Fərqanə Qasımova atası haqqında namizədlik işi müdafiə etməyə hazırlaşır

Əməkdar artist Fərqanə Qasımova elmi iş üzərində çalışır. İfaçının “Azadinform”a verdiyi məlumata görə, Milli Konservatoriyanın aspirantı olan müğənni atası – Xalq artisti Alim Qasımov haqqında namizədlik işi müdafiə etməyə hazırlaşır: “Əlbəttə ki, yaradıcılığımı daha da təməlli etmək, elmimi artırmaq məqsədilə aspiranturaya daxil oldum.

Azərbaycan üçün daha böyük işlər görmək üçün bu məsuliyyətin altına girdim. Ancaq elmi işim Alim Qasımov haqqında olduğu üçün buna da ayrı bir vaxt tapmaq lazımdır. Lakin indi körpə uşaqlarla və öz şəxsi işlərimlə əlaqədar olaraq çox az vaxt tapıram, bu proses yavaş-yavaş gedir.” Muğam ifaçısının sözlərinə görə, Alim Qasımov haqqında olan elmi iş kitab formasında da çap ediləcək. Nəşrdə Xalq artistinin həyat və yaradıcılığının ən maraqlı məqamları, eləcə də onların elmi təfsilatı yer alacaq: “Kitab Alim Qasımovun improvizasiyaları, onun sənəti və yaradıcılığı haqqındadır. Artıq 2 ildir Milli Konservatoriyada bu işə başlamışam və elmi rəhbərim Sevil Fərhadovadır. Muğamı gözəl bilən elmli bir xanımdır. Onun köməyi ilə Allah qoysa yazacam. Bitirmək mənim boynumdadır, məndən asılıdır. Bu elmi iş üçün Alim müəllimlə tez-tez, çox ünsiyyətdə olmuram. Çünki onun sənətə gəlişindən indiyədək hamısını izləmişəm. Bizim evdə arxiv var - qəzetlər, jurnallar, canlı olaraq isə anam, babamla söhbətlər edirəm, məsləhətlər və məlumat alıram. Ona görə Alim müəllimi çox narahat etmirəm. Ondan hələ heç nə soruşmamışam, özü haqqında elmi işin necə getdiyindən xəbəri yoxdur”.

Kaspi.-2011.-3 noyabr.-S.16.