Türkiyənin Baş naziri: "Azərbaycan torpaqlarının işğaldan azad olunması bizim üçün həyati əhəmiyyət daşıyır"

Türkiyənin Baş naziri Rəcəb Tayyib Ərdoğan Rusiyaya rəsmi səfəri çərçivəsində Moskva Dövlət Beynəlxalq Münasibətlər İnstitutunun tələbələri ilə görüşündəki çıxışında Cənubi Qafqazda davamlı və möhkəm sülhün təmin olunmasının Ankara üçün vacib olduğunu, Cənubi Qafqazda Sabitlik və Əməkdaşlıq Platforması təşəbbüsünün davam etdiyini bildirmişdir.

Ermənistanla münasibətlərin normallaşması istiqamətində addımlar atıldığını və protokollar imzalandığını diqqətə çatdıran Rəcəb Tayyib Ərdoğan demişdir ki, Azərbaycan topaqlarının işğaldan azad olunması və Azərbaycan ilə Ermənistan arasında münaqişənin həlli də bizim üçün həyati əhəmiyyət daşıyır. Bu məsələdə ATƏT-in Minsk qrupunun üzərinə böyük məsuliyyət düşür. Artıq 20 ildir danışıqlar davam edir və problem hələ də həllini tapmamışdır. Minsk qrupunun həmsədri olan Rusiya da bu prosesdə mühüm rola malikdir. Dağlıq Qarabağ münaqişəsinin həlli bu səfər zamanı da xüsusi diqqət yetirəcəyimiz problemlərdən biri olacaqdır. Bu məsələdə tezliklə ədalətli qərar olarsa, Türkiyə ilə Ermənistan əlaqələrinin də normallaşması prosesi davam edəcəkdir.

Oqtay BAYRAMOV,

AzərTAc-ın xüsusi müxbiri

Ankara

Azərbaycan.- 2010.-14 yanvar.- S. 1.