Ruhumuzun doğması

Flora Kərimovanın səsi, ifası Azərbaycan musiqisinin təkrarsız-bənzərsiz səhifəsidir

Ürəyimiz qüssədən, gözlərimiz həsrətdən göynəyəndə, sinəmiz sevincimizə darlıq edəndə bir nisgilli, lirik, şux nəğməyə ehtiyac duyuruq. Həmin an əhvalımıza şərik olan, bizi tənhalıq möhnətindən, təklik sınağından qurtaran musiqiçilərə, müğənnilərə, xanəndələrə minnətdar olmaq istəyirik. Qürbətdə olanların yanğısına su çiləyən, bizi duyğularımızla bağ-başa qoyan bir çox mahnıları zaman-zaman onun ifasında dinləmişik. “Necə unudum səni” harayını, “Bağışla” fəryadını, “Mən səni sevmişəm səndən xəbərsiz” gileyini, “Qurtar məni bu əzabdan, İlahi” naləsini, “Əzizim”, “Yalvarıram” hıçqırıqlarını eşidən kimi, “Ey Vətən” məhəbbətini, “Bakı gecələri” sevgisini duyan kimi istər-istəməz pıçıldamışıq: Flora Kərimovadı. Bu səs ruhumuzun doğmasıdı.

Professional, işgüzar, zəhmətkeş

Flora Kərimovanın səsi, ifası Azərbaycan musiqisinin təkrarsız-bənzərsiz səhifəsidir. O, ilahi səs sahibidir. Onun ilahi musiqi duyumu var. O, peşəkardır, işgüzardır, zəhmətkeşdir. Səhnəyə elə ilk addımı ilə «Dan ulduzu» kimi parlayıb Flora Kərimova. Gəlişi ilə Azərbaycan estradasına milli ruh gətirib. Öz qəlbinin hərarəti ilə estradamızı canlandırıb, ona yeni həyat verib. Nə yaxşı ki, zəmanənin bitib-tükənməyən qayğıları, illərin soyuq əsintiləri onun qəlbinin hərarətini zərrəcə azaltmayıb. Əksinə, Flora Kərimova eynən günəş kimi qəlbinin hərarətindən sənətə, pərəstişkarlarına pay ayırıb. Tələbkar, zövqlü auditoriya qarşısında öz imicini qoruyub saxlaya bilmək hər kəsə nəsib olan səadət deyil.

Flora Kərimovanın sənətkar səadətinin kökündə heç şübhəsiz ki, ilahi vergisi olan SƏSİ dayanır. Müğənni üçün zəruri olan fiziki parametrləri-oktavası, tembri bir yana, Floranın səsində zirvələrin fövqündə dayanan bir məlahətlilik, qeyri-adi sayıla biləcək bir cazibədarlıq var. O səs təkcə dinləyicinin ruhuna süzülmür, o səs dinləyicini zərrə-zərrə özünə hopdurur. Onun səsi dinləyicini dünyanın cazibə qüvvəsindən qopararaq özünə tabe etdirir. Hələ 50 il bundan əvvəl Bəxtiyar Vahabzadə demişdi ki, bu cür səs bir də dünyaya gəlməyəcək. Doğrudan da bu səsin oxşarı yoxdur. “Hərdən məndə irad tuturlar ki, sən tələbələrin inkişaf etməsini istəmirsən. Mən musiqi kollecinə girəndə artıq səsim var idi və onu cilovlamaq üçün kollecə daxil olmuşdum. Ancaq indi öz səsimə, tempimə uyğun hansı səsi götürüm ki, onun üzərində işləyim? Axı bir səsdə dörd çaların cəmlənməsi yoxdur”.

Yaşadığım illər

Bu günlərdə Flora Kərimovanın 70 yaşı tamam olub. “Yaşadığım bu illər, bu ömür mənim qazancımdır. O qazanc insanı kədərləndirirmi, sevindirirmi, o ayrı söhbətdir. Mən bu hissi yaşamadım... Demirəm, ölümdən qorxmuram, ancaq yoxluğumu, o anın qorxusunu yaşamadım. Ona görə yox ki, həyatdan bezmişəm, sadəcə, bu, qaçılmaz qismətdir”- deyir Flora xanım. Həm də deyir ki, bugünkü xoşbəxt anında özünü yaşından çox gənc hiss edir. “Kənardan baxanda heç vaxt öz yaşımı verməyiblər. Ancaq cavanlığın yüngüllüyünü də duymuram. Mən həyatı görmüş, həyata dəyər vermiş, həyatın keşməkeşindən keçmiş, həyatdan yorulmuş bir insanam, ancaq heç zaman həyata acgöz münasibətim olmayıb. Mən həyatı dəyərləndirmirəm ki, Allaha yalvarım və əcəllə mübarizə aparım”.

Realist insan

Flora xanım hər şeyə qarşı real insandır. Nə optimistdir, nə də pessimist. Sadəcə realistdir. “Yaxşılarımı, sevinclərimi bundan sonra itirmək qorxusu olan bir realistəm”. Onu yaxından tanıyanlar da deyirlər ki, xaraktercə stabil insandır, həm mərd dostdur, həm də mərd düşmən. “Mənim həyat prinsiplərimə insanı satmamaq, hərdəmxəyallıq etməmək daxildir”.

Flora xanım xoşbəxt sənətkardır. Səsi ilə xoşbəxtdir. Onu sevən, sayı-hesabı bilinməyən pərəstişkarları ilə xoşbəxtdir. Özü də deyir ki, sənətkar kimi ancaq səsi ilə xoşbəxtdir, qisməti ilə yox... “Mən hər zaman xoşbəxtlik sözündən qaçmışam. Səsimin varlığı ilə xoşbəxtəm. Allah tərəfindən mənə səs bəxş edilməsi bəlkə xoşbəxtlikdi, ancaq mənə çox əziyyət verdi. Allah xoşbəxtlik gətirmir, Allah sevinc, məmnunluq, hardasa gələcəyə ümid gətirir. Allahdan arzum budur ki, nə qədər ömür verirsə, ləyaqətli versin, ömrümə ləyaqətsizlik yazmasın. Mənə bəxş etdiyi bu qürurla da bu dünyadan köçürsün...”

Təranə Məhərrəmova

Kaspi.- 2011.- 26 iyul.- S. 11.