Möhtəşəm musiqi bayramı start götürdü

Xalq artisti Fərhad Bədəlbəyli IV Beynəlxalq Musiqi Festivalının proqramının çox zəngin olduğunu deyir

Azərbaycanda növbəti möhtəşəm incəsənət bayramı - Qəbələ IV Beynəlxalq Musiqi Festivalı start götürüb. Heydər Əliyev Fondunun təşkilatçılığı ilə keçirilən festival dünya musiqiçilərinin diqqətini ölkəmizə yönəldib.

Festival iştirakçılarına təqdim olunan bukletdə Heydər Əliyev Fondunun prezidenti, UNESKO və İSESKO-nun xoşməramlı səfiri Mehriban Əliyevanın salamlama nitqi yer alıb. Birinci xanımın nitqində qeyd olunub ki, Azərbaycan son illər musiqi və incəsənət festivallarının, konfrans və sərgilərinin keçirildiyi məkan kimi tanınır: “Hörmətli festival iştirakçıları, qədim zamanlardan tolerantlıq ənənələrinin qorunub saxlandığı müxtəlif xalq və dinlərin nümayəndələrinin əsrlər boyu sülh içində yaşadığı, mədəniyyət və sivilizasiyalar arası təbliği və inkişafına daim öz töhfəsini verən Azərbaycanda fərəhləndirici haldır ki, müxtəlif mədəniyyətlərin qarşılıqlı zənginləşməsinə səbəb olan bu tədbirlər ildən-ilə daha böyük vüsət alır.

Cəmi bir neçə ay bundan əvvəl ölkəmiz Avropanın ən mötəbər yarışması olan “Eurovision-2012” mahnı müsabiqəsinə ev sahibliyi etdi və bu dəfə milliyyətindən, dinindən və siyasi baxışlarından asılı olmayaraq Bakıya toplaşan bütün insanları musiqi birləşdirdi.

2009-cu ildə Azərbaycanın gözəl guşələrindən biri olan Qəbələdə Beynəlxalq Musiqi Festivalının keçirilməsi ilə milli musiqi mədəniyyəti tarixində yeni ənənənin təməli qoyuldu. Beynəlxalq mədəni əlaqələrinin genişləndirilməsi, zəngin musiqi mədəniyyətimizin dünya ictimaiyyətinə çatdırılması, xalqlar arasında qarşılıqlı anlaşma və dostluğun möhkəmləndirilməsi işinə xidmət edən bu festival gözəl bir ənənəyə çevrilərək, öz beynəlxalq nüfuzunu ildən-ilə artırır. İnanıram ki, hər il olduğu kimi, bir çox dünya şöhrətli musiqi xadimlərinin iştirakı ilə keçirilən builki festival da unudulmaz musiqi bayramına çevriləcək və musiqi mədəniyyəti tariximizdə mənalı səhifələrdən biri kimi qalacaq”.

Müslüm Maqomayev sənətinin əzəməti

“Qafqaz Resorte” otelinin kamera zalında keçirilən ilk tədbir dünya şöhrətli musiqiçi, SSRİ xalq artisti Müslüm Maqomayevin 70 illik yubileyi ilə bağlı olub. Belə ki, əvvəlcə unudulmaz opera və estrada müğənnisi Müslüm Maqomayevin məşhur “Azərbaycan” mahnısı səsləndirilib.

Tədbirin təşkil olunduğu zalda quraşdırılan ekranda Müslüm Maqomayevin böyük fotosu nümayiş etdirilib. Həmin gün tədbirə toplaşanların sayı-hesabı olmayıb. Çoxsaylı tamaşaçıların ürəyi həmin gün Müslüm Maqomayevin şedevr musiqiləri ilə döyünüb.

Mərasimdə mədəniyyət və turizm naziri Əbülfəs Qarayev çıxış edərək dahi musiqiçi Müslüm Maqomayevin həyat və yaradıcılığından danışıb. Müslüm Maqomayev yaradıcılığının yüksəkliyindən və özəlliyindən söhbət açan nazir bu beynəlxalq musiqi festivalının keçirilməsi ilə bağlı irəli sürülən gözəl təşəbbüsə görə Azərbaycanın birinci xanımı, Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı Mehriban Əliyevaya dərin minnətdarlığını bildirib. Nazir bu gün hamının Qəbələyə gözəl səsi ilə hər bir kəsi sehrə salan dahi musiqiçi Müslüm Maqomayevin işığına toplaşdığını qeyd edib. O, bu cür festivallara hər zaman ehtiyac olduğunu vurğulayıb.

Müslüm Maqomayevin Azərbaycan musiqisinin dünyada tanıdılmasında məxsusi rolu olduğunu deyən Ə.Qarayev Müslüm Maqomayevin çox uca ifaçılıq məktəbinə məxsus olduğunu diqqətə çatdırıb: “İllər, əsrlər keçsə də, bu dahi musiqiçi heç bir zaman unudulmayacaq. Sübhəsiz, burada yubileyin keçirilməsi olduqca önəmlidir. Bu gün Müslüm Maqomayevin musiqisi bütün dünyanı riqqətə gətirir və hamı bu ecazkar səsi doymadan dinləyir. Bu məkana toplaşan insanların sayından da Müslüm Maqomayev sənətinin əzəməti hiss olunur”.

Görkəmli müğənninin həyat yoldaşı Tamara Snyavskaya Müslüm Maqomayevin adına təşkil olunan bu cür mərasimlərin onda qürur doğurduğunu söyləyib: “4 ildir ki, Müslüm Maqomayev həyatdan gedib. Onun adına təşkil olunan bu cür tədbirlər məni yaşadır. Mən hər birinizə, ən əsası da Müslümün xatirəsini hər zaman uca tutan Mehriban xanım Əliyevaya təşəkkür edirəm”.

Tamara Sinyavskaya ilk dəfə olaraq Qəbələdə olduğunu qeyd edib: “İlk dəfədir ki, Qəbələdəyəm və bura olduqca xoşuma gəldi. Heç zaman düşünməzdim ki, Azərbaycanda Qəbələ kimi gözəl guşə var. Müslüm özü bu yubiley konsertini görsəydi, əminəm ki, bu tədbirdən razı qalardı. Konsert yüksək səviyyəli təşkil edildi, olduqca mədəni və intellektli insanları cəmləşdiyi bir məkanda bütün ifaçılar əsərlərini ürəkdən və sevərək təqdim etdilər. Hər birinizə dərin hörmətlərimi və təşəkkürümü bildirirəm”.

T. Sinyavskaya onu da bildirib ki, həyatında ilk dəfə 1972-ci ildə Azərbaycana ayaq basıb və bu ilin oktyabrında bu tarixdən 40 il keçəcək: “Çox, lap çox, xoşbəxt yaşayın və bir-birinizi sevin. Mən sizləri sevirəm”.

Müslüm Maqomayevin 70 illik yubileyinə həsr edilən konsert məşhur rus bəstəkarı Sergey Raxmaninovun “Qəm etmə” və “Vokaliz” əsərləri ilə başlanıb. Daha sonra konsertdə R.Ştrausun “Serenada”, İ.Bramsın “Yasəmən çiçəklənəndə”, R. Şumanın “Fantaziştük”, Ü. Hacıbəylinin “Sevgili canan”, T. Quliyevin “Sənə də qalmaz”, M. Əhmədova və V.Mustafazadənin “Düşüncə”, S.Rüstəmovun “İntizar”, F.Bədəlbəylinin “Şuşa”, Q.Qarayevin və C.Hacıbəyovun “Vətən” operasından Mərdanın ariyası, M.Maqomayevin “Elegiya” əsərləri səsləndirilib.

Konsertdə Qəbələ IV Beynəlxalq Musiqi Festivalının bədii rəhbəri, Üzeyir Hacıbəyli adına Bakı Musiqi Akademiyasının rektoru, professor, “Şöhrət” ordenli Fərhad Bədəlbəylinin ABŞ və Rusiyanın dünya şöhrətli məşhur violonçel ifaçısı, “Yeni Rusiya” Dövlət Simfonik Orkestrinin dirijoru, festivalın bədii rəhbəri Dmitri Yablonskinin, Azərbaycan Dövlət Filarmoniyasının direktoru, Xalq artisti Murad Adıgözəlzadənin, tanınmış vokalçılar - Azərbaycan Dövlət Opera və Balet Teatrının solistləri Fəridə Məmmədovanın, Xalq artisti, Prezident təqaüdçüsü Əvəz Abdullayevin, Opera və Balet Teatrının və Ş.Məmmədova adına Opera Studiyasının solisti Səbinə Əsədovanın, Dövlət Akademik Opera və Balet Teatrının solisti, Bakı Musiqi Akademiyasının dosenti, Əməkdar artist, Prezident təqaüdçüsü Gülnaz İsmayılovanın ifasında klassik musiqilər alqışlarla qarşılanıb.

Yubiley konsertini izləyənlər arasında həmçinin Milli Məclisin deputatı Fəttah Heydərov, tanınmış musiqiçilər, dövlət və hökumət nümayəndələri, musiqisevərlər olub.

Musiqisevərlərə unudulmaz anlar

Qəbələ IV Beynəlxalq Musiqi Festivalının bədii rəhbərlərindən biri, Üzeyir Hacıbəyli adına Bakı Musiqi Akademiyasının rektoru, Xalq artisti Fərhad Bədəlbəyli builki festivalın proqramının çox zəngin olduğunu bildirib. Belə ki, festival çərçivəsində gündə iki dəfə rəngarəng konsertlər keçiriləcək və fərqli musiqi əsərləri səsləndiriləcək: “Ona görə də Qəbələ IV Beynəlxalq Musiqi Festivalı haqqında hələ çox danışılacaqdır”.

F.Bədəlbəyli konsertlərdə Rusiya, Böyük Britaniya, Polşa, Sloveniya, Fransa, ABŞ, İtaliya və İsveçrənin müasir ifaçılıq sənətinin zirvəsində duran dünya şöhrətli ustad sənətkarlar və məşhur kollektivlərin iştirak edəcəyini bildirib: “Festivalda simfonik və kamera konsertləri, muğam gecəsi musiqisevərlərə dünya musiqisinin zənginliyini bir daha musiqi kimi əsrarəngiz təbiətlə harmoniyada duymağa imkan verəcək”.

Bu il festivalın proqramında yubileylərə həsr olunmuş konsertlərin keçirilməsini xüsusi qeyd edən F.Bədəlbəyli bu sırada görkəmli müğənni Müslüm Maqomayevin 70 illiyinin, görkəmli bəstəkar, SSRİ Xalq artisti Fikrət Əmirovun 90 illiyinin və SSRİ Xalq artisti Niyazinin 100 illiyinin qeyd edilməsi ilə yeni bir ənənənin təməlinin qoyulduğunu qeyd edib. “Artıq dördüncü ildir ki, Azərbaycanın füsunkar guşələrindən biri olan Qəbələ ənənəvi beynəlxalq musiqi festivalına ev sahibliyi edir. Təbiətin bu qədim diyara bəxş etdiyi gözəllik və əzəmət, burada səslənən musiqinin parlaq bədii təsiri təqdim olunan ifaların mükəmməlliyi ilə qovuşaraq nadir, unudulmaz bir aura yaradır”. F.Bədəəlbəyli festival çərçivəsində daha bir maraqlı təqdimatın da keçiriləcəyini diqqətə çatdırıb. Onun sözlərinə görə, gənc, istedadlı azərbaycanlı pianoçu, Beynəlxalq Montrö caz müsabiqəsinin qalibi İsfar Sarabski həm də “Beltmann” piano şirkətinin əsas siması kimi təqdim olunacaq.

Festivalın bədii rəhbəri konsertlərin musiqisevərlərə unudulmaz anlar, təəssüratlar bəxş edəcəyinə ümid etdiyini vurğulayaraq Heydər Əliyev Fondunun möhtəşəm mədəniyyət layihələrindən biri kimi beynəlxalq aləmdə böyük əks-səda doğuran bu festivalın təkrarolunmaz simasının və dəst-xəttinin olduğunu qeyd edib.

Qəbələ IV Beynəlxalq Musiqi Festivalının bədii rəhbərlərindən biri, ABŞ və Rusiyanın dünya şöhrətli məşhur violonçel ifaçısı, “Yeni Rusiya”

Dövlət Simfonik Orkestrinin dirijoru Dmitri Yablonski AzərTAc-a müsahibəsində Qəbələ IV Beynəlxalq Musiqi Festivalının yüksək səviyyədə təşkil edildiyini bildirib. Onun sözlərinə görə, musiqisevərlər 13 gün davam edəcək festivalda bir çox dünya şöhrətli musiqi kollektivlərinin maraqlı konsert proqramından həzz almaq imkanı əldə edəcəklər. Məşhur dirijor qeyd edib ki, Qəbələ festivalı xarici qonaqlara Azərbaycan mədəniyyətini tanıtmaqla yanaşı, çoxsaylı yerli musiqisevərləri dünya bəstəkarlarının klassik əsərləri və məşhur musiqiçilərlə yaxından tanış edir: “Qəbələ festivalı çərçivəsində keçirilən konsertlərin hər birinin özünəməxsus gözəlliyi vardır. Buradakı bir konsert digərlərindən fərqlənir. Hər gün buraya Bakıdan, Qəbələdən və ətraf rayonlardan 1000-ə yaxın tamaşaçının, o cümlədən xarici vətəndaşların gəlməsi insanların bu festivala olan böyük marağından xəbər verir”.

Heydər Əliyev Fondu tərəfindən festivalın çox yüksək səviyyədə təşkil olunduğunu bildirən Dmitri Yablonski avqustun 5-dək davam edəcək bu incəsənət bayramında dünya şöhrətli musiqiçilərin çıxışlarının xoş anlar bəxş edəcəyini qeyd edib. Bu festivalın proqramının əvvəlkilərlə müqayisədə çox zəngin olduğunu vurğulayan D.Yablonski bildirib ki, iştirakçılar və qonaqlar arasında məşhur kollektivlər, müasir ifaçılıq sənətinin zirvəsində duran dünya şöhrətli ustad sənətkarlar vardır.

Rəngarəng konsertlər

Festivalın zəngin proqramına Üzeyir Hacıbəyli adına Simfonik Orkestrinin konserti də daxildir. Konsertləri məşhur dirijorlar Rauf Abdullayev və Azad Əliyev idarə edəcək. İyulun 26-da isə Fikrət Əmirovun 90 illik yubileyinin, iyulun 27-də vokal konsertinin keçirilməsi planlaşdırılır. Eyni zamanda, festivalda Bakı Musiqi Akademiyasının Orkestrinin konserti keçiriləcək və proqramda Yeganə Axundova, Murad Hüseynov, Murad Adıgözəlzadə çıxış edəcək.

İyulun 28-də festival çərçivəsində muğam konserti baş tutacaq. Konsertdə muğam ifaçıları İlkin Əhmədov, Arzu Əliyeva, Ehtiram Hüseynov səhnəyə çıxacaqlar. Muğam ifaçılarını tarda Sahib Paşazadə, kamançada Xəyyam Məmmədov, qanunda Təranə Əliyeva, nağarada Emin Cəbrayılov, balabanda Mehman Nuriyev müşayiət edəcək.

İyulun 29-da maestro Niyazinin 100 illiyi, iyulun 30-da Fərhad Bədəlbəyli, Murad Adıgözəlzadə, Dmitri Yablonskinin, avqustun 1-də Yuri Başmetin, avqustun 2-də Boris Berezovskinin konsertləri keçiriləcək. İyulun 31-də və avqustun 3-də Qəbələdə dünya şöhrətli Royal Filarmonik Orkestri konsert verəcək. Konsertlərdə Charles Dutoit, Lisa de La Salle, Mchal Nesterovçz çıxış edəcək. İyulun 5-də festival Murad Adıgözəlzadə, Fərhad Bədəlbəyli və Teymur Süleymanbəylinin çıxışları ilə öz işini yekunlaşdıracaq.

Qeyd edək ki, Qəbələ şəhərində iyulun 24-dən avqustun 5-dək keçiriləcək musiqi bayramında Azərbaycan və xarici ölkələrdən görkəmli musiqiçilər, bədii kollektivlər, solistlər, dirijorlar iştirak edəcəklər.

Təranə Məhərrəmova

Kaspi.-2012.-25 iyul.-S.11.