Müstəqilliyimizin 20-ci ildönümü Şimali Kiprdə də qeyd edilib

Şimali Kipr Türk Cümhuriyyətində yerləşən Doğu Akdeniz Universitetində, eyniadlı universitetin təşkilatçılığı ilə Azərbaycanın dövlət müstəqilliyinin 20-ci ildönümü münasibətilə konsert keçirilib.

Konsert Azərbaycan Respublikasının və Türk Cümhuriyyətinin dövlət himni ilə açıq elan edilib. Bundan sonra Şimali Kipr Türk Cümhuriyyətində fəaliyyət göstərən və ölkəmizi təmsil edən “Buta” rəqs qrupunun iştirakı ilə Azərbaycan rəqsləri “Sarı gəlin” və “Nəlbəki” nümayiş etdirilib. Rəqs tədbir iştirakçılarının böyük marağına səbəb olub və alqışlarla qarşılanıb. Bu barədə qəzetimizə həmin universitetin tələbəsi Cəfər Mənsimli məlumat verib. Tədbirdə Azərbaycanın tarixi və mədəniyyətindən bəhs edən slayd-şou dan sonra universitetin rektoru professor Abdullah Öztoprak və onun müavini Məcid Haşhemipour Azərbaycan xalqını dövlət müstəqilliyinin 20-ci ildönümü münasibətilə təbrik ediblər.

Konsertdə DAU-da təhsil alan 480 azərbaycanlı tələbə və universitetin müəllim və professor heyətilə yanaşı, Azərbaycandan Bakı şəhər Baş Təhsil İdarəsinin rəis müavinləri, ölkəmizin ən qabaqcıl olan 28 məktəbinin direktorları iştirak edib.

Sonda Tələbə Qəbulu Dövlət Komissiyasının keçirdiyi qəbul imtahanlarında 600-dən yüksək bal toplayıb və bu universitetdə təhsil almaq imkanı qazanan 20 tələbəyə DAU tərəfindən xüsusi mükafatlar təqdim olunub.

Daha sonra tədbir konsert proqramı ilə davam etdirilib. Konsertdə respublikamızın əməkdar artisti Tünzalə Ağayeva və ölkəmizi “Evrovizion 2010” müsabiqəsində təmsil edən müğənni Safura Əlizadə çıxış edib.

Elgün

Kaspi.-2011.-20 oktyabr.-S.8.