Turistlər niyə Duabyı seçir?

Bahadur Bilalov: “Bizim istirahət mərkəzlərinin böyük əksəriyyəti öz işlərini yay mövsümü üçün qurublar”

İstənilən ölkəni ətraflı tanımaq üçün əvvəlcə onun mədəniyyəti ilə tanış olmaq lazımdır. Elə turistləri bu və ya digər səfərə cəlb edən əsas amillərdən biri də üz tutduğu ölkənin mədəniyyətidir. Azərbaycanın da zəngin mədəni irsi, adət-ənənələrində olan spesifik xüsusiyyətləri, milli mətbəxi, geyimləri, bayramları və s. daim əcnəbilərin diqqət mərkəzindədir. Sadaladıqlarımız arasından xalqımızın ən qədim dövrünün adət-ənənələrini günümüzə qədər qoruyub saxlayan və öz orijinallığı ilə hər zaman seçilən Novruz bayramı da var.

Müxtəlif xalqlar daim çalışırlar ki, öz bayramlarını xüsusi bir təntənə ilə təqdim etsinlər. Bu da təbii ki, həmin ərəfədə ölkəyə minlərlə turistin gəlməsi ilə nəticələnir. Azərbaycan da həmçinin, milli bayramı olan Novruzu yüksək təntənə ilə qeyd etməyə və bu ərəfədə öz mədəniyyətini təbliğ etməyə çalışır. Qeyd etmək lazımdır ki, bayram ərəfəsində xeyli sayda xarici turistlər Azərbaycana pənah gətirirlər. Bayram günlərində qeyri-iş günləri olduğundan bir çox azərbaycanlılar xarici ölkələrdə istirahət etməyə üstünlük verirlər. Vətəndaşların ən çox getdiyi ölkələr sırasında isə Birləşmiş Ərəb Əmirlikləri (BƏƏ) öndədir.

Bu barədə Azərbaycan Turizm Assosiasiyasının (ATA) icraçı direktoru Aydın Məmmədov bir neçə gün əvvəl mətbuata açıqlama da verib. Onun sözlərinə görə, Novruz bayramı günlərində Azərbaycanda həm daxili turistlərin, həm də ölkədən kənara gedən turistlərin sayında artım baş verəcək: “Azərbaycanlı turistlər Novruz bayramı günlərində dincəlmək üçün əsasən isti ölkələri seçiblər. Bu ölkələrin siyahısında ilk yeri Birləşmiş Ərəb Əmirlikləri (BƏƏ) tutur. Həm hava şəraiti, həm də qiymətlərin digər uzaq ekzotik ölkələrdən münasib olması turistlərin Dubaya üstünlük verməsinə imkan verir. Bu səbəblərə görə Dubaya turist axını daha da artıb. İndidən Novruz günləri üçün təyyarə biletləri demək olar ki, satılıb. Artıq martın 25 və 26-sı üçün Azərbaycana geri qayıdış biletləri yoxdur, biletlərdə qıtlıq hiss olunur”.

A.Məmmədov deyib ki, Novruz günləri üçün endirimlər hər ölkə üzrə fərqlidir. Dubaydakı və Türkiyədəki otellərin qiymətlərində 15-20 faiz endirim edilib. Azərbaycanda Novruz günləri üçün turizm şirkətləri tərəfindən Qəbələ, Şəki şəhərləri, Quba-Qusar zonalarına da turlar təşkil olunur. Azərbaycanda turizm xidmətlərinin qiymətlərinin o qədər də baha olması fikri ilə razılaşmayan A.Məmmədov hesab edir ki, Azərbaycanda istirahət etmək istəyənlər erkən bronlaşdırmaya maraq göstərmirlər. Ancaq erkən bronlaşdırma olarsa, qiymətlər də aşağı olar. Gediş vaxtına nə qədər az vaxt qalarsa, qiymət də bir o qədər baha olur: “Belə vəziyyət hər bir ölkədə müşahidə olunur. Buna görə də insanlar istirahət etdikləri yeri lap əvvəldən planlaşdırmalıdır. Çünki, bu halda istirahət daha ucuz başa gəlir. Dünyanın bir çox ölkələrində, o cümlədən Avropada yay istirahəti üçün biletlər ilin əvvəlindən alınır. Yanvar-fevral aylarından artıq biletlər satılır. Azərbaycanda isə fevral başa çatandan sonra camaat fikirləşir ki, dincəlmək lazımdır. Bunu bir az əvvəlcədən fikirləşmək, erkən bronlaşdırmaya getmək lazımdır”.

Azərbaycan Turizm İnstitutunun turizm biznesinin təşkili və texnologiyası kafedrasının müdiri, dosent Bahadur Bilalov da “Kaspi”yə açıqlamasında bildirdi ki, bu qış çox soyuq keçib, ona görə də hamı isti yer axtarır: “Azərbaycan Turizm Assosiasiyasının icraçı direktoru Aydın Məmmədov da bu məsələyə və eyni zamanda statistikaya əsaslanaraq açıqlama verib. Statistikaya baxanda görürsən ki, həqiqətən də martın 20-dən 26-a qədər Dubaya uçan aviareyslərdə gediş-gəliş bileti artıq yoxdur. Hətta, bayaq internetdən Dubayın otellərinə baxırdım, onların böyük əksəriyyətində də artıq yer yoxdur. Çox təəssüflər olsun ki bizim yerli istirahət mərkəzlərində idarəçiliyi düzgün qurmurlar. Əslində Novruz bayramı ilə bağlı onların xüsusi endirimli proqramları olmalı idi. Həmçinin müxtəlif əyləncəni özündə ehtiva edən proqramlar olmalıydı ki, bizim vətəndaşlar da xarici ölkəyə yox, öz istirahət guşələrimizə üz tutsunlar. Amma, biz hələ ki, bunlara rast gəlmirik”.

B.Bilalov yerli turizm xidmətlərinin baha olmasının səbəbini də açıqladı: “Bizim istirahət mərkəzlərinin böyük əksəriyyəti öz işlərini yay mövsümü üçün qurublar. Ay yarım, iki ay işləyirlər, vəssalam, ondan sonra yeni mövsümün gəlişini gözləyirlər. Bu, belə olmamalıdır. Əslində bizim turizm obyektlərində qiymətlərin yuxarı olmasının da bilavasitə səbəblərindən biri budur ki, orada işlər çox qısa müddətə qurulur. Əgər onlar bütün il boyu öz işlərini apara bilsələr, təbii ki, qiymətlərdə də endirim olar. Bunlar biznesin əsas xüsusiyyətləridir”. Mütəxəssis həmçinin dedi ki, kim ki harada dincələcəyini hələ müəyyənləşdirməyib öz istirahət mərkəzlərimizə üz tuta bilərlər: “Təbii ki, istirahəti hərə öz bildiyi kimi, öz maddi imkanlarına uyğun keçirir. Sadəcə olaraq, onlar öz işlərini qabaqcadan planlaşdırsalar daha yaxşı olardı. Arzu edirəm ki, gələn il Novruz bayramında xaricə gedənlərin sayı az olsun və yerli turizm obyektlərində dincələnlərin sayı artsın. Bunun üçün də təbii ki, bizim turizm mərkəzləri öz işlərində müsbət dönüş yaratmalıdırlar”.

Dubaya olan aviareys biletlərinin satılıb qurtarmasını daha dərindən öyrənmək üçün bir neçə turizm agentlikləri ilə də əlaqə saxladıq. Həqiqətən də, bildirdilər ki, biletlər artıq bitib. Biletlərin ən çox satıldığı ikinci ölkə isə Türkiyədir. “Azərbaycan Express Travel” şirkətindən qeyd etdilər ki, Novruz paketi ilə bağlı Türkiyəyə olan biletlər də artıq satılıb.

Bəs, Dubaya olan marağın səbəbi nədir görəsən?! Bunu isə yaxın günlərdə turist kimi Dubaydan qayıdan Ülfət Əhmədovadan eşidək: “Dubayda ən çox xoşuma gələn əyləncə istirahət və alış-verişin təşkilati tərəfi oldu. Orada hər şey çox gözəl və hərtərəfli təşkil olunub. Əylənmək, istirahət etmək, dünya mətbəxləri ilə tanış olmaq istəyənlər üçün geniş imkanlar yaradılıb. Turistlərin və şəhərdə ilk dəfə olanların mümkün çətinlikləri, dil problemləri nəzərə alınıb. Bütün yol işarələri ərəb dili ilə yanaşı, ingilis dilində də verilib, ticarət mərkəzlərində bir çox dillərdə, hətta rus, türk dillərində belə xəritələr, informativ broşürlər paylanılır. Akvaparklarda hər bir istirahət edəni müşahidə dairəsində saxlayan, hər addımda köməyə gəlməyə hazır olan əməkdaşlar fəaliyyət göstərir. Burada istirahət etməyin və əylənməyin çox rahat və təhlükəsiz olması, xüsusilə təqdirəlayiqdir...”

Elgün Mənsimov

Kaspi.-2012.-2012.-2 mart.-S.8.