“İnsanın gənclik simasını geri qaytarırıq”

Dünyaca məşhur estetik cərrah Tunc Tiryaki etdikləri əməliyyatlardan sonra müştərilərinin hər hansı xəstəliyə tutulma ehtimalının sıfıra bərabər olduğunu deyir

Dünya Estetik Cərrahlar Cəmiyyətinin üzvü, beynəlxalq səviyyəli estetik cərrah Tunc Tiryaki Azərbaycana qısa müddətli səfərdə edib. Səfər çərçivəsində bir sıra görüşlər keçirən türkiyəli həkim “Kaspi” qəzetinin də qonağı olub. Biz də bu fürsətdən yararlanaraq, ona öz suallarımızı ünvanladıq.

- Tunc bəy, siz plastik cərrahiyə dedikdə daha çox hansı əməliyyatları nəzərdə tutur və icra edirsiniz?

- Plastik cərrahiyə dediyiniz şey, əslində rekonstruktiv cərrahiyyə deməkdir. Yəni, qopan qolların, barmaqların yerinə dikilməsi. Buna mikro cərrahiyyə də demək olar. Yanıq cərrahiyyəsi, cild tümörlərinin cərrahiyyəsi, ya da doğuşdan üzü qüsurlu olan uşaqların cərrahiyyəsi, eyni zamanda estetik cərrahiyyə və sair bizim işimizdir. Amma bu istiqamət üzrə ixtisası bitirdikdən sonra hər kəs öz yolunu seçir. Kimisi sadəcə əl cərrahiyəsi, kimisi mikro və ya estetik cərrahiyyə ilə məşğul olar. Estetik cərrahiyyə isə plastik cərrahiyyənin çox kiçik bir bölümüdür. Biz də bu sahə ilə məşğul oluruq. Amma estetik cərrahiyə əməliyyatları içərisində bütün əməliyyatları da həyata keçirə bilirik.

- Cərrahiyyə əməliyyatı dedikdə, insanların təsəvvüründə narkozdan istifadə edilməsi canlanır. Sizin etdiyiniz cərrahiyyə əməliyyatları zamanı necə, bu tətbiq olunurmu?

- Biz narkozdan istifadə etmədən də bir çox cərrahiyyə əməliyyatları həyata keçiririk. Bunun üçün xəstəyə sakitləşdirici dərman preparatı veririk. Məsələn, vücud əməliyyatlarında liposakşını anestizisiz, narkozsuz etmək mümkündür. Amma daha ağır əməliyyatlarda təbii ki, narkozdan istifadə edirik. İnsan üzündə aparılan bütün əməliyyatlar isə narkozsuz həyata keçirilir. Buna misal olaraq, burunda, goz ətrafında və sairdəki əməliyyatları göstərmək olar. Üzdə cərrahiyə əməliyyatı zamanı yalnız sümüklərlə bağlı hər hansı problem olduqda narkozdan istifadə edirik.

- Xəstələriniz əməliyyatdan sonra yataq şəraitində uzun müddətmi qalırlar?

- Üz əməliyyatlarında bir-iki hal istisna olmaqla, bütün vaxtlarda xəstələrimiz əməliyyat başa çatandan sonra evə yollanırlar. Kiçik üz əməliyyatları zamanı isə yarım gün xəstəxanada nəzarət altında qalırlar. Yəni, səhər əməliyyat olunan şəxs günorta saatlarında evinə dönə bilir. Vücudda, yəni selikon əməliyyatında da xəstələrimiz axşam evə göndərilir. Yalnız, üz gərmə (dartma) və qarın gərmə əməliyyatından sonra xəstələri xəstəxanada saxlayırıq. Buna da səbəb hər iki əməliyyatın böyük cərrahi proses olmasıdır. Bunlardan xaricində bütün əməliyyatlardan sonra xəstələr həmin gün axşam evə göndərilir. Əməliyyatdan 48 saat sonra xəstələrimiz duş qəbul edə, əməliyyatına bağlı olaraq 3-6 gün arasında işinin başına dönə bilirlər. Ümumiyyətlə, bizim etdiyimiz bütün əməliyyatlardan 1 həftə sonra müştərilərimiz rahatlıqla hovuza, dənizə girə bilirlər.

- Əksər insanlar cərrahiyyə əməliyyatından sonra yaranan izlərdən narahatçılıq keçirirlər. Sizin əməliyyatlardan sonra xəstələr bu kimi hallarla üzləşirmi?

- Hər hansı əməliyyat olursa-olsun onu başlamaq üçün dəridə bir kəsik açmaq lazım gəlir. Təbii olaraq bunun da bir izi qalır. Amma kiçik əməliyyatlarda, xüsusən də askılamalarda kiçik bir dəlik açıb əməliyyatı aparmaq mümkündür. Bu zaman həmin dəliyin izi qalmır. Əgər hər hansı ciddi problem yoxdursa, vücudda həyata keçirilən əməliyyat zamanı da, kiçik bir dəlik vasitəsilə bu işi görmək mümkündür. Qarın gərmə (dartma), üz gərmə kimi ağır əməliyyatlar zamanı isə bu işin gizli yönlərinə baş vururuq. Yəni, bu izlər qulağın içində, kipriyin, qaşın altında və sairdə gizlədilir ki, xəstə əməliyyatdan sonra hər hansı narahatçılıq keçirməsin.

- Qadınlar üzərində daha çox hansı cərrahi əməliyyatlar həyata keçirirsiniz?

- Ümumiyyətlə, estetik əməliyyatlar əsasən qadınlar üzərində həyata keçirilir. Bu əməliyyatları da fəsillərə uyğun olaraq gerçəkləşdirmək olur. Məsələn son baharda əsasən üzdə cərrahiyyə əməliyyatları aparılır. Yazda isə insanlar çimərliyə gedəcəkləri üçün daha çox vücud əməliyyatları ön plana çıxır. Selikon, liposakşın, qarın gərmə (dartma) əməliyyatları edirik. Ancaq bütün bu proseslər içərisində ən çox selikon əməliyyatları olur. Bunlar arasında da sinənin böyüdülməsi əməliyyatları daha çox üstünlük təşkil edir.

- Bu əməliyyatlardan sonra xəstələr təkrar sizə müraciət edirlərmi?

- Belə hallar olur. Bəzən, bir qadın sinəsini böyütmək üçün bizə müraciət edir. Biz cərrahiyyə əməliyyatı edib onun sinəsini böyüdürük. O, bundan məmnun qalır və öz vücudundakı bəzi problemləri də aradan qaldırmaq istəyir. Buna misal olaraq artıq piy qatını və sairi göstərmək olar. Bir sözlə, estetik cərrahiyyə üçün müraciət edən şəxs bu işin nə qədər güvənli və effektli olduğunu anlayandan sonra bütün problemlərini həll edib qurtarana kimi bizimlə təmasını kəsmir. Bütün bu problemləri həll edildikdən sonra həmin adam təkrar bizə müraciət etmir.

- Bu əməliyyatlardan sonra qidalanma, hərəkətlərlə bağlı xəstələrə hər hansı qaydalara riayət etmək tapşırılırmı?

- Əməliyyat üçün bizə müraciət edən müştərilərimizlə bağlı maraqlandığımız və narahatlıq keçirdiyimiz yeganə hal, onların siqaret aludəçisi olub-olmamalarını müəyyənləşdirməkdir. Əgər müştəri siqaret çəkəndirsə, onun üzərində bir çox əməliyyatları etmək olmaz və etmirik. Bu olduqca vacibdir. Ancaq tam sağlam və normal insandırsa, əməliyyatdan sonra o, hər hansı məhdudiyyətlərlə üzləşməz. Müştəri sərbəst şəkildə yuyuna, bərbərə gedə və sair işləri görə bilər. Bir həftə sonra normal iş həyatına dönə bilər. İki həftə sonra gəzintiyə çıxa bilər, bir ay sonra isə tam sərbəst şəkildə bütün işləri görə bilər. Qidalanmaya gəlincə də, əməliyyatın ardınca hər hansı pəhrizə ehtiyac yoxdur. Əməliyyat etdirən müştəri istər yaxşı qidalanar, istərsə də özünə qarşı müəyyən məhdudiyyətlər tətbiq edə bilər. Bu, onun öz işi və seçimidir.

- Bu əməliyyatlara məruz qalan qadın sonradan ana olmaq istərsə, bu ona hər hansı problem yaratmaz ki?

- Əsla! Tam əminliklə selikon əməliyyatı etdirmiş bir xanım sonradan heç nədən çəkinmədən hamilə qala bilər. Rahatlıqla uşağını dünyaya gətirib onun ana südü ilə bəslənməsini həyata keçirə bilər.

- Estetik əməliyyatlardan sonra hər hansı xəstəliyə tutulma ehtimalı varmı?

- Bu əməliyyatlardan sonra müştərilərimizin hər hansı xəstəliyə, xüsusən də xərçəng xəstəliyinə tutulma ehtimalı sıfıra bərabərdir. Özəlliklə də vurğulamaq istərdim ki, heç bir estetik əməliyyatın xərçəng xəstəliyi ilə əlaqəsi yoxdur. Burada əsas məsələ selikonla əlaqədardır. Bəzən sual verirlər ki, sinəyə selikon qoydurduqda xərçəng xəstəliyinə tutulma ehtimalı yaranarmı? Bir peşəkar cərrah kimi mən deyirəm ki, xeyir. Bu sahədə minlərcə elmi araşdırma var. Həmin araşdırmalar on minlərlə qadın üzərində aparılıb. Müəyyən edilib ki, bütün dünyada sinəsinə selikon qoyduran qadınlarla bunu etməyən digər zərif cinsin nümayəndələri arasında xərçəng xəstəliyinə tutulma faizində fərq yoxdur. Bununla bağlı son vaxtlar internet resurslarda maraqlı bir məlumat yayılmışdı. Həmin məlumatda Fransada sinəsinə selikon qoyduran xanımların xərçəng xəstəliyinə tutulma riskinin çox olduğu göstərilirdi. Qısa araşdırmadan sonra məlum oldu ki, problem xərçəng xəstəliyinə tutulmada deyil, Fransa mənşəyi ucuz bir selikondadır. Bu selikonların yırtılma faizi normal selikonlara nisbətən 5 dəfə yüksək idi. Biz də Dünya Estetik Cərrahlar Cəmiyyəti olaraq bu selikonların dəyişdirilməsini tövsiyə etdik. Çünki həmin selikonlar çox keyfiyyətsiz idi.

- Bəs sizin cərrahi əməliyyatlar zamanı istifadə etdiyiniz selikonlar müasir tələblərə uyğundurmu?

- Dünyada təsdiq edilmiş iki selikon markası var. Bunların hər ikisi çox keyfiyyətlidir. Bu iki selikon arasında isə allerqan deyilən marka dünyanın ən keyfiyyətli selikonudur. Bizim istifadə etdiyimiz selikon da bu marka selikondur. Nədən bundan istifadə edirik? Çünki bu selikonların çox vacib özünəməxsusluğu var. Bunların içərisində olan jele axmayandır, bunun partlamasını, çatlamasını kənara qoyaq, onu bıçaqla belə kəssəniz içindəki jele axmaz. Bu selikonları həyat boyu istifadə etmək belə mümkündür. Heç bir şəkildə dəyişdirilməsinə ehtiyac yoxdur. Bu selikonların istifadə edildiyi müddətdə - nə hamiləlik zamanı, nə süd verdikdə, nə də ondan sonrakı dövrlərdə çıxarılmasına ehtiyac yoxdur. Hər bir xanım həyatının sonuna kimi bu selikonlardan istifadə edə bilər.

- Bəs, kişilər hansı estetik əməliyyatlarla bağlı sizə müraciət edirlər?

- Kişilər daha çox renoplasti, yəni burun əməliyyatı, saç əkdirmək və yağ (piy) aldırmaq üçün müraciət edirlər.

- Yağ aldırmaq məsələsinə toxundunuz. Əməliyyatdan sonrakı müddətdə təkrar piylənmə getmir ki?

- Xeyr, belə bir şey ola bilməz. Təbii ki, kişinin çəkisi arta bilər, amma xüsusən o nahiyəyə piy yığıla bilməz. Dərialtı yağ dokusunun bəlli yerlərdə depoları var. Bizim burada əsas işimiz o qalınlığı aradan götürməkdir. Sonra xəstənin çəkisi arta bilər, əgər çox yeyərsə, amma bu, hər yerdə eyni miqdarda olacaq, yəni, mənim verdiyim şəkildə kilo alacaq.

- Bəzən estetik əməliyyat keçirən insanlar bir-birilərinə daha çox bənzəyirlər. Bu kimi narahatçılıq sizin etdiyiniz əməliyyatlarda müşahidə olunurmu?

- Mümkün olduqca bundan çəkinməyə çalışırıq. Əgər siz hər hansı estetik əməliyyata məruz qalan bir adamı gördükdə, onun əməliyyatda olduğunu hiss edib, başa düşürsünüzsə, demək ki, bu, pis keçirilmiş estetik əməliyyatdır. İstər kişi, istərsə də qadın fərq etməz. Yaxşı əməliyyat odur ki, ona kənardan baxarkən siz heç vaxt başa düşə bilməzsiniz. İnsanların bir-birinə oxşamasının səbəbi isə həkimin özü istədiyi kimi əməliyyat etməsidir. Ancaq bizdə bu, belə deyil. Biz xəstənin üzündə əməliyyat ediriksə, həmin şəxsin gənclik şəklini istəyirik. 18-20-25 yaşına aid şəklini tələb edirik. Şəkildə nə varsa, onu edirik. İnsanın gənclik simasını geri qaytarırıq. Əslində, bütün əməliyyatlar məhz belə keçirilməlidir.

- Ümumiyyətlə, plastik əməliyyat üçün Sizə müraciət edən hər kəsin istəyi qəbul edilirmi?

- Bizim xəstəxanaya gələn 10 xəstədən 2-3 nəfəri məlumat xarakterli söhbətdən sonra geri qayıdır. Yəni, bizə gələn xəstənin burun əməliyyatına ehtiyac yoxdursa, o burunu əməliyyat etmərik. Onsuz da yaxşı burunu əməliyyat edib xəstəni göndərsəniz, xəstə sonra narazı şəkildə geri qayıda bilər.

- Son olaraq, deyə bilərsinizmi, plastik əməliyyat etdirmək istəyən vətəndaşlar sizə necə müraciət edə bilərlər?

- Mən Azərbaycanda daimi olaraq işləmirəm. Mütəmadi olaraq bura səfərlər edirəm. Son zamanlar isə Xətai Estetik Klinikası ilə ortaq bir işbirliyi ərsəyə gətirmişik. Bu səbəbdən, Bakıda yerləşən həmin klinikada xəstələrimizlə görüşürük. Əgər plastik əməliyyat etdirmək istəyən olarsa, onun seçimi əsasında bunu həm Xətai Estetik Klinikasında, yaxud da İstanbulda həyata keçiririk.

Ərturan İSMAYIL

Kaspi.-2012.-6 mart.- S.13.