan artıq modelin qatıldığı seçimlərdə 10 qız və 10 oğlan “Best model of Azerbaijan-2010” müsabiqəsində iştirak etmək hüququ qazanıb. Son mərhələdə bu modellərdən 2-si (biri oğlan, biri qız) Azərbaycanı “Best model of the world-2010” yarışmasında təmsil etmək hüququ əldə edəcək. Onlar qələbə uğrunda 90 ölkənin modelləri ilə mübarizə aparacaqlar. Qeyd edək ki, Azərbaycan 10 illik təcrübəsi dövründə bu model müsabiqəsində iki dəfə birincilik, bir dəfə isə üçüncülük qazanıb.

Təşkilatçılar bildiriblər ki, builki milli seçimlərdə əsas fərq ondan ibarətdir ki, seçilən 20 modeli “Best model of Azerbaijan-2010”un final konsertinə kimi heç kim görməyəcək. Finalçılar yalnız finalda ictimaiyyət qarşısına çıxacaqlar.

Arxa plandan ön plana

Qeyd edim ki, ölkəmizdə bu tip yarışmaların – gözəllik və ya model müsabiqələrinin keçirilməsi artıq dəbə çevrilib. Müsabiqənin hər il keçirilməsi baş tutmasa da, hər halda iki və ya üç ildən bir təşkil olunur. “Best Model of Azerbaijan” yarışmasının ilk təşkilatçısı tanınmış türk iş adamı Nahit Kabakçı olub. O, uzun illər Azərbaycanda çalışıb və burada da vəfat edib. İş adamı ilk yarışmanı 2001-ci ildə «Bakı-Tbilisi-Ceyhan» neft kəmərinə həsr edib. Sonrakı illərdə isə müsahibələrinin birində: “Azərbaycanda münsiflərin hər hansı bir təsirə məruz qalmadığı, iştirakçılara həqiqi qiymət verən yeganə yarışma «Best Model» dir. Azərbaycanda keçirilən bəzi başqa yarışlarda pul həmişə ön plana çıxır, yaxud arxa plandan ön plana təsir göstərir”- deyə bildirib. «Best Model»in Azərbaycan üzrə koordinatoru Nəzakət Hacıyeva deyib ki, Azərbaycanda 2001-ci ildən başlayan bu yarışmada arada qısa fasilələr olsa da yarışın hansı illərdə təşkil edilməsindən asılı olmayaraq yüksək səviyyədə keçib”.

Sözügedən yarışma 2006-cı ildə Xalq artisti Aygün Kazımovanın prezidentliyi ilə təşkil edilib. 2008-ci ildə isə yarışmaya müğənni Ruhi və Erkan Özərman rəhbərlik ediblər. Ruhi növbəti ildə yarımaya rəhbərlik etməkdən imtina edib. “Bu müsabiqəni keçirmək çox məsuliyyətli və çətindir. Baxmayaraq ki, müsabiqə üçün mən can qoydum, bütün gücümü sərf etdim, amma işimdən 100% razı qalmadım. İstədiyimin 70%-i əldə edə bildim. Məncə, heç bir işdə tam razı qalmaq mümkün deyil. Bundan sonra müsabiqəni təşkil etmək istəyənlərə, sadəcə uğurlar arzulayıram və əlimdən gələn köməyi etməyə hazıram” deyə müğənni bildirib.

Builki yarışmaya da Aygün Kazımovanın prezidentlik etməsi haqqında söhbətlər vardı. “Yarışmanın dünya üzrə prezidenti Erkan Özərman qarşısında bəzi şərtlərim var. Qəbul edəcəyi təqdirdə yarışmanın prezidenti mən olaram"- deyə müğənni açıqlama vermişdi. Görünür ki, şərtlərinin qəbul olunmaması üzündən yarışmanın rəhbər kürsüsündə oturmaq müğənniyə qismət olmayıb. Amma Aygün xanım bildirib ki, qarşıdakı bir sıra layihələrinin həllini düşünərək öz tərəfindən layihədən imtina edib: "Məndə belə bir ideya yaranmışdı ki, builki yarışmanın təşkilatçılığını öz üzərimə götürüm və bunu yaxın dostum olmuş, artıq haqq dünyasına qovuşan Nahid Kabakçıya həsr edim. Amma sonradan gördüm ki, qarşıda planlaşdırdığım layihələrlə həmin yarışma üst-üstə düşür. Mən təşkilatçı olmaq yox, oxumaq istəyirəm. Ona görə də model yarışmasının prezidentliyi fikrindən daşındım. Amma mənim "Best Model of Azerbaiyan-2010"la əlaqələrim tamamilə kəsilmir. Mən sözügedən model yarışmasının münsiflər heyətindən biri olaraq seçilmişəm”.

Qazanılmayan məşhurluq

Qeyd edək ki, Azərbaycanda keçirilən bu tip yarışmaların heç biri söz-söhbətsiz ötüşməyib. Kiminsə nəzərində bu, zövqlərin haçalanması, kiminsə nəzərində mənəviyyatsızlıq, qeyrilərinin düşüncəsində isə Qərbi yamsılamaq kimi assosiasiya olunur. Xüsusən istədikləri qalibiyyəti qazana bilməyən iştirakçılar sonradan yarışmaların ədalətsizliyindən və bir çox pərdə arxası məqamlardan danışıblar. Məsələn, bu ilin may ayında “Nur production”ın təşkilatçılığı ilə keçirilən “Miss Azərbaycan -2010” müsabiqəsini yada salmaq kifayətdir. Seçim turu ərəfəsində baş verən rüsvayçılıqlar mətbuatdan da gizli qalmadı. Təşkilatçılar “müsabiqəni heç də gəlir əldə etmək üçün etmirik, sırf Azərbaycan naminə təşkil edirik” adı ilə pərdələməyə çalışsalar da yarışmanın ənənəvi iyrənclikləri ortaya çıxdı.

«Miss Bakı» yarışmasının qalibi olmuş Natella Kərimova da mətbuata açıqlamasında Azərbaycanda keçirilən müsabiqələrin aşağı səviyyədə təşkil olunduğunu deyib: “Təşkilatçılıq çox aşağı səviyyədə olduğundan bu müsabiqələr haqqında ictimaiyyət arasında ətraflı məlumat yayılmır”.

Hər yarışma öncəsi yaranan bu cür söz-söhbətlərə baxmayaraq, müsabiqələr yenə də təşkil olunur. “Bu cür yarışmalar bizim adət ənənəyə uyğun deyil” deyən ictimaiyyətin qınağını isə ümumiyyətlə məhəl qoyan yoxdur. Yəqin ona görə ki, bu gün şou-biznesin bu qolu az qala sivil dünyanın yaşam atributları səviyyəsinə yüksəlib. Müxtəlif ölkələrdən başlayan bu müsabiqələr öz əhatə dairəsini pillə-pillə genişləndirərək az qala bütün il boyu planeti dolaşır. Biri qurtarmamış digəri başlayan bu müsabiqələr ən qalmaqallı siyasi olayları belə az qala arxa plana sıxışdırır.

Ancaq maraqlıdır ki, yerli-yersiz keçirilən bu müsabiqələrin qalibləri cəmiyyətə hansı yeni stereotipləri gətirəcəklər? Bu gün dünyada Naumi Kempbel, Klaudiya Şiffer, Lind Evanqelist, Culiz Steqner kimi məşhyr modellərin qazandığı uğurun hansı qismini qazana biliblər? Bizim müsabiqələrin qaliblərinin şəkilləri dünyanın hansı məşhur dərgilərinin üz qabığını bəzəyib? Bizim modelləri Biləcəridən o tərəfdə kim tanıyır? Dünyanın hansı məşhur şirkətləri ilə müqavilələri yaranıb, hansı tanınmış rejissorların kliplərinə və ya filmlərinə dəvət alıblar? Azərbaycanın adını harada tanıdıblar? Təəssüf ki, heç harda... Onların qalibiyyəti, heç yarışmanın keçirildiyi məkanın pillələrini aşmayıb. Müsabiqə başa çatan kimi onların adı da unudulub. Əgər şəxsi həyatlarında hansısa “nailiyyətləri” qazanıblarsa, bunun nə ölkənin adına aidiyyatı var, nə də müsabiqənin nüfuzuna. Elə təkcə dilimizdə bir cümləni quraşdırıb danışa bilməyən «Miss millenium»un qalibi, hazırkı yarışmanın prezidenti Validə Abbasovanı misal çəkmək kifayətdir. Növbəti qaliblərin də seçimi ondan uzağa getməyəcək ki...

Təranə Məhərrəmova

Kaspi.- 2010.- 24 sentyabr.- S. 9.