“Statoil” şirkətində Azərbaycan Günü

Şirkətin Oslodakı baş ofisində Azərbaycana həsr edilmiş tədbir keçirilib

Norveçin “Statoil” şirkətinin Oslodakı baş ofisində Azərbaycana həsr edilmiş tədbir keçirilib. Tədbirdə ARDNŞ-nin kadr, rejim və informasiya texnologiyaları üzrə vitse-prezidenti Xalik Məmmədov və ARDNŞ-nin Muzey işinin təşkili şöbəsinin rəisi İlqar Əliyev iştirak ediblər.

Stokholmdakı Nobellər ailəsi cəmiyyətinin sədri Tomas Tiden də tədbirə qatılmışdır. Tədbiri giriş sözü ilə açan “Statoil” şirkətinin Avropa və Asiya ölkələri üzrə inkişaf və hasilat bölməsinin baş vitse-prezidenti Torgeir Kudland tədbirin məzmunu barədə məlumat vermişdir. O bildirmişdir ki, tədbirin proqramına iki il ərzində dünyanın bir çox ölkələrində dəfələrlə müvəffəqiyyətlə nümayiş etdirilmiş “Nobellər və Bakı nefti” bədii, rəqəmsal və foto-sənədli sərgisi daxil edilmişdir. Qeyd edilmişdir ki, sərgi “Statoil”un mədəniyyət layihələri sırasında xüsusi yer tutur. Birinci dəfə 2009-cu ildə göstərilən sərgi “Əsrin müqaviləsi”nin imzalanmasının 15, “Branobel” səhmdar cəmiyyətinin yaradılmasının isə 130 illik yubileylərinə həsr olunmuşdur. Bu, Azərbaycan Respublikası Dövlət Neft Şirkəti, “Statoil Hydro” və Azərbaycan Mədəniyyət və Turizm Nazirliyinin əməkdaşlığı çərçivəsində hazırlanmış ilk layihədir. Azərbaycanda neft sənayesinin tarixinə həmişə böyük ehtiramla yanaşıldığını deyən ARDNŞ-nin kadr, rejim və informasiya texnologiyaları üzrə vitse-prezidenti Xalik Məmmədov bildirmişdir ki, ‘‘Nobellər və Bakı nefti’’ sərgisi bu hörmətin daha bir təzahürüdür. O, Azərbaycan neft sənayesi tarixində milli sahibkarlarla bərabər xarici sərmayədarların xüsusi rol oynadığını vurğulayaraq tədbir iştirakçılarına Azərbaycan neftinin tarixi ilə bağlı məlumat vermişdir. X.Məmmədov 1994-cü ildə xalqımızın ümummilli lideri Heydər Əliyevin əsasını qoyduğu yeni neft strategiyasının gerçəkləşməsi nəticəsində ötən 17 ildə ölkəmizdə regional əhəmiyyət kəsb edən bir çox irimiqyaslı layihələrin həyata keçirildiyini deyərək, bu siyasətin Azərbaycanı dünya neft mərkəzlərindən birinə, Avropanın enerji təhlükəsizliyində mühüm rol oynayan dövlətə çevirdiyini qeyd etmişdir. O, Azərbaycanın bu gün də 132 il əvvəl olduğu kimi xarici şirkətlərlə əməkdaşlığa açıq olduğunu demiş və “Statoil” şirkəti ilə əməkdaşlığın buna bariz nümunə olduğunu göstərərək şirkətin Azərbaycanda fəaliyyətindən danışmışdır. ARDNŞ-nin vitse-prezidenti ölkədə neft sənayesinin qədim tarixini, zəngin ənənələrini, dövlət müstəqilliyinin möhkəmləndirilməsində və bu gün davamlı artan potensialının əldə olunmasında müstəsna əhəmiyyətini, o cümlədən bəşər tarixinə verdiyi əvəzsiz töhfələri nəzərə alaraq, Azərbaycan Respublikasının Prezidenti İlham Əliyev tərəfindən Bakı şəhərində Neft muzeyinin yaradılması haqqında müvafiq sərəncamın imzalandığını və sərancamın icrasının ARDNŞ-ə tapşırıldığını qeyd etmiş, demişdir ki, “Nobellər və Bakı nefti” sərgisi gələcəkdə bu muzeydə öz layiqli yerini tutacaqdır. Tədbirdə çıxış edən Azərbaycan Dövlət İncəsənət muzeyinin İnnovasiya şöbəsinin müdiri Əminə Məlikova bildirmişdir ki, “Nobellər və Bakı nefti” layihəsinin əsas məqsədlərindən biri dünya brendinə çevrilmiş Nobelin adının Azərbaycanla sıx əlaqədar olduğunu dünya ictimaiyyətinə çatdırmaqdır. Layihənin Skandinaviya ölkələri mədəniyyəti ilə Azərbaycan mədəniyyəti arasında körpüyə çevrildiyini deyən Ə.Məlikova “Statoil” və ARDNŞ-ə Azərbaycanın mədəni və tarixi irsinin qorunub saxlanmasında və təbliğ edilməsində göstərdikləri dəstəyə görə minnətdarlığını bildirmişdir. Tədbirin ikinci hissəsini açan “Statoil” şirkətinin Azərbaycandakı prezidenti Lars Troen Sorensen şirkətin ölkəmizdəki fəaliyyəti barədə iştirakçılara ətraflı məlumat vermişdir. Şirkətin Azərbaycandakı əməkdaşları Tangu Kosmau, Siv Morterud, Erik Kjos-Hanssen “Azəri-Çıraq-Günəşli” və “Şahdəniz” layihələrinin mərhələlər üzrə təqdimatını keçirmişlər. Tədbirdə BP şirkətinin hazırladığı “Şahdəniz” filmi və “Statoil” şirkətinin Azərbaycanda yaşayan əməkdaşlarının fəaliyyətindən bəhs edən “Mən “Statoil”çuyam” adlı film nümayiş etdirilmişdir.

Tədbirdə ARDNŞ təmsilçiləri ilə birlikdə Azərbaycan Respublikası Mədəniyyət Nazirliyinin əməkdaşları da iştirak etmişlər.

Kaspi.-2011.-8 aprel.-S.13.