“Gərək belə şeylərə fikir verərdim”

Cavid Hüseynov yığmanın oyunlarının klub karyerasına mənfi təsir etdiyini deyir

Türkiyənin “Adana Dəmirspor” klubunun və Azərbaycan millisinin futbolçusu Cavid Hüseynovun apasport.az saytına müsahibəsi

- Komandada işləriniz necədir?

- Nə pis, nə də yaxşı.

- Çempionatda qısa fasilə olsa da, Bakıya gəlmişdiniz. Səbəb nə idi?

- İcazə almışdım. Bakıda cəmi 1 gün qaldım. Anamla görüşməyə gəlmişdim. Ailəm Adanadadır. Türkiyədə çempionat tez başlayır. Artıq yanvarın 20-də oyunumuz var.

- Ötən ay millidən qayıdandan sonra əsas heyətdə yerinizi itirib, sonradan meydana çıxırsınız. Vəziyyətin heç də yaxşı olmadığını düşünürsünüz?

- Əsas heyətdə oynamamağım təsir edir. 4-5 dəfə start heyətində oldum, sonradan millinin oyunları başladı. Yığmaya gedəndə, burda çempionat dayanmır. Yəqin ki, bunları çox demişəm və təkrar bildirirəm. Klubuma qayıdıram və orada 4 oyun milliyə görə buraxmışam. Üstəlik, oyuna 2 gün qalmış gəlirəm. Baş məşqçi deyir ki, sən indi gəlmisən, ancaq o biri futbolçular 1 həftədir burdadırlar, mən səni necə buraxım? Elə oldu ki, mənim mövqeyində yer alan futbolçunun oyunu uğurlu alındı. Komandamız 5 oyun dalbadal qələbə qazandı. Buna görə də mən əsas heyətdə yerimi itirdim.

- Klubla yığmanın oyunlarının üst-üstə düşməyəcəyini gözləmək olardı. Çünki dünyanın hər yerində yüksək liqadan fərqli, aşağı divizionda oyunlar yığmanın matçları zamanı dayanmır...

- Sözün düzü, bunu bilmirdim. Baxıram ki, gərək belə şeylərə fikir verərdim. Ancaq bir şey də var ki, bir müddət millidə oynamadım və bura gələndən sonra məni yığmaya çağırdılar.

- Yəni Türkiyəyə getməyinizdə yaxşı cəhətlər də oldu...

- Bəli. Milliyə qayıtdım, 2 görüşdə oynadım. Bu, yaxşı oldu və yığmanı da qeyd etmək lazımdır. Pis odur ki, aşağı divizionda çempionat dayanmadığı üçün klubumda yerimi itirdim. Ancaq belə götürəndə, vəziyyət normaldır, həyatımı yaşayıram. Bu işdə heç bir problem görmürəm.

- Futbolçu üçün klub karyerası çox vacibdir. Ən azı ona görə, ilin çox hissəsini yığmada yoxsa, klubda keçirirsiniz. Bu mənada “Adana Dəmirspor”un əsas heyətində möhkəmlənmək üçün bir müddət yığmaya çağırılmamağınla bağlı müraciət etməyi düşünürsünüz?

- Yox. Mən onunla da razı deyiləm ki, yığmanı bir kənara qoyum. Mən bu edə bilmərəm. Çünki milli ilə klubun hərəsinin öz yeri var. Düzdür, klub da vacibdir. Bu, olmasa, milli də yoxdur, səni ora çağırmırlar. Ancaq bizim işimiz odur ki, bu ikisini bir yerdə aparaq. Ancaq burda milliyə görə oyunların dayanmadığını gərək klub da fikirləşəydi. Çünki onlar məni millinin futbolçusu kimi almışdılar.

- Millinin futbolçusu hazır sayıldığından, oyuna 1 gün qabaq gəlsə belə, əsas heyətdə qoymaq olar...

- Bunu klubumdakılar fikirləşməlidir. Məni nə qədər pula alırlar, ancaq istifadə edə bilmirlər. Bu, nə mənə, nə də onlara xeyirdir. Hazırda olan durum heç kimə xeyir deyil.

- Bəlkə bununla bağlı baş məşqçiniz, yaxud klub rəsmilərindən kiminləsə danışasınız?

- Baş məşqçiyə oynamaq istədiyimi demişəm. Belə olmaz, mən bununla razılaşmıram. Soruşmuşam ki, sizin fikriniz nədir, haqqımda nə düşünürsünüz? O da cavab verdi ki, hələ tezdir, bu haqda danışarıq. Ancaq bundan sonra danışmadıq. Yəqin ki, bu günlərdə söhbətləşərəm.

- Qış fasiləsi “transfer pəncərəsi” açılan dövr olduğundan, klubunuzu dəyişməyə imkan yaranır. Bundan istifadə etmək fikrindəsiniz?

- Mən indidən sizə heç bir şey deyə bilmərəm.

- İndiki vəziyyətdə ən optimal variant yüksək liqa təmsilçisinə keçməyinizdir. Hələ Şimali İrlandiya ilə oyundan qayıdarkən Belfastdakı hava limanında sizinlə bu haqda söhbətimiz olmuşdu...

- Düzdür. Mən yüksək liqada oynamaq istəyirəm. Ancaq gərək ora çağırsınlar, istəsinlər də. İstəmədikləri halda, mən necə yüksək liqada oynaya bilərəm?

- Bəs Azərbaycan Premyer Liqasında oynamaq variantı necə? Bəlkə bunu geriyə addım saydığınızdan, dəyərləndirmək istəmirsiniz?

- Azərbaycana qayıtmağı geriyə addım saymıram. Niyə ki? Belə söhbət ola bilməz. Bizim çempionat da inkişafdadır. Məsələn, bizim yüksək liqa təmsilçiləri Türkiyənin I divizionunda yüz faiz çempion ola bilərlər. Buna görə də öz çempionatımızı aşağı saymıram. “Neftçi” gedib kimlərlə oynayır. Bizim vaxtda yayda, qışda təlim-məşq toplanışında “Beşiktaş”, “Antalyaspor”u görmüşük. Çempionatımız zəif deyil, əksinə, güclüdür. Sadəcə, bizdə meydançaların vəziyyəti pisdir və oyunlarda azarkeş yoxdur. Buna görə sürəti “öldürürlər”, futbolu aşağı səviyyəyə salırlar. Belə hiss etsən də, belə deyil. Sadəcə, dediyim 2 problem yoluna qoyulsa, bizdə də səviyyə yüksək olar.

- Öz klublarımızdan sizinlə maraqlanan var?

- Bəli, təklifim var. Ancaq heç nə demək istəmirəm.

- Klubla hələ il yarımlıq müqaviləniz var. Bizim komandalar isə daha çox sərbəst futbolçuları almaqda maraqlıdır. Ortada təzminatın olmağı keçidinizə problem yaratmayacaq?

- Mən burda sərbəst futbolçu statusunu alacağam. Müqavilədə bəzi şərtlər yazmışam ki, bu, mənə sərf edir.

- Bilmək olar hansı şərtlərdir?

- (gülür) Onu demək istəmirəm, sonra danışarıq.

- Bəlkə sizə borcun olmağı sərbəst getməkdə işinizə yarayacaq?

- Bu da var. FİFA-nın qanununa görə, neçə ay əmək haqqı almayanda, avtomatik sərbəst olur. Sadəcə, hələ gözləyirəm.

- Yeri gəlmişkən, borcla bağlı vəziyyət nə yerdədir?

- Pullarda sıxıntımız yoxdur, normal almışıq. Az məbləğ qalıb.

Kaspi.-2012.-27 dekabr.-S.14.