Xüsusi qabiliyyət tələb edən ixtisaslara dair yeni vəsaitlər nəşr olunub
Kitabçalar 5 istiqamət üzrə
hazırlanıb
Dünən Tələbə Qəbulu
üzrə Dövlət
Komissiyasında (TQDK) xüsusi
qabiliyyət tələb
edən ixtisaslar üzrə vəsaitlərin
nəşrinə həsr
olunmuş mətbuat konfransı keçirilib. TQDK sədrinin
müavini Namiq Babayevin sözlərinə
görə, qurum
2010/-2011-ci tədris ili üçün ali və orta
ixtisas məktəblərinə
qəbul imtahanlarına
hazırlıq işləri
çərçivəsində 5 istiqamət üzrə xüsusi qabiliyyət tələb edən ixtisaslara aid vəsaitlər
çap etdirib:
"Bu vəsaitlər TQDK-nın
əməkdaşları və
komissiyanın nəzdində
fəaliyyət göstərən
elmi-metodiki seminarların
iştirakçıları ilə birlikdə hazırlanıb".
Sədr müavini xüsusi qabiliyyət tələb edən ixtisaslar üzrə qiymətləndirmə
meyarlarının yeni
formada tərtib olunduğunu, hər istiqamət üzrə ali məktəblərin,
orta (11 illlik) və natamam orta (9 illik) təhsil bazasından orta ixtisas məktəblərinin
qəbul proqramlarının
və metodiki tövsiyələrin təkmilləşdirildiyini
də diqqətə çatdırıb. Onun sözlərinə görə,
vəsaitlərdə qabiliyyət
tələb edən ixtisasların yığcam
xarakteristikası və
onların hansı ali məktəblərdə,
orta və natamam orta təhsil
bazasından orta ixtisas məktəblərində
mövcud olması haqqında məlumatlar, seçmə turun şərtləri yer alıb: "Bundan başqa, orada qabiliyyət imtahanlarının
proqramları, qiymətləndirmə
meyarları, imtahanlara
hazırlıqla bağlı
tövsiyələr, məsləhətlər,
tapşırıq nümunələri,
çalışmalar, əyani
vəsaitlərdən reproduksiyalar,
normativlər yerləşdirilib.
Bir sözlə, vəsaitlərdə xüsusi qabiliyyət tələb
edən ixtisasları seçənlərin marağına
uyğun olan, sorğularına aydınlıq gətirən,
imtahana hazırlaşmalarına fayda verə bilən ən zəruri
materiallar əksini tapıb".
TQDK-nın Qabiliyyət
imtahanları üzrə sektorunun müdiri Elmira Hüseynova isə
vəsaitlərin nəşr olunduğu istiqamətlər barədə
məlumat verib. Belə ki, 5 kitabçada təsviri sənət,
musiqi sənəti, memarlıq və dizayn, teatr, kino və
xoreoqrafiya sənətləri, bədən tərbiyəsi və
idman istiqamətləri yerləşdirilib. Sektor müdiri ali məktəblərin
pedaqoji, idman və dizayn (texnoloji) ixtisasları, orta və əsas təhsil
bazasından orta ixtisas məktəblərinin ixtisasları
üzrə qabiliyyət imtahanlarının nəticələrinin
məqbulla, ali məktəblərin digər ixtisasları
üzrə isə balla qiymətləndiriləcəyini də
qeyd edib.
Həqiqət
Kaspi. -2010. – 29 yanvar. – S.8.