Tamaşaçı teatrda həyatını axtarır

Gənc aktrisa Asya Atakişiyeva: “Əgər çıxış yolu insanı xilas etmirsə, ölməyə dəyməz”

Asya Atakişiyeva Azərbaycan Gənc Tamaşaçılar Teatrının son illərdəki ən parlaq gənc simalarından sayılır. Yaşının az olmasına baxmayaraq, o, 20-dən çox rolda oynayıb. Azərbaycan Dövlət Mədəniyyət və İncəsənət Universitetinin məzunu olan A.Atakişiyeva 7 ildir səhnə də olsa da, onu bu yaxınlarda tanınmış dramaturq və yazıçı Əli Əmirlinin “Mən sən sevirəm” tamaşasındakı rolu ilə kəşf etdik.

Asya tamaşada öz rolunu olduqca dramatik canlandıra bildi və əslində bütün ziddiyyətlərə qarşı açar rolunu onun intihar səhnəsi oynadı. Görkəminə görə aktrisadan daha çox məktəbliyə oxşayan Asya xanımın elə məktəbli obrazını canlandırması, məncə, rejissorun doğru seçimindən xəbər verirdi. Asya xanım suallarımıza lakonik cavab versə də, həyəcanı gözlərindən aydın sezilirdi...

- “Mən səni sevirəm” tamaşasında müəllimlərin rüşvətxorluğu, əks qütblü şəxsiyyət ziddiyyəti və bir də bütün problemlərin içində hazırlıqsız gənclərin ölümlə üzləşməsi məsələsi qoyulur. Siz bu gün Azərbaycan reallıqlarında bu problemlərə necə yanaşırsınız və bu əsərin dramaturgiyamızda yerini necə xarakterizə edərdiniz?

- Tamaşada qoyulmuş problemlərin hamısı bugünki Azərbaycan reallıqlarında var. Orda bir namuslu və halal, bir də rüşvətxor və riyakar müəllim obrazı var. Hər iki obrazla bu gün də həm ali təhsil müəssisələrində, həm də orta məktəbdə rastlaşa bilərsiniz. Özüm də təhsil alanda dramda canlandırılan müəllim obrazları kimi şəxslərə rast gəlmişəm.

- “Romeo və Cülyyetta” əsərində intihar edirsiniz, “Mən səni sevirəm”də isə intihar edəndə sizi xilas edirlər. Sizcə, gündəlik həyatımızda problemlərin həllində intihar çıxış yoludurmu?

- Düzdür, “Romeo və Cülyyetta” əsərində intihar edirəm, amma həyatda elə bir vəziyyətə düşsəm, canıma qəsd etmərəm. Düşünürəm ki, əgər çıxış yolu insanı xilas etmirsə, ölməyə dəyməz. Ölüm çıxış yolu deyil.

- Bu gün teatrlarda klassik əsərlərə çox müraciət olunur. Sizcə, avanqard teatrın yaradılmasına ehtiyac varmı?

- Bəli, haqlısınız. Çox istəyərdim ki, yeni, həyatımıza uyğun olan tamaşalar oynanılsın. Belə olsa, insanlar teatra daha çox bağlanar. Tamaşaçı teatrda həyatını axtarır, nəsə uyğun bir nüansla rastlaşanda daha çox sevir səhnə səsini. Amma klassika da teatrın repertuarında mütləq olmalıdır. Yəni demirəm ki, klassikaya dönük çıxaq. Məsələn, mən Mirzə Fətəli Axundovun və Çexovun dramlarını çox sevirəm.

- “Mən səni sevirəm” tamaşasına bir neçə nəfərlə birgə baxırdıq. Son qənaətimiz belə oldu ki, əsərdəki dialoqlar çox sünidir. Obrazlar o qədər cansıxıcı danışırlar ki, bugünki danışıq stilimizə uymur və nəticədə tamaşanın təsir gücü azalır. Siz necə düşünürsünüz?

- Məncə, çox da pis deyildi. Qəliz də deyildi, standart nitq idi. Ümumiyyətlə, yaxşı olar ki, yazılan əsərlərin dili danışıq dilimizə bir qədər yaxın olsun. Məsələn, klassiklərin yazdığı əsərlər var ki, 200 ildir dəyişdirilmədən oynanılır, adamlar da o dilə və dilin daşıyıcıları və ifaçıları olan aktyorlara sevə-sevə qulaq asırlar. Mən başa düşürəm ki, siz nəyi nəzərdə tutursunuz, o baxımdan razıyam sizinlə.

- Hansısa dram oxumusunuz ki, o, səhnələşdirilməyib? Və siz o əsəri səhnəmizdə görmək istəyirsiniz?

- Adətən klassiklərin əsərlərini oxumuşam. Şekspirin əsərlərini çox sevirəm. Hazırda mütaliə etməyə vaxtım yoxdur deyə, əsərləri oxuya bilmirəm. Amma inanıram ki, yaxşı əsərlər, dramlar yazılır. Sadəcə, yaxşı əsərləri üzə çıxartmaq lazımdır. Cülyetta rolunu oynayandan sonra hansı əsərdə oynayacağım ağlıma gəlmir. Çünki ən böyük arzum Cülyettanı oynamaq idi. Şükür ki, uğurla həmin obrazın öhdəsindən gəldim.

- Yəni sənət idealınız Cülyetta idi? Bundan daha böyük uğur qazanacağınıza inanmırsınız?

- Əlbəttə, istəyirəm. Filmlərə çəkilmək fikrim var. Amma hələlik ən böyük sevgim Cülyetta idi. Gənc aktyorların ən çox sevdiyi populyar obrazlardan biri, bəlkə də birincisi Cülyettadır. Elə aktrisa tapmaq olmaz ki, bu rolu oynamaq istəməsin. Şükür, mənə də qismət oldu. Arzum başqa istəklərimə də bu cür çatmaqdır.

- Bunun üçün kifayət qədər imkanların var.

- Hə, bilirəm. Gənc Tamaşaçılar Teatrı yaxşı teatrdır, burda gənclər üçün hər cür imkan yaradılır. Hər kəsə rol verilir. Aktyorlar arasında ayrı-seçkilik qoyulmur. Bu cəhətlər də bizi öz potensialımızı ifadə etməyə imkan verir.

Fərid Hüseyn

Kaspi.- 2011.- 23 dekabr.- S.13.