Jurnalistlərin orta aylıq gəlirləri 300-350 manatı keçmir

KİV-in İnkişafına Dövlət Dəstəyi Fondu bu il daha çox fərdi jurnalist müsabiqələrinin təşkilinə üstünlük verəcək

Prezident yanında Kütləvi İnformasiya Vasitələrinin İnkişafına Dövlət Dəstəyi Fondu 2010-cu il üçün müsabiqə elan etməyə hazırlaşır. Fondun icraçı direktoru Vüqar Səfərli "Media forum" saytına bildirib ki, bu həftə ərzində yeni müsabiqənin prioritet istiqamətləri müəyyənləşdiriləcək: "Konsepsiyada 18 istiqamət var və müsabiqə də onların əsasında elan ediləcək".

2010-cu il üçün dövlət büdcəsindən fonda ayrılan vəsaitdə artım olmadığını qeyd edən V.Səfərli bu ilin mətbuat üçün çox önəmli olduğunu da vurğulayıb: "Bu il mətbuatın yubileyidir - milli mətbuatımızın 135 illiyini qeyd edəcəyik. Bununla bağlı fonda ayrılan vəsaitdə müəyyən dəyişiklik ediləcəyini gözləyirik, əlavə vəsait ayrılmalıdır. Fond 135 illiklə bağlı tədbirlər planı da hazırlayır. Müəyyən müsabiqələr keçirməyi, mətbuat gününə - iyulun 22-nə qədər ayrıca yazı müsabiqəsi təşkil etməyi də planlaşdırırıq".

2010-cu ildə daha çox fərdi jurnalist müsabiqələrinin təşkil olunmasına üstünlük verəcəklərini deyən icraçı direktor qeyd edib ki, konkret istiqamətlər üzrə elan olunan layihə müsabiqələrindən əksər halda ayrı-ayrı jurnalistlər bəhrələnə bilmirlər: "Mən çalışacam ki, jurnalistlər üçün fərdi yarışları daha çox keçirək. Fikrimcə, bu zaman həm onlar öz üzərilərində daha məsuliyyətlə işləməyə həvəslənəcəklər, həm də fərdi qələbələri onların sosial vəziyyətinin yaxşılaşmasına yardım göstərəcək".

V.Səfərli 2009-cu ilin altı ayı ərzində xeyli iş görüldüyünü söyləyib: "Qısa zamanda təşkilatlanmağa, müsabiqələr keçirməyə nail olduq. Əlbəttə, iş olan yerdə nöqsan da olacaq. Ola bilsin, hansısa nöqsanlarımız olub. Nəzərdə tutulub ki, 2009-cu ilin yekunlarına dair mətbuat konfransı keçirilsin. Kimin nöqsanlarımız haqda deyəcəkləri varsa desin, biz də onları aradan qaldıraq".

Fondun hazırda dörd nəfər ştatlı, dörd nəfər isə ştatdankənar işçisi var. İcraçı direktor bildirib ki, qurumun fəaliyyəti genişləndikcə işçilərin artmasına da ehtiyac olacaq.

Fondun ofis probleminə gəlincə, V.Səfərli deyib ki, hələlik Nazirlər Kabineti fonda normal yer təklif etməyib: "Amma bizim bir sürprizimiz var. Biz təzə ofisə köçəndə bunu siz də biləcəksiniz".

Sonda V.Səfərli onu da qeyd edib ki, fondun fəaliyyəti ilə bağlı illik hesabatı bir ay ərzində Prezident Administrasiyasına verəcəklər.

Bu arada jurnalistlərin Həmkarlar İttifaqı (YuHİ) Azərbaycan jurnalistlərinin 2009-cu ildə sosial durumunu öyrənmək üçün keçirdiyi sorğunun nəticələrini açıqlayıb. YuHİ sədri Müşfiq Ələsgərli bildirib ki, sorğuya ölkənin son beş ildə fasiləsiz və gündəlik nəşr olunan 40-a qədər qəzet və informasiya agentliyinin, həmçinin 20-yə qədər həftəlik nəşrin əməkdaşları cəlb edilib. 60 redaksiyanı təmsil edən sorğu iştirakçıları çalışdıqları redaksiyalarda əmək münasibətlərinin rəsmiləşdirilməsi (əmək müqavilələrinin bağlanması), aylıq gəlirlərinin miqdarı, jurnalistləri daha çox narahat edən digər məsələlərlə bağlı sualları cavablandırıblar.

Aydınlaşıb ki, gündəlik nəşr edilən qəzetlərin və informasiya agentliklərinin 10 faizində əmək münasibətlərinin rəsmiləşdirilməsi ilə bağlı problemlər var (yəni bu tip redaksiyalarda əmək müqavilələri ya bağlanmayıb, ya da əməkdaşlardan yalnız baş redaktorla şəxsi bağlılığı olan əməkdaşlarla müqavilələr bağlanıb).

Bağlanmış müqavilələrin işlək olması problemi isə yenə də qalmaqdadır. Sorğunun nəticələrinə görə, işçilərlə əmək müqaviləsi bağlamış redaksiyaların 78 faizində bu müqavilələr simvolik xarakter daşıyır (ya müqavilələr reallığı əks etdirmir, ya da onların şərtlərinə əməl olunmur).

Sorğuya daxil olan 40-a yaxın gündəlik qəzet və informasiya agentliyinin 73 faizində jurnalistlərin aylıq gəlirlərinin 300-350 manat civarında olduğu aydınlaşıb. Redaksiyaların 18 faizində aylıq gəlirlər 400 manatdan yuxarı, 9 faizində isə 250 manat civarındadır.

Həftəlik və ayda iki dəfə nəşr olunan qəzetlərdə (sorğu 20 redaksiyanın əməkdaşları arasında keçirilib) vəziyyət fərqlidir. Bu tip redaksiyalarda jurnalistlərin orta aylıq gəlirləri 100-150 manat civarındadır (yalnız üç redaksiyada fərqli göstərici olub - 200 manat, 250 manat, 275 manat). Bu tip redaksiyaların yalnız 5 faizində işçilərlə əmək müqavilələri bağlanıb. Qalan redaksiyalarda əmək münasibətlərinin rəsmiləşdirilməsi istiqamətində heç bir addım atılmayıb.

Rəyi soruşulanların önə çəkdikləri ən ciddi problem evsizlikdir. Şəxsi mənzili olmayan və ya aldığı əmək haqqı ilə bu problemi həll edə bilməyən jurnalistlərin sayı ötən illərdə olduğu kimi, 80 faizlə ifadə olunur.

Fuad

Kaspi. -2010. -12 yanvar. – S.9.