Məktəblərdə “Gender siyasətinin əsasları” tədris olunacaq

Ekspertlər hesab edir ki, bu fənninin ali məktəblərdə tətbiq edilməsi effekt verə bilər

Son illərdə Azərbaycan təhsilində bir neçə yenilik tətbiq olunub. Bunlara bəzi layihələri, həmçinin tədris proqramlarına əlavə olunan yeni dərslərin keçirilməsini və s. göstərmək olar. Təhsil sistemində nəzərdə tutulan yeniliklərdən biri də ali, orta-ixtisas və ümumi təhsil müəssisələrində “Gender siyasətinin əsasları”nın tədris olunmasıdır. Bütün bunlar artıq Nazirlər Kabineti, Azərbaycan Həmkarlar İttifaqları Konfederasiyası və Azərbaycan Sahibkarlar Təşkilatları Milli Konfederasiyası arasında imzalanmış 2012-2013-cü illər üçün Baş Kollektiv sazişdə nəzərdə tutulur. Sazişin “Sosial müdafiənin gücləndirilməsi istiqamətləri” hissəsində bildirilir ki, ali, orta-ixtisas, ilk peşə-ixtisas və ümumi təhsil müəssisələrinin proqramlarına “Gender siyasətinin əsasları”nın tədrisi daxil ediləcək.

Bu barədə mövcud təfərrüatları öyrənmək üçün Təhsil Nazirliyinin aidiyyəti bölmələri ilə əlaqə saxlamağa çalışdıq. Nazirliyin mətbuat xidmətindən ümumiyyətlə cavab verən olmadı. Ali və Orta ixtisas Təhsili şöbəsinin baş məsləhətçisi Ənvər İmanov isə bildirdi ki, bu məsələlərlə keçmiş nazir müavini İradə Hüseynova məşğul olurdu. Amma, o da bir müddət öncə tutduğu vəzifədən azad edilib. Ənvər müəllim bizə kömək məqsədilə məsələ ilə əlaqədar nazirliyin bir neçə şöbəsi ilə əlaqə saxlasa da “xəbərim var” deyən olmadı. Daha sonra Təhsil Nazirliyinin ümumtəhsil və məktəbəqədər təhsil şöbəsinin müdiri Aydın Əhmədovla əlaqə saxlamağa çalışdıq. Telefona cavab verən xanım onun günortadan sonra olacağını bildirdi. Səbr edib günortadan sonra da bir neçə dəfə əlaqə saxladıq, aldığımız cavab isə bu oldu: “Aydın müəllim hələ gəlməyib”.

Nazirlikdən rəsmi cavab ala bilmədiyimizi gördükdə, Bakı Şəhəri üzrə Təhsil İdarəsinin sektor müdiri Zəminə Əliqızı ilə əlaqə saxladıq. O isə məlumatı nazirlikdən almağımızı məsləhət gördü. Səbəbini bununla əsaslandırdı ki, “Bəlkə gender siyasətinin əsasları bütün respublikadakı ümumtəhsil məktəblərində tətbiq olunacaq! Ona görə, bu barədə bir şey deyə bilmirəm”.

Ali, orta-ixtisas və ümumtəhsil orta məktəblərdə “Gender siyasətinin əsasları”nın tədris olunmasına təhsil məsələləri üzrə ekspert Etibar Əliyevin münasibətini aldıq. O hesab edir ki, bu tədrisin orta məktəblərdə nəzərdə tutulması bir qədər ziddiyyətli məsələdir: “Çünki, orta məktəbin proqramı, tədris planı həddindən artıq yüklənib. Ona görə də, bu, o qədər də əhəmiyyət daşımayan bir fənn kimi fəaliyyət göstərə bilər. “Gender siyasətinin əsasları”nın tətbiqi əsasən ali məktəblərdə müəyyən effekt verə bilər. Bu da pedaqoji ixtisaslarda, Bakı Dövlət Universitetində, Pedaqoji Universitetdə, Müəllimlər İnstitutunda və.s tətbiq olunsa müəyyən nəticələr əldə etmək olar. Bir məsələ də var ki, burada hansı təcrübədən istifadə olunacaq?! Ola bilsin ki, hansısa Avropa ölkəsində belə bir fənn tədris olunur, həm də müəyyən dərəcədə əhəmiyyəti var”.

E.Əliyev vurğuladı ki, gender anlayışı Azərbaycanda ictimai-siyasi həyatda bir o qədər də rol oynamır: “Yəni, bu prinsip bizim cəmiyyətdə ciddi şəkildə pozulmur. Məsələn, parlamentdə, tələbə kontingentinin tərkibində və s. Bu gün təkcə müəllim kontingentinin tərkibində gender prinsipi pozulub, yəni orta məktəb müəllimlərinin təxminən 85%-i qadınlardır. Bunlar da təbii proses nəticəsində yaranıb. Yəni, əmək haqqı zəif olduğundan, kişi cinsindən olan müəllimlər məktəbi tərk edirlər. Amma ola bilər ki, gələcəkdə müəllim peşəsinə maraq artsın və bu balans düzəlsin. Bütün hallarda deyə bilərəm ki, bu cür fənn yalnız ali məktəblərdə tətbiq olunarsa, effekt əldə etmək olar. Ona görə ki, bu fənnin şagirdlər üçün əhəmiyyət kəsb etməsini düşünmürəm. Bu günə qədər təhlil etdiyim bir çox ölkələrin tədris planında da gender siyasəti adlı fənnin tədrisinə rast gəlməmişəm”.

Qeyd edək ki, təhsil sahəsində nəzərdə tutulan yeniliklər təkcə bununla bitmir. Təhsil Nazirliyinin mətbuat xidmətindən mətbuata açıqlanan məlumata görə, Bakı şəhərində və ayrı-ayrı bölgələrdə fəaliyyət göstərən ali təhsil müəssisələrinin nəzdində istedadlı şagirdlər üçün ümumi təhsil müəssisələri yaradılacaq. Bu iş il ərzində ali təhsil müəssisələri ilə birgə aparılacaq. Bununla yanaşı, lisey və gimnaziyaların təmayülləri nəzərə alınmaqla, müvafiq ali məktəblərə təhkim edilməsi məsələlərinə baxılması və bununla bağlı təkliflərin hazırlanması nəzərdə tutulur. Lisey və gimnaziyanın fəaliyyət göstərmədiyi şəhər və rayonlarda isə bu tipli təhsil müəssisələrinin yaradılması planlaşdırılır. Həmin bölgələrdə yeni lisey siniflərinin açılması da nəzərdə tutulan tədbirlərdəndir. Nazirliyin məlumatında qeyd olunub ki, Azərbaycan ümumi təhsil müəssisələrində riyaziyyat-texniki və təbiət fənləri, eləcə də bədii və texniki, yaradıcılıq, incəsənət, idman sahələri üzrə təhsil alan istedadlı şagirdlərin siyahısı hazırlanacaq.

Elgün Mənsimov

Kaspi.-2012.-15 mart.- S.8.