Mətbuat Şurası hesabat verib

Əflatun Amaşovun fikrincə, mətbuatın maliyyə çətinlikləri aradan qaldırılarsa, digər problemlər də tezliklə həllini tapacaq

Dünən Mətbuat Şurasının 2009-cu ildə gördüyü işlərlə bağlı hesabatı təqdim olunub. Hesabatda şuranın komissiyalarının və İdarə Heyətinin il ərzində fəaliyyətini əks etdirən statistik göstəricilər, şikayət və müraciətlər haqda məlumatlar, həmçinin onların araşdırılması məsələləri yer alıb. Hesabata görə, şuraya 2009-cu ildə ümimilikdə 489 müraciət daxil olub. Onlardan 276-sı ayrı-ayrı vətəndaşlardan, 167-i dövlət idarələri, müəssisə və təşkilatlardan, 61-i özəl müəssisələrdən, 45-i ictimai qurumlardan, 29-u özünüidarəetmə orqanlarından, 11-i siyasi partiyalardandır. Daxil olan müraciətlərdən 267-i şuranın Katibliyində həllini tapıb. 222 müraciət Şikayətlər üzrə Komissiyada araşdırılıb. 31 şikayətə İdarə Heyətində baxılaraq müvafiq qərar çıxarılıb. 3-4 il əvvəl dövlət idarələrindən şikayət və müraciətlərin daha çox olduğunu bildirən şura sədri Əflatun Amaşov qeyd edib ki, keçən illər ərzində ayrı-ayrı vətəndaşlardan gələn şikayətlər artıb. Sədr şikayətlərin daha çox təhsil və səhiyyə sahələri ilə bağlı olduğunu da diqqətə çatdırıb.

Ə.Amaşov ümumilikdə 55 rayondan şikayətlərin daxil olduğunu deyib: "2005-ci ildə cəmi 7 şəhər və rayondan şikayətlər almışdıq. İndi isə bu rəqəm 55-dir. Gözlənildiyi kimi, ən çox şikayət Bakı şəhərindəndir - 195 şikayət".

"Reket" nəşrlərə qarşı ictimai qınağın artırılması üçün şuranın fəaliyyətinin daha da genişləndiyini deyən sədr vurğulayıb ki, bununla bağlı dövlət idarələri ilə danışıqlar aparılır: "Tərtib etdiyimiz "qara siyahı"nı dövlət idarələrinə təqdim edirik ki, onlar da həmin nəşrləri tanısın və əməkdaşlıq etdiyi mətbuat orqanlarının seçimində yanılmasınlar. Bu siyahıda 94 dövri nəşrin adı var. 2009-cu ildə 4 dəfə "reket nəşr"lərin siyahısı açıqlanıb".

2009-cu ildə həbsdə olan jurnalistlərin azadlığa çıxması, "Diffamasiya haqqında" qanunun qəbulu, KİV-in İnkişafına Dövlər Dəstəyi Fondunun formalaşmasının Mətbuat Şurasının diqqət yetirdiyi əsas məsələlər olduğunu vurğulayan Ə.Amaşov söyləyib ki, 2010-cu ildə bütün bu istiqamətlərdə səyləri davam etdirəcəklər: "Mətbuat Şurası ölkədə diffamasiya ilə bağlı qanunun qəbuluna dəstək vermək üçün ötən ilin oktyabrında Avropa Şurasının Azərbaycandakı nümayəndəliyi ilə birgə tədbir keçirib. Tədbirdə diffamasiyanın Azərbaycan cəmiyyətinə, xüsusən də jurnalistlərin fəaliyyətinə təsirinə dair fikir mübadiləsi aparılıb".

Həbsdə olan jurnalistlərin azadlığa çıxması üçün müvafiq qurumlarla danışıqlar aparıldığını qeyd edən sədr bildirib ki, mətbuatın maliyyə vəziyyəti ilə bağlı yaranan çətinliklər aradan qaldırılarsa, digər problemlər də tezliklə həllini tapar.

Tədbirdə çıxış edən "Səs" qəzetinin baş redaktoru Bəhruz Quliyev mətbuatla dövlət orqanları arasında olan münasibətlərə toxunub: "Hesab edirəm ki, ciddi dövri nəşrlər dövlət orqanlarından informasiyanı asanlıqla ala bilir. O nəşrlər informasiyanı almaqda çətinlik çəkir ki, dövlət idarələri, konkret olaraq sual ünvanlanan məmur həmin jurnalisti və nəşri ciddi hesab etmir. Digər tərəfdən, təbii ki, fikirləri təhrif olunan məmur jurnalistlərlə əməkdaşlıqdan yayınacaqlar. Problemlərin aradan qaldırılması üçün mətbuat kommersiya siyasətini düzgün qurmalıdır".

"Yeni Azərbaycan" qəzetinin baş redaktoru Hikmət Babaoğlu Mətbuat Şurasının sadalanan istiqamətlər, xüsusən də "reket jurnalistika"ya qarşı mübarizə sahəsində işini gücləndirməsinin vacibliyini vurğulayıb. O, həbsdə olan jurnalistlərlə bağlı fikirlərə də münasibət bildirib: "Həbsdə olan jurnalistlərin törətdiyi cinayət əməlinə, yoxsa peşə fəaliyyətinə görə azadlıqdan məhrum edilməsi məsələsi ilə bağlı ciddi fikir ayrılıqları var. Jurnalistlər konkret cinayət maddələri ilə mühakimə olunsalar da, bəziləri hesab edir ki, onlar peşə fəaliyyətinə görə həbs olunublar. Bu məsələnin müzakirə olunmasına ehtiyac var".

Mətbuat Şurasının üzvü, millət vəkili Aqil Abbas da mətbuatla dövlət idarələri arasındakı problemləri qeyri-ciddi mətbu orqanlarının yaratdığını bildirib. O, "Diffamasiya haqqında" qanunun qəbulunun əleyhinə olduğunu bəyan edib. Millət vəkilinin fikrincə, belə bir qanunun qəbulu ölkədə vətəndaş müharibəsinə səbəb ola bilər: "Avropada mətbuatın azadlığı Azərbaycandakından aşağı səviyyədədir. Bizi də Türkiyənin gününə salmaq istəyirlər. Bəzi məsələlər isə mətbuatın günahı deyil".

"İki sahil" qəzetinin baş redaktoru, Mətbuat Şurasının Şikayətlər üzrə Komissiyasının sədri Vüqar Rəhimzadə deyib ki, şuraya daxil olan şikayətlər maksimum şəkildə obyektiv araşdırılır: "Şikayətlər üzrə Komissiya 19 iclasda ayrı-ayrı məsələlər əsasında ümimilikdə 147 məsələni araşdırıb ki, onların əsasında 116 rəy çıxarılıb. Həmin rəylərin 27-ə dair məsələ şuranın yekun qərarının motivini təşkil edib".

V.Rəhimzadə qeyd edib ki, mətbuatdakı problemlərin aradan qaldırılması üçün jurnalistlər də peşə etikası qaydalarına əməl etməlidirlər. Onun sözlərinə görə, dövri nəşrlərin bir çoxu etik qaydaları pozaraq, bir çox halda insanların şərəf və ləyaqətini toxunan yazılara yer verir.

Fuad

Kaspi. -2010. – 28 yanvar. – S.4.