Pensiyanızın miqdarına özünüz təsir edə bilərsiniz

Amma əksəriyyət bundan xəbərsizdir

Dövlət Sosial Müdafiə Fondunun (DSMF) internet saytında (www.sspf.gov.az) ictimaiyyətlə əlaqələri daha da inkişaf etdirmək məqsədi ilə keçirilən növbəti interaktiv sorğu yekunlaşıb. Bu barədə qəzetimizə DSMF-nin İctimaiyyətlə əlaqələr sektorundan məlumat verilib. Qurumdan bildirilib ki, aparılan sorğular əhalinin sığorta-pensiya islahatları barədə nə dərəcədə məlumatlı olmasını öyrənmək və vətəndaşların daha az informasiyaya malik olduğu sahələr istiqamətində təbliğat işlərini gücləndirmək üçün həyata keçirilir. Bu dəfəki sorğuya gəlincə, respondentlərə "Fərdi uçot sisteminin tətbiqindən sonra pensiyanızın miqdarının ödənilmiş məcburi dövlət sosial sığorta haqlarının miqdarından asılı olduğunu bilirsinizmi" sualı ünvanlanıb.

Sorğunun yekun nəticələrinə əsasən, respondentlərin 33,6 faizi suala "xeyr", 31,5 faizi isə "bu haqda məlumatım yoxdur" cavabını veriblər. Sorğuya qatılanların 34,9 faizi isə fərdi uçot sisteminin tətbiqindən sonra pensiyanın miqdarının ödənilmiş məcburi dövlət sosial sığorta haqlarının miqdarından asılı olduğunu bildiyini vurğulayıb. Sorğunun nəticələri göstərir ki, respondentlərin ümumilikdə 65,1 faizi pensiyanın miqdarının ödənilmiş məcburi dövlət sosial sığorta haqlarının miqdarından asılı olduğundan məlumatsızdır.

Fonddan qeyd edilib ki, 2006-cı ilin 1 yanvarından qüvvəyə minən "Əmək pensiyaları haqqında" qanuna əsasən, pensiyalar fərdi uçot sisteminin məlumatları əsasında təyin olunur. Fərdi uçot sistemi tətbiq edildikdən sonra təyin olunan pensiyanın miqdarı sığorta stayından və ödənilmiş məcburi dövlət sosial sığorta haqlarının miqdarından asılıdır: "Ona görə də hər bir vətəndaş yaşlı dövrünün maddi təminatının məsuliyyətini əmək fəaliyyəti göstərdiyi vaxtdan düşünməli, harada çalışmasından asılı olmayaraq, işləməyə başlayarkən ilk növbədə əmək müqaviləsini imzalamalıdır. Bundan başqa, aldığı əmək haqqının tam məbləğdə əmək haqqı cədvəlində göstərilməsinə çalışmalı, işlədiyi dövrlər üçün işəgötürən tərəfindən məcburi dövlət sosial sığorta haqlarının tam miqdarda ödənilməsinə şəxsən maraqlı olmalıdır. Yeni sığorta-pensiya sistemində hər bir şəxs hələ əmək fəaliyyəti dövründə özünün gələcək pensiya məbləğinə təsir edə bilər".

Fonddan o da bildirilib ki, sığorta-pensiya sistemində davam etdirilən islahatların mühüm həlqəsi kimi yaxın gələcəkdə hər bir vətəndaşın fərdi hesabı ilə bağlı məlumatlandırılması da nəzərdə tutulur. Hazırda bu məqsədlə ümumi məlumat bazasının yaradılması istiqamətində iş aparılır. Baza formalaşdıqdan sonra isə Dövlət Sosial Müdafiə Fondunda qeydiyyatda olan bütün sığortaolunanlar özlərinə aid istənilən məlumatı internet sistemi vasitəsilə əldə edə biləcəklər.

Həqiqət

Kaspi. - 2010. – 7 yanvar. – S.3.