Heydər Əliyev irsi 50 dildə

Heydər Əliyev irsini Araşdırma Mərkəzinin 50 dildə olan elektron versiyası əcnəbi oxuculara ulu öndərin zəngin və çoxcəhətli irsi ilə öz dillərində tanış olmalarına imkan yaradır

Dünən Azərbaycan Milli Elmlər Akademiyasının (AMEA) Rəyasət Heyətində ümummilli lider Heydər Əliyevin anadan olmasının 89-cu ildönümü ərəfəsində Heydər Əliyev İrsini Araşdırma Mərkəzinin və bu quruma məxsus www.aliyevheritage.org portalının fəaliyyətinə həsr olunmuş tədbir keçirilib. Tədbiri giriş sözü ilə AMEA-nın birinci vitse-prezidenti, akademik Arif Həşimov açaraq, mərkəzin www.aliyevheritage.org ünvanındakı portalında ümummilli lider Heydər Əliyev irsinin təbliğindən danışıb. Bildirib ki, Heydər Əliyev elmini, onun qoyub getdiyi irsi öyrənmək üçün günlər, aylar deyil, onilliklər gərəkdir. O, əminliklə qeyd edib ki, bundan sonra da ulu öndərin həyat və fəaliyyəti araşdırılacaq, mükəmməl şəkildə gələcək nəsillərə çatdırılacaqdır.

Heydər Əliyev irsini Araşdırma Mərkəzinin baş direktoru Fuad Babayev ölkəmizin tarixi inkişaf prosesinə təkan verən ümummilli lider Heydər Əliyevin müstəqil Azərbaycan dövlətinin qurucusu kimi hər bir azərbaycanlının taleyində müstəsna rol oynadığını diqqətə çatdırıb. O, bu böyük şəxsiyyətin zəngin irsinin dərindən və hərtərəfli öyrənilməsinin müstəsna əhəmiyyətə malik olduğunu vurğulayıb. Qeyd edib ki, Heydər Əliyev İrsini Araşdırma Mərkəzi də məhz bu işlə məşğul olan qurumdur: “Azərbaycan xalqının ümummilli lideri Heydər Əliyevin zəngin irsinin öyrənilməsi və təbliği 2004-cü il may ayının 10-da yaradılmış Mərkəzinin əsas fəaliyyət sahəsidir. Mərkəzin www.aliyevheritage.org ünvanındakı portalı isə ümummilli liderin irsinin təbliği ilə məşğul olan ən iri elektron resursdur. Portal hər gün yeni materiallar və ideyalarla zənginləşdirilir. Portalda Heydər Əliyevin fəaliyyətinin demək olar ki, bütün sahələri, o cümlədən xarici və daxili siyasət, iqtisadiyyat, neft strategiyası, mədəniyyət, gənclər siyasəti, ordu quruculuğu, müsahibələr, beynəlxalq terrorizmlə mübarizə, diaspor, böyük siyasətə qayıdış və sair əhatə olunub. Materialların oxucular tərəfindən asanlıqla tapılması üçün portalda bölümlər və altbölümlər də yaradılıb. Dünyada ən geniş yayılmış 50 dildə versiyamızın olması isə oxucularımızın ulu öndər Heydər Əliyevin zəngin və çoxcəhətli irsi ilə öz dillərində tanış olmalarına imkan yaradır”.

F.Babayev deyib ki, 8 yaşlı portal Azərbaycanın ən yeni tarixi haqqında qiymətli mənbədir. Onun sözlərinə görə, sayta daxil olan oxucuların say dinamikası bunu əyani şəkildə sübut edir: “Mərkəzin portalına yalnız ötən il yüz minlərlə oxucu daxil olaraq 2 milyonadək sənədlə tanış olub. Son göstəricilər əsasında deyə bilərik ki, oxucularımızın 63 faizini dünyanın tanınmış elm mərkəzləri, 15 faizini rəsmi qərarların qəbul edildiyi mötəbər dövlət qurumları, 10 faizini dünyanın nüfuzlu kütləvi informasiya vasitələri, 3 faizini transmilli şirkətlər, qalan 12 faizini isə digər qurumlar əhatə edir. Ötən 2011-ci il ərzində portala dünyanın 185 ölkəsindən oxucular daxil olub. Gündəlik olaraq 80-100 ölkədən portalımıza ziyarətçi daxil olur. Mərkəzin oxucularını ən çox maraqlandıran mövzular sırasında Ermənistan-Azərbaycan-Dağlıq Qarabağ münaqişəsi, Azərbaycanın neft strategiyası, Azərbaycan iqtisadiyyatı, Azərbaycanda ordu quruculuğu, Azərbaycan mədəniyyəti və gənclər siyasəti daha çox üstünlük təşkil edir”.

A.Bakıxanov adına Tarix İnstitutunun direktoru, millət vəkili Yaqub Mahmudov, akademik Asəf Nadirov, millət vəkili Asəf Hacıyev və başqaları da çıxış edərək, ulu öndər Heydər Əliyevin Azərbaycan xalqı qarşısındakı xidmətlərindən söhbət açıblar.

Sonda Heydər Əliyev İrsini Araşdırma Mərkəzinin fəaliyyətinə həsr olunmuş slayd nümayiş etdirilib.

Rufik İSMAYILOV

Kaspi.-2012.-1 may.-S.4.