Filmlərimiz “Altun Portağal”da

Aynur Əsgərova: “Bu festival bizim üçün çox böyük ənənəylə tanışlığa və ilkin təcrübəyə əlverişli təkan oldu”

Son zamanlar kinomuzun təbliği sahəsində aparılan işlərdə aktivlik nəzərəçarpacaq dərəcədə artıb. Belə ki, son aylarda rejissorlarımız Rusiyada, ABŞ-da, İrlandiyada və s. ölkələrdə keçirilən çoxsaylı festivallara qatılaraq uğurlara imza atıblar. Ölkəmizin təmsil olunduğu bu cür beynəlxalq festivallardan biri də “Atlun Portağal”dır.

Xatırladaq ki, bu festival Türkiyənin ən ciddi kino festivalı olduğuna görə başqa ölkələrin kinorejissorları çalışırlar ki, həmin festivalda iştirak eləsinlər. Filmlərin çoxluğuna və janr rəngarəngliyinə görə hər il “Altun Portağal” film festivalında iştirak edən filmlərin sayı gözləniləndən də artıq olur. Bu festivalın dünya əhəmiyyətli olmasını təsdiqləyən bir nüans da var: Bu festivalda yer qazanmış filmlərə Avropa kino festivallarında da xüsusi dəyər verilir. Bu il isə Azərbaycan filmləri həmin festivalın iştirakçısı olub. Tədbirdə ölkəmizi Mədəniyyət və Turizm Nazirliyinin Kinematoqrafiya şöbəsinin kinoların təbliği və reystrı üzrə aparıcı məsləhətçisi Aynur Əsgərova, rejissorlardan Samir Kərimov, Yavər Rzayev və İlqar Safat təmsil ediblər.

“Altun Portağal” festivalının “Avrasiya Sineması” bölümündə Azərbaycan kinematoqrafçılarının son illərdə istehsal etdiyi beş bədii film – “Niyyət”, “Buta”, “Aktrisa”, “İlahi məxluq”, “Sahə” və “Əlvida, cənub şəhəri” nümayiş etdirilib. Filmlər əsasən gündüz və axşam seanslarında nümayiş etdirilib. Filmlərin rejissorları hələlik ölkəmizdə olmadığından, Aynur Əsgərova ilə əlaqə saxladıq və festival haqqında təəssüratlarını öyrəndik: “Yəqin bilməmiş deyilsiniz ki, “Altun Portağal” Türkiyənin ən say-seçmə film festivallarından biri, bəlkə də birincisidir. Həmin festivalda yer tutan filmlərin necə məşhur olduğunu çoxları yaxşı bilir. Sevindirici haldır ki, Azərbaycan da həmin festivala qatıldı. Bizim filmlərimizin festivalda iştirakı “Avrasiya Sineması” bölümünün layihəsi ilə reallaşdı. Bu layihə əsasında festivalda ötən il Gürcüstan iştirak etmişdi, gələn il isə Qazaxıstan iştirak edəcək. Onu da qeyd edim ki, festivalda TÜRKSOY-a üzv ölkələrdən ilk olaraq məhz Azərbaycan belə bir proqramla təmsil olunub. Filmlərin nümayişindən sonra Antalya şəhər bələdiyyəsinin sədri və festivalın rəhbəri Mustafa Akaydının da iştirak etdiyi mətbuat konfransı keçirildi və Azərbaycan filmləri bir-bir təhlil olundu, geniş müzakirəyə səbəb oldu. Deməliyəm ki, bu festival təkcə Azərbaycan və Türkiyə üçün yox, həm də dünya üçün maraqlıdır. Festivala xeyli sayda xarici ölkə telekanalları da qatılmışdı, milli televiziyalarımızdan isə AzTV çəkiliş aparırdı. Mətbuat konfransından sonra iştirakçılara son illərdə çəkilmiş filmlərimiz barədə bukletlər, DVD disklər, mədəniyyət və turizm mövzularında müxtəlif tipli materiallar təqdim elədik. Bu festival bizim üçün çox böyük ənənəylə tanışlığa və ilkin təcrübəyə əlverişli təkan oldu”.

Qeyd edək ki, ölkəmiz “Altun Portağal”dan başqa bir festivala da qatılıb. Belə ki, hazırda Tacikistanın paytaxtı Düşənbə şəhərində ölkəmizin Tacikistandakı səfirliyinin təşəbbüsü ilə “Baktriya” Beynəlxalq Mədəniyyət Mərkəzində (BMM) Azərbaycanın müstəqilliyinin 20 illiyinə həsr olunmuş Azərbaycan kino həftəsi keçirilir. Azərbaycan kinosu həftəsi çərçivəsində “Mənim vətənim Azərbaycan”, “Azərbaycan motivləri”, “Bakı sitadelində gəzərkən”, “Qobustan”, “Hər şey yaxşılığa doğru”, “Azərbaycan diplomatiyasının 90-cı ildönümü” və ”Sarı gəlin” filmləri ingilis dilində subtitrlərlə nümayiş olunacaq.

Bütün bu festivallarda iştirak etmək üçün dövlətin ayırdığı maliyyə dəstəyi də ciddi amillərdəndir. Maliyyə məsələlərinin həll edilməsi sənətkarlarımıza ciddi yaradıcılıq imkanları yaradır. Bütün bu yaradılan imkanlardan sonra rejissorlara və aktyorlara bircə yeni ekran əsərləri düşünmək və yaratmaq qalır.

Fərid Hüseyn

Kaspi.-2011.-20 oktyabr.-S.16.