Xocalı faciəsini törədənlər hələ də cəzalarını almayıblar

Əli Əhmədov: “Beynəlxalq təşkilatların mövqeyi başadüşülən deyil”

Fevralın 23-də Yeni Azərbaycan Partiyasının Gənclər Birliyinin təşkilatçılığı ilə «Xocalıya ədalət» adlı tədbir keçirildi. Tədbirdə millət vəkilləri, ictimaiyyət nümayəndələri, xarici ölkələrin Azərbaycandakı diplomatik korpuslarının təmsilçiləri iştirak edirdilər. Tədbiri açıq elan edən YAP Gənclər Birliyinin sədri Seymur Orucov Xocalı faciəsinin insanlıq tarixinin ən dəhşətli qətliamlarından olduğunu vurğuladı. O qeyd etdi ki, faciənin baş verməsində SSRİ-nin Xankəndindəki 366-cı alayının da xüsusi rolu olub.

Tədbirdə çıxış edən YAP-ın sədr müavini, partiyanın icra katibi Əli Əhmədov gənclərin bu cür tədbirlər keçirmələrinin Xocalı faciəsini unutmama və qətliamı törədənlərin cəzalandırılmasına nail olmaq baxımından mühüm əhəmiyyət kəsb etdiyini bildirdi. O təəssüflə qeyd etdi ki, hələlik Xocalı faciəsini törədənlər öz layiqli cəzalarını almayıblar. Bunun nəticəsidir ki, onlar imkan düşdükcə öz cinayətkar əməllərini davam etdirirlər. Ə.Əhmədov qeyd etdi ki, dünyanın hər yerində insanlığa qarşı cinayətlər törətmiş şəxslər cəzalandırırlar. XX bununla bağlı çoxsaylı nümunələrə mövcuddur. Elə keçən əsrin sonlarda Balkanlarda törədilən cinayətlərin günahkarlarına qurulan beynəlxalq məhkəmələri xatırlamaq kifayətdir. Ə.Əhmədov qeyd etdi ki, çox təəssüf ki, Xocalı faciəsini törədənlər üçün bu cür məhkəmələr hələ də qurulmayıb. Halbuki 19 il bundan əvvəl tam etnik səbəblərlə 1 şəhər tamamilə yer üzündən silinib. Qətliam zamanı 63 uşaq, 70 qoca, 106 qapdın qətlə yetirilib. Özü də qətlə yetirilənlərin heç bir hərbçi olmayıb. Ermənilərin törətdiyi qətliam birbaşa sivil əhaliyə qarşı yönəlib. Bu hadisədən 19 il keçməyinə baxmayaraq, hadisə barədə həqiqətlər dünya birliyinə çatdırılsa da Xocalı qətliamına hələ də beynəlxalq təşkilatlar tərəfindən lazımi qiymət verilməyib. Bu səbəbdəndir ki, hadisəni törədən cinayətkarların bəziləri hazırda siyasətlə məşğuldurlar və Ermənistanın idarə olunmasında iştirak edirlər. Məhz bu cəzasızlıq səbəbindəndir ki, onların bəziləri mütəmadi olaraq Xocalı faciəsini törətdiklərinə görə fəxr etdiklərini də açıqlayırlar. Dünya birliyi isə buna biganəliyini davam etdirir. Ə.Əhmədov dedi ki, beynəlxalq təşkilatların bu cür mövqeyi başa düşülən deyil. Çünki Xocalı faciəsi təkcə azərbaycanlılara qarşı deyil, ümumilikdə insanlığa qarşı törədilmiş bir qətliamdır. YAP sədrinin müavini onu da bildirdi ki, bir haqsızlığın cavabının verilməməsi növbəti haqsızlıqlar üçün yol açır. Xocalı faciəsinin həqiqi qiymətinin verilməməsi Dağlıq Qarabağ münaqişəsinin həlli prosesini də uzadır. 18 ildir aparılan danışıqlar prosesində heç bir irəliləyişə nail olmaq mümkün olmayıb. YAP funksioneri onu da vurğuladı ki, Xocalı faciəsi kimi qətliamların günahkarları cəzalandırılmadıqca dünyanın digər nöqtələrində də bu cür faciələrin törədilməsi ehtimalı qalır: «Biz istəyirik ki, məhz bu səbəbdən dünya Xocalı faciəsi kimi qətliamlara biganə qalmasın. Biz istəyirik ki, insanlığa qarşı cinayət törədənlər öz layiqli cəzalarını çəksinlər. Biz istəyirik ki, uşaq qatilləri, əlləri qadın, qoca qanına batmış cinayətkarlar əməllərinə görə cavab versinlər».

Ə.Əhmədov Azərbaycan gəncliyini Xocalı faciəsini unutmamağa çağırdı. O qeyd etdi ki, gənclik bu faciə haqqında əsl həqiqətlərin dünya ictimaiyyətinə çatdırılması işini də yorulmadan davam etdirməlidir. YAP sədrinin müavini bunun üçün iki səbəbin olduğunu dedi. Onun sözlərinə görə, gənclər bu işi ilk növbədə Xocalı şəhidlərinin qanlarının yerdə qalmaması naminə etməlidirlər. Digər tərəfdən, dünyada bundan sonra da bu cür ağır cinayətlərin baş verməməsi üçün Xocalı faciəsi barədə həqiqətlər dünyaya çatdırılmalıdır: «Mən ümid edirəm ki, siz gənclər bəşəriyyətin Xocalı faciəsinə biganə münasibətini sındıracaqsınız. Əgər buna nail olarsınızsa, insanlığa böyük bir töhfə vermiş olacaqsınız».

Çıxışının sonunda Ə.Əhmədov tədbirdə iştirak edən diplomatik korpusların təmsilçilərinə müraciət etdi. O, diplomatlara tədbirdə iştiraklarına görə təşəkkürünü bildirdi və onların bu tədbirdə iştirakının beynəlxalq təşkilatların Xocalı faciəsi ilə bağlı mövqeyinə müsbət təsir edəcəyini ümidvar olduğunu dedi. Onun sözlərinə görə, hər bir sülhpərvər bəşər övladı milliyyətindən və hansı dövləti təmsil etməsindən asılı olmayaraq insanlığa qarşı törədilən cinayətlərə eyni mövqedən yanaşmalıdır. Yalnız belə olarsa, bəşəriyyət gələcəkdə də bu cür qətliamlardan sığortalana bilər. Ə.Əhmədov tədbirdə iştirak edən diplomatları Xocalı qətliamı ilə bağlı fəaliyyətə səslədi: «Mən ümid edirəm ki, siz təkcə dinləyici olmayıb bu faciəyə beynəlxalq təşkilatların həqiqi qiymətini verməsi üçün real işlər görəcəksiniz».

Tədbirdə Heydər Əliyev Fondu tərəfindən Xocalı faciəsi ilə bağlı çəkilmiş sənədli film də nümayiş etdirildi.

İlham QULİYEV

Kaspi.- 2011.-24 fevral.- S. 9.