Millət vəkilindən ensiklopedik kitab

Azərbaycan ədəbiyyatı və mədəniyyətinin tanınmış tədqiqatçısı, Milli Məclisin deputatı, Azərbaycan Milli Elmlər Akademiyasının müxbir üzvü, professor Rafael Hüseynovun “İmzamız. Sənət düşüncələri” adlı yeni kitabı işıq üzü görüb.

“Elm və təhsil” nəşriyyatında nəfis tərtibatla buraxılmış 800 səhifəlik bu kitab Azərbaycan mədəniyyətşünaslığına layiqli töhfə sayıla bilər.

Kitaba yazdığı “Bizliyimiz” adlı ön sözdə müəllif Azərbaycanın zəngin incəsənətini, onun şah əsərlərini, bu sərvəti yaratmış parlaq sənətkarları millətin və ölkənin tarixə həkk olunmuş imzası kimi qiymətləndirir.

Fundamental tədqiqatın “İzimiz” adlandırılmış birinci fəslində Azərbaycan rəssamlığının keçdiyi tarixi yol araşdırılır, XX əsrdə formalaşıb yüksək inkişaf mərhələsinə çatan müasir boyakarlığımızın 3 mühüm mərhələni adladığı göstərilir.

Azərbaycanın qaya rəssamlığı, Qobustan təsvirləri, süjetli divar rəsmləri və freskalar mədəniyyəti, orta əsr kitab miniatürçülüyü geniş məxəzlər dairəsini cəlb etməklə yeni baxış bucağından təqdim edilir.

Alimin yeni kitabı müəyyən mənada bir sənətşünaslıq ensiklopediyası təsiri oyadır. Əsərdə milli kinomuzun 100 ildən artıq olan macəralı inkişaf yolu, ozan-aşıq, qopuz-saz sənətimizin 1300 ildən uzun zaman məsafəsi adlamış tükənməz irsi, yaşı on min illərlə ölçülə biləcək rəqslərimiz, tarixi xalqımızın tarixi qədər qədim olan milli oyunlarımız və xalq meydan teatrı ənənələri müfəssəl şəkildə izlənilir, əlvan illüstrasiyalar, çoxsaylı arxiv sənədləri əsasında, cəlbedici formada təqdim edilir.

Monoqrafiyanın “Zirvələr” adlı fəslində Azərbaycan musiqi tarixində mərhələ olan, yaradıcılıqları məktəbə, cərəyana çevrilmiş böyük nümayəndələrindən bəhs edilir.

Kitabda tarixi əhəmiyyət kəsb edən çoxlu fotolar da verilib ki, onların böyük hissəsi ilk dəfə çap olunur

Tanınmış alimlər, akademik Vasim Məmmədəliyev və AMEA-nın müxbir üzvü Cəfər Qiyasinin redaktoru olduğu bu əsər həm sənətşünaslar, həm tarixçilər, elmi ictimaiyyət, həm də geniş oxucu kütləsi üçün nəzərdə tutulub.

Kitabının elektron versiyası da hazırlanıb.

Kaspi.-2012.-5-7 may.-S.13.