“Ümummilli maraqlar naminə ortaq layihələr həyata keçirməlidir”

Fuad Muradov: “Azərbaycan üçün ən böyük uğur ondan ibarət ola bilər ki, xaricdə yaşayan və ya təhsil alan gənc təmsil olunduğu cəmiyyətdə böyük nüfuz sahibi olsun”

Martın 12-də Bakıda, “Gülüstan” sarayında Dünya Azərbaycanlı Gənclər Birliyinin təsis qurultayı keçirilib. Qurultayda hökumət və dövlət nümayəndələrindən, xaricdə yaşayan azərbaycanlı gənclər tərəfindən təsis edilmiş və respublikada fəaliyyət göstərən gənclər təşkilatlarının təmsilçilərindən, dünyanın nüfuzlu ali məktəblərində təhsil alan fəal azərbaycanlı tələbələrdən, həmçinin Azərbaycan diaspor təşkilatlarının rəhbərlərindən ibarət nümayəndə və qonaqlar iştirak edib. Qurultay iştirakçılarından biri olan Azərbaycan Respublikası Gənclər Təşkilatları Milli Şurasının (ARGTMŞ) sədri, millət vəkili Fuad Muradov bu tədbirin əhəmiyyəti barədə “Kaspi”nin suallarını cavablandırıb.

- Bakıda Sizin də iştirakınızla Dünya Azərbaycanlı Gənclər Birliyinin təsis qurultayı keçirilib. Bilmək istərdik, bu, Qurultayın keçirilməsi barədə təşəbbüs nə zaman meydana gəlib?

- Uzun illərdir Azərbaycanda Diasporla iş üzrə Dövlət Komitəsi mövcuddur. Bu komitənin əsas fəaliyyətlərindən biri də xaricdə yaşayan, orada işləyən və Azərbaycanı təbliğ edən şəxslərin dəstəklənməsi, bu istiqamətdə yeni təşkilatların yaradılmasına çalışanlara kömək edilməsidir. Bununla paralel olaraq, Azərbaycanda dövlət səviyyəsində gənclər siyasəti həyata keçirilməkdədir. Ölkəmizdə istedadlı gənclərin üzə çıxarılması, bədən tərbiyəsi və idmanın inkişafı, beynəlxalq gənclər təşkilatları ilə əməkdaşlığın genişləndirilməsi, savadlı və perspektivli gənclərin irəli çəkilməsi sahəsində real tədbirlər görülməkdədir. Son illər Azərbaycan gəncliyi istər fiziki, istərsə də intellektual baxımdan yüksək inkişafa nail olmuşdur. Bütün bu müsbət dəyişikliklər bizi sevindirir. Bu gün tələbələrimiz müxtəlif dilləri öyrənir, dünyanın nüfuzlu təhsil mərkəzlərində təhsil alır, müasir elmin nailiyyətlərinə, yeni texnologiyalara yüksək səviyyədə yiyələnir, bilik və bacarıqlarını isə Azərbaycanımızda tətbiq edirlər. Xarici ölkələrdə yaşayan azərbaycanlı gənclər isə təşkilatlanaraq, ölkəmizin milli maraqlarının təbliğatçısına çevrilirlər. Buna misal olaraq, Rusiya Federasiyasında Leyla xanım Əliyevanın təşəbbüsü ilə yaradılan Rusiyanın Azərbaycanlı Gənclər Təşkilatı (RAGT) kimi böyük və güclü qurumların fəaliyyətini göstərmək olar. Eyni zamanda dünyanın bir çox ölkələrdə də Azərbaycan gənclərinin güclü təşkilatları yaranıb ki, onlar da Azərbaycanın təbliği ilə məşğul olurlar. Bugünkü günün tələbi isə ondan ibarətdir ki, Azərbaycanın təbliğatını daha da gücləndirmək, ölkəmiz haqqında həqiqətləri dünya ictimaiyyətinə çatdırmaq məqsədilə xaricdə fəaliyyət göstərən gənclər təşkilatları vahid bir mərkəzdə cəmləşsinlər. Belədə təşkilatlanmaq mümkün olur, Azərbaycanın mili maraqları peşəkar şəkildə dünyaya çatdırılır. Bütün bunlar nəzərə alınaraq, 2010-cu ilin noyabrında Almaniyanın Frankfurt şəhərində keçirilən Dünya Azərbaycanlı Gənclərinin I Konqresində gənclər tərəfindən Dünya Azərbaycanlı Gənclər Birliyinin yaradılması ideyası irəli sürüldü. İdeya dəstəkləndikdən sonra qısa vaxtda təşkilatın fəaliyyətinin əsas istiqamətləri müəyyən edildi. Diasporla İş üzrə Dövlət Komitəsi, Gənclər və İdman Nazirliyi, gənclər siyasəti ilə məşğul olan digər dövlət qurumları, o cümlədən xarici ölkələrdə fəaliyyət göstərən diaspor təşkilatlarının iştirakı ilə bu möhtəşəm qurultay Bakıda baş tutdu. Martın 12-də keçirilən Qurultaya dünyanın 34 ölkəsindən 356 nümayəndə seçilərək qatıldı. Bununla yanaşı, 17 ölkədən Azərbaycan icmasının rəhbərlərindən ibarət 28 nəfər qonaq qismində olmaqla, bütövlükdə qurultayda 532 nəfər iştirak etdi. Nəticə olaraq, Dünya Azərbaycanlı Gənclər Birliyinin təsis qurultayının qətnaməsi qəbul olundu, təşkilatın Nizamnaməsi, Fəaliyyət Proqramı təsdiqləndi, Birlik adından Azərbaycan Prezidenti İlham Əliyevə müraciəti qəbul olundu. Təşkilati məsələlərə baxıldı.

- Dünya Azərbaycanlı Gənclər Birliyinin fəaliyyətinin əsas istiqamətləri və nədən ibarətdir?

- Azərbaycanın ərazi bütövlüyünün təmin olunması istiqamətində fəaliyyət, o cümlədən Ermənistanın təcavüzkar siyasəti, 20 faiz ərazimizin işğal faktı, Dağlıq Qarabağ münaqişəsinin beynəlxalq aləmə çatdırılması prioritet vəzifədir. Eyni zamanda, Azərbaycan gənclərinin yaşadıqları cəmiyyətlərə inteqrasiyası da fəaliyyət proqramında öz əksini tapıb. Fikrimcə, xaricdəki gənclər yaşadıqları cəmiyyətin siyasətçiləri, nüfuzlu şəxsləri, ictimaiyyət nümayəndələri ilə daim ünsiyyətdə olmalı, onlarla müxtəlif əlaqələr qurmalıdırlar. Paralel olaraq gənclər beynəlxalq təşkilatlarda da lazımınca təmsil olunmalıdırlar. İnanıram ki, bu təşkilat yaxın zamanlarda böyük işlərə imza atacaq. Yenə də təkrar edirəm ki, burada əsas məqsəd Azərbaycan reallıqlarını, ölkəmizdə həyata keçirilən islahatları dünya ictimaiyyətinə çatdırmaqdır.

- Hazırda Azərbaycan gəncliyinin qarşısında hansı vəzifələr dayanır?

- Azərbaycan gəncliyi daim ölkədə gedən ictimai-siyasi proseslərdə aparıcı qüvvə kimi çıxış edib. Bu gün də bu belədir. Bu səbəbdən Azərbaycan gənclərinin qarşısında duran ən böyük vəzifələrdən biri işlərində, öz təhsillərində mükəmməl şəkildə bilik və bacarıqları mənimsəmək, siyasi, dini baxışlarından asılı olmayaraq, azərbaycançılıq ideologiyası ətrafında cəmləşməkdir. Hər bir gənc bu istiqamətdə iş aparmalıdır. Əldə olunan bilik və bacarıqlar Azərbaycan dövlətçiliyinin qorunması istiqamətində istifadə edilməlidir. Xaricdəki gənclər isə oradakı siyasi elita ilə birgə hərəkət etməli, Azərbaycanın ümummilli maraqları naminə ortaq layihələr həyata keçirməlidirlər. Düzdür, bu sahədə bizim üzləşdiyimiz bir sıra problemlər də var. Amma zamanla onların da öhdəsindən gəlmək mümkün olacaq. Azərbaycan üçün ən böyük uğur ondan ibarət ola bilər ki, xaricdə yaşayan və ya təhsil alan gənc təmsil olunduğu cəmiyyətdə böyük nüfuz sahibi olsun. Belə gənclər olsa Azərbaycanın təbliğatı da daha uğurlu şəkildə qurula bilər.

- Gənclərimiz Azərbaycan həqiqətlərini, xüsusən Ermənistanın təcavüzkar siyasəti və Dağlıq Qarabağ probleminin dünyaya çatdırılması istiqamətində nə kimi işlər görürlər?

- Bir neçə ildir ki, Leyla xanım Əliyevanın rəhbərliyi ilə Xocalıya Ədalət Kampaniyası həyata keçirilməkdədir. Xocalı faciəsinin 20 illiyi zamanı bir çox ölkədə bu soyqırımıyla bağlı müxtəlif tədbirlər baş tutub. Bu tədbirlər Xarici İşlər Nazirliyinin səyi ilə əsasən gənclərin böyük rolu hesabına mümkün olub. Dünyanın 150-dən çox şəhəri 50-dən çox müxtəlif ölkəsi fevralın 25-26-da Azərbaycan həqiqətlərindən xəbər tutmuş olub. Həmin gün dünya Ermənistanın təcavüzkar siyasətinin, bu siyasətin hansı faciələrə yol açdığını görmüş olub. Düşünürəm ki, bu istiqamətdə fəaliyyət bundan sonra da yorulmadan davam etdirilməlidir. Xocalı soyqırımına hüquqi qiymət verilənə kimi təbliğatı dayandırmaq olmaz. Baxmayaraq ki, Ermənistanın havadarlarının dəstəyi ilə Azərbaycana qarşı dünyada əks təbliğat aparılır, amma son 5 ildə Azərbaycan informasiya müharibəsində Ermənistanı xeyli üstələyib. Bunun əsas səbəbi təşkilatlanmış, düşünülmüş strategiyadır.

Rufik İSMAYILOV

Kaspi.-2012.-14 mart.-S.3.