Ov da var, ovçu da, amma...

Azərbaycanda turizmin bu növü üçün böyük potensial olsa da, problemlər də az deyil

Hazırda dünyada insanların həddindən artıq marağını cəlb edən turizm növlərindən biri də ovçuluq turizmidir. Azərbaycanda bütün turizm növləri kimi, ovçuluğun inkişafı üçün də potensial imkanlar mövcuddur. Mütəxəssislərin fikrincə, ölkəmizin ərazisi ovçuluq turizmindən külli miqdarda gəlir götürmək üçün münbit imkanlara malik olsa da, bu potensialdan lazımi qədər istifadə olunmur.

“Quş qripi” ovçuluğa zərbə vurub

Ovçular və Balıqçılar Cəmiyyətinin üzvü, ovçuluq üzrə mütəxəssis Mahir Hümbətovun sözlərinə görə, ovçuluq turizminin Azərbaycanda çox geniş coğrafiyası var. Ölkəmizdə həm düzənlik, həm də dağlıq ərazilər var ki, orada bu turizm növünün inkişafı mümkündür: “Bundan əlavə, Azərbaycanın bir tərəfi Xəzər dənizidir, ölkə ərazisində çoxlu sayda xırda göllər var. Su-bataqlıq ərazilərdə yaşayan müxtəlif növ quşlar, balıqlar buranı ov həvəskarları üçün münbit məkana çevirir. Amma 5-6 ildir ki, Azərbaycanda quş ovu qadağandır. Bunun da əsas səbəbi kimi ölkəmizdə “Quş qripi” virusunun tapılması göstərilir. Artıq son illər bu problem öz aktuallığını itirsə də, təəssüflər olsun ki, həmin qadağa hələ də götürülməyib”.

Mütəxəssisin fikrincə, ov həvəskarları üçün nə qədər münbit şərait yaradılarsa, bu turizm növünün inkişafına bir o qədər böyük zəmin yaranar. Çünki ovçuluqla təkcə yerli insanlarımız deyil, ölkəmizə səfərə gələn xarici vətəndaşlar da çox maraqlanırlar: “Bir neçə ilə əvvəl biz İmişlidə ovda olarkən orada İtaliyadan gələn çoxlu sayda ovçularla qarşılaşdıq. Onlar böyük həvəslə ov edirdilər. Bundan başqa, qardaş Türkiyədən gəlib Qəbələdə dağ heyvanları ovlayanlar da çoxdur».

Mütəxəssis deyir ki, sovet dövründə Azərbaycanda çoxlu sayda ovçuluq təsərrüfatları mövcud olub. Bu təsərrüfatların əraziləri və inzibati binaları isə hələ də qalır: «Lakin neçə illərdir həm ov qadağan olunduğu üçün, həm də bu sahəyə konkret olaraq yatırım qoyulmadığına görə həmin təsərrüfatlar müasir tələblərə cavab vermir. Ona görə də hər hansı xarici turist ovla məşğul olmaq istəsə, bir neçə problemlə qarşılaşmalı olacaq”. M.Hümbətovun sözlərinə görə, Azərbaycanın çox az yeri var ki, orada ovçuluğun inkişafı üçün potensial olmasın. O cümlədən Xəzər dənizi ilə sərhəd olan əksər rayonlarımızda, dağlıq rayonlarının demək olar ki, hamısında, həmçinin şimal və qərb bölgələrində, Mingəçevir ərazisində bu turizm növü ilə məşğul olmaq istəyənlər üçün də şərait var: “Bizdə olan bu potensialdan gələcəkdə lazımi səviyyədə istifadə edilməsi və mövcud maneələrin aradan qaldırılması Azərbaycana böyük sayda turist axınına səbəb ola bilər”.

Xarici ovçular Azərbaycana quş və dağ keçisi ovuna gəlirlər

Ovçular və Balıqçılar Cəmiyyətinin sədri Füzuli Əşrəfov artıq 5-6 ildir Azərbaycanda quş ovuna qadağa qoyulduğunu bildirir. Onun sözlərinə görə, bəzi heyvan növlərinin, o cümlədən dovşan, qaban və dağ keçisinin ovlanmasına icazə var ki, onun üçün də Ekologiya və Təbii Sərvətlər Nazirliyinin müvafiq departamenti tərəfindən lisenziya verilməlidir: “Amma bu lisenziyanı əldə etmək demək olar ki, mümkün deyil. Ümumiyyətlə götürdükdə isə, ovçuluqla maraqlananlar çoxdur. Turizm şirkətləri və ölkəmizə gələn bəzi xarici qonaqlar tərəfindən bizə tez-tez müraciətlər olur. Bundan əlavə, bizim cəmiyyətin 20 mindən artıq üzvü var. Bu faktın özü ölkəmizdə ovçuluğa olan marağın göstəricisidir”.

F.Əşrəfov Azərbaycanda ovçuluq turizminin əsas inkişaf edən növləri barədə də məlumat verərək bildirdi ki, respublikamızda quş və dağ keçisi ovu daha çox inkişaf edib: “Xarici ovçu turistlər Azərbaycana məhz quş və dağ keçisi ovuna gəlirlər. Ümumiyyətlə, istər yerli ovçular, istərsə də əcnəbi ovçular əsasən bu heyvanların ovlanmasında maraqlıdırlar”.

Heyvan ovu xüsusi qrafiklə tənzimlənir

Mədəniyyət və Turizm Nazirliyi Turizm şöbəsinin müdir müavini-daxili turizmin inkişafı sektorunun müdiri Mahir Qəhrəmanovun sözlərinə görə, Azərbaycanın təbii-coğrafi mövqeyi və zəngin tarixi burada turizmin bütün növlərinin inkişafı üçün əlverişli şərait yaradır: “Hazırda ovçuluq turizminin inkişafı üçün də ölkəmizdə kifayət qədər potensial var. Turizmin bu növü bütün dünyada çox gəlirli biznes kimi qəbul edilir. Azərbaycan ovçuluq turizminin potensialı baxımından yalnız Afrika ölkələri ilə müqayisə oluna bilər. Ölkəmiz ov həvəskarları üçün əsl cənnətdir desək, yanılmarıq. Çünki Azərbaycanda bir neçə min heyvan və quş növü məlumdur. Düzdür, bəzi heyvan və quşların ovlanması Azərbaycanın mövcud qanunları ilə qadağandır, bəzilərinə isə xüsusi lisenziya ilə icazə verilir”.

Ekologiya və Təbii Sərvətlər Nazirliyinin Bioloji Müxtəlifliyin Qorunması və Xüsusi Mühafizə Olunan Təbiət Ərazilərinin İnkişafı Departamentinin direktor müavini Hikmət Əlizadə Azərbaycanda hansı heyvanların nə zaman ovlanmasına icazə verilməsinin xüsusi qrafiklə tənzimləndiyini deyir. Təkə iyun-oktyabr, qaban (çöl donuzu) sentyabr-dekabr, dovşan dekabr-fevral, bataqlıq qunduzu (nutriya) oktyabr-fevral aylarında ovlana bilər. Çaqqal və yenotun sayının tənzimlənməsi məqsədilə onların ilboyu ovlanmasına icazə verilir. Quş ovuna isə “quş qripi” ilə əlaqədar hələlik qadağa qoyulub.

Kaspi.-2012.-7 fevral.- S.11.