Xalq şairi Hüseyn Arifin “Seçilmiş əsərləri” çap olundu

Sentyabrın 2-də, Xalq Bankın mərkəzi ofisində bankın təqdim etdiyi Xalq Əmanəti layihəsi çərçivəsində növbəti kitabın, Xalq şairi Hüseyn Arifin “Seçilmiş əsərləri”nin təqdimat mərasimi keçirilib.

Ziyalıların, ictimaiyyət nümayəndələrinin və KİV təmsilçilərinin iştirak etdikləri tədbiri Azərbaycan Milli Elmlər Akademiyasının müxbir üzvü, Milli Məclisin mədəniyyət komitəsinin sədri, professor Nizami Cəfərov açaraq Hüseyn Arifin yaradıcılığı haqqında məlumat verib. Bildirib ki, “Xalq Bank”ın maliyyə dəstəyi ilə nəşr olunmuş bu kitab Azərbaycan mədəniyyətinə bir töhfədir.

Tədbirdə Tələbə Qəbulu üzrə Dövlət Komissiyasının sədri Məleykə Abbaszadə Hüseyn Arif ailəsinin yaxını kimi “Seçilmiş əsərləri”n yenidən nəşrinə görə “Xalq Bank”a təşəkkürünü bildirib, şairin ölməz əsərlərinin xalqın qəlbində həmişə yaşayacağını söyləyib.

Xalq Şairi Nəriman Həsənzadə, Prezident təqaüdçüsü, şair İlyas Tapdıq və başqaları Hüseyn Ariflə bağlı xatirələrini bölüşüblər.

Tədbirdə şairin şerlərindən nümunələr söylənilib.

Xatırladaq ki, 2010-cu ildən başlamış “Xalq əmanəti” layihəsi çərçivəsində Azərbaycanın Xalq Rəssamı Böyükağa Mirzəzadə, Xalq Şairi Məmməd Araz və Xalq Rəssamı Maral Rəhmanzadənin həyat və yaradıcılığı haqqında nəşr olunmuş kitablar geniş oxucu auditoriyası tərəfindən rəğbətlə qarşılanıb.

“Xalq əmanəti” seriyasından olan kitablar ölkənin ali və orta təhsil müəssisələrinə, uşaq evləri və kitabxanalara, müxtəlif fondlara, dövlət müəssisələrinə, Azərbaycandakı diplomatik nümayəndəliklərə və s. hədiyyə olunur.

KİTAB HAQQINDA

Nəşrin tərtibçisi və redaktoru Səlim Babullaoğlu, məsləhətçi, şairin qızı Zöhrə Hüseynzadə, bədii tərtibatçi Novruz Novruzovdur. Bu Xalq Əmanəti layihəsi çərçivəsində Xalq Bankın nəşr etdiyi dördüncü kitabdır. Kitab 618 səhifədir, nəfis tərtibatlı və poliqrafiya ilə 5000 nüsxədə hədiyyəlik olaraq çap edilib, geniş oxucu kütləsi üçün nəzərdə tutulub.

Xalq şairi Hüseyn Arifin “Seçilmiş əsərləri” kitaba “Ön söz” olaraq verilən, bir vaxtlar Xalq yazıçısı İsmayıl Şıxlının yazdığı “Elə bağlı sənətkar” yazısı ilə açılır, şairin yaradıcılığı həm böyük ədibin peşəkar yazısı ilə təhlil edilir, həm də bir vaxtlar dost olmuş, bir-birini yaxından tanıyan sənətkarlardan birinin digəri haqqında isti, səmimi müşahidələri ilə sanki bütövləşir, tamamlanır. İsmayıl Şıxlı yazır: “Hüseyn Arif xalq məhəbbəti qazanmış şairdir. Bunun əsas sirri odur ki, o oxucuların qəlbinə, zehninə yol tapa bilmişdir. Şeirləri dillər əzbəri olmuşdur. Azərbaycanın elə bir guşəsi yoxdur ki, orada şairin sözlərini sinədən söyləməsinlər… Onun şeirləri canlıdır, obrazlı təfəkkürün, fəlsəfi anlayışların məhsuludur. Bu cür yaradıcılıq qəlblərdə yaşayır…”

“Seçilmiş əsərlər” “Vətən”, “Təbiət”, “Oğlum Arifə”, “İthaflar”, “ Gözəllik, sevgi”, “Satirik”, “Saz” və “Duyğulu düşüncələr” kimi bölümlərdən ibarətdir. Hər bölümün sonunda müəllifin irihəcmli poetik əsərləri, poemaları təqdim olunmuşdur.

Kitabın “redaktordan” başlıqlı yazısında seçim və tərtib prinsipləri haqda bu sözlər yazılıb: “Kitaba daxil edilmiş əsərləri şeir, poema, qoşma, bayatı, dastan və sairə kimi formal keyfiyyətlərinə görə də təsnifləşdirmək olardı, amma biz kitabın tərtibində bəlkə də “Seçilmiş əsərlər” kimi məlum tipologiyanın ən çətin versiyasını seçdik: xalqın yaddaşında həmişəyaşar və diri olan Hüseyn Arif şeirlərini mövzularına görə ayırdıq və sıraladıq. Niyə? Yəqin ona görə ki, xalq heç vaxt xatırlayanda janr və formaya ayıraraq xatırlamır. Onun içini Vətən həsrəti üzürsə, o saat, həmin dəqiqə yaddaşının dərinliyindən Vətənlə bağlı bir şeir tapıb çıxardır və onu yanıqlı səsi ilə oxuyur …”

Kitabın sonunda şairin bioqrafiyasının əsas məqamları da verilib. Bu da isə nəzəri, təhlili yazılarla birlikdə şair haqqında olan məlumatları tamamlayır, kitabı təkcə poeziyasevər oxuyucular üçün deyil, tədqiqatçılar üçün də maraqlı edir.

Kitabdakı bir qeyd diqqət çəkir: “Hər şeyin sözlə və sözlü olduğu dünyada bizim ən böyük borclarımız eyni zamanda və daha çox söz qarşısındadır: Allah və “Allah” sözü qarşısında, Vətən və “vətən” sözü qarşısında, Ata-ana və “ata”, “ana” kəlmələri qarşısındadır. Bu borcu qaytarmaq işində qələm adamlarının çiyninə bir ayrı ağır yük düşürsə də, xalq əmanəti olan həqiqi şair sözünü kitablaşdırıb xalqa qaytarmağa şairlərin gücü çatmaz. Xalq Əmanəti layihəsi elə bunun üçündür. O borcu, o əmanəti qaytramaq üçündür”.

Kaspi.- 2011.- 3-5 sentyabr.- S. 18.