Dünyadan
heç nə oğurlamadıq, heç kimi arxadan
vurmadıq
Nurəddin Mehdixanlı: “Bir
Türklər öz böyüklüyümüzü dərk
edəndə və özümüzə sahib çıxanda,
bizdən yenidən öyrənməyə başlayacaqlar”
- Nurəddin
bəy, mən ruh adamlarının İÇlərindəki
MƏNi oxucuya çatdırmağı sevirəm.
Düşünürəm ki, insanı insan edən məhz
odur. Sizinlə də bağlı buna
çalışacağam, gücümün
çatacağına əmin olmasam da. Deyə bilərsinizmi,
kimdir Mehdixanlı Nurəddin
-
Atasının adı Əzizulla, anasının adı Tovuz,
milliyyətcə TÜRK, düşüncəcə
TURANÇI, yurdsevər bir insan. Hal-hazırda da müstəqil
Azərbaycan respublikasının vətəndaşı...
- Hər
kəs sizi sevir. Türk olan hər kəs...
- Hə,
o mənada daha doğrudur. Mən hesab eləmirəm ki,
hamı məni sevir.
- Mən
bizdən olanları dedim. Mən də sizi başqalarından bir
az daha çox sevirəm, çünki sevdiyim bir ruh sizdə
gözəl təzahür edir. Ruhu daşımaq başqa
şeydir, o ruhu daşıdığın şəkildə
çatdırmaq isə tamamilə başqa.
Özünüzün sevərək oynadığınız
bir rol - hansı ki o rolda siz o
ruhu çatdıra bilmisiz...
- Həyatımda
iki dəfə ciddi şəkildə belə bir hadisə olub.
Təbii ki, bir var gözəl dram əsəri, gözəl
tamaşa, gözəl aktyor ifası - bu tamamilə ayrı bir
şeydir. Mənimçün “Aydın” tamaşası, hesab
edirəm ki, Azərbaycan teatr tarixinin son otuz ilində ən
monumental və akademik səviyyədə hazırlanan bir
tamaşa idi. Aydın rolunun ifaçısı mən idim və bu mənim ömrümün gözəl
bir səhifəsi idi. Amma içimlə, ruhumla üst-üstə
düşən və bu işi görəndən sonra ”bu
işi görəndən sonra yaşamaq da olar, ölmək də”
dedizdirən iki iş olub taleyimdə. Biri Bəxtiyar Vahabzadənin
“Özümüzü kəsən qılınc”
tamaşasında Kür Şad rolu, ikincisi isə ssenarisi Sabir
Rüstəmxanlının, quruluşu Rövşən
Almuradlının “Cavad xan” filmindəki Cavad xan obrazı.
Hərdən
dostlarımla, yaxın ətrafımla söhbət eləyəndə
deyirəm ki, ola bilsin, bu dünyada adamlar var ki,
övladlarına saraylar, villalar, Avropa banklarında
böyük-böyük məbləğdə pullar, təyyarələr,
hektarlarla torpaq sahələri və s. nələrsə miras
qoyacaqlar, amma onların heç biri mənim övladlarıma
qoyacağım miras qədər dəyərli ola bilməyəcək.
O miras da Cavad xandır. Bu mənim övladlarıma miras qoya
biləcəyim ən böyük, ən dəyərli
obrazdır.
- Nə hiss edirsiniz obrazda olanda?
- Deyirlər
ki, cənnət o dünyadadır, amma mən belə
düşünmürəm. Cənnət həm də bu
dünyadadır. Mən hesab edirəm ki, cənnətdə
hansı həzzi yaşamaq mümkündürsə, həyatın
ən yüksək dərəcəsində olmağın ləzzətini
insan necə yaşayırsa, mən Kür Şad obrazında
və Cavad Xanda məhz bunu yaşamışam.
- Bu artıq sondurmu? Yəni sizin
yaradıcılığınızın kulminasiya nöqtəsidirmi?
- Yox, bilmək
olmaz. Ola bilər, bundan sonra elə bir obraz olsun ki, bunların
hamısından üstün alınsın.
- Oynamaq
istəyib də oynamadığınız hansısa obraz...
-
Ömrüm boyu arzuladığım bir obraz var idi - Şah
İsmayıl Xətai. Hamının gördüyü,
tanıdığı Şah İsmayılı yox, mən
TÜRK Şah İsmayılı yaşamaq istərdim.
Yaşım ötdü, mən artıq Şah
İsmayılı oyanaya bilmərəm. Amma onun istədiklərini, onun
yaşadıqlarını bədii şəkildə də
olsa yaşamaq istərdim. Bu gün bizim bəzi qəhrəmanlarımız
müxtəlif şəkillərdə təqdim olunmağa
başlayıb. Yavaş-yavaş bir-birinə yaxınlaşan,
bir-birinin yanında olmağa çalışan bir türk
dünyası var. Bunu önləmək üçün kimi
sünni-şiə davası salır, kimi yenidən Sultan Səlim-Şah
İsmayıl qovğası qaldırır. Türk millətinin
içərisində belə bir-birinə qarşı cəbhə
açmaqla məşğul olan güclər var. Amma
arzuladığım dini qarşıdurmalardan, dini təriqətlərdən,
məzhəblərdən uzaq və birinci olan
Türkçülük anlayışı var. Mənim
üçün öncə odur. Allah-Təala da məni
yaradanda TÜRK yaradıb. Məni nə ərəb
yaradıb, nə fars, nə gürcü, nə də rus. Məni
Türk yaradıb və sevərək yaradıb. Bu mənada
hesab edirəm ki, bu gün özünə Türk deyən və
türkün birliyini, bütövlüyünü istəyən
kəslər, ələlxüsus da yazarlar, tarixçilər,
qələm sahibləri fikir söyləyərkən hadisələrə
məzhəb düşüncəsiylə, dini
düşüncəylə, təriqət düşüncəsiylə
deyil, əsil-kök, təməl prinsiplərilə
yanaşsınlar. İnsan dünyaya milli mənsubiyyətilə
gəlir, dini mənsubiyyət sonradan qazanılmış mənsubiyyətdir.
Yəni öncə Allah mənə nəyi veribsə ona sahib
çıxacağam, ondan sonra ikinci və
üçüncüyə. Amma mən birinciyə sahib olmadan
o birilərə sahib ola bilmərəm. Milli kimliyinə sahib
olmağı bacarmayan bir millət dini kimliyinə sahib ola bilməz.
Bölünüb-parçalanar, itər. Bu mənada Şah
İsmayılla bağlı istəklərim var, eləcə də
Sultan Səlim Yavuzla. Bu gün bizim Türkiyəmizdə
“Möhtəşəm yüzyıl” serilalı çəkilir
və filmin müəyyən yerlərində bizə, ən əsası
Şah İsmayıl Xətaiyə həqarət edən fikirlər
səslənilir. Mən bunun qəti əleyhinəyəm və
düşünürəm ki, o şəkildə tarixi hadisələrə
və tarixi şəxsiyyətlərə yanaşanlar
çox böyük səhv edirlər, bunun yumşaq adı
“türk düşmənçiliyi”dir. Bilmirəm sərt
adı nə şəkildə olar. Tarixə bu cür
yanaşmaq olmaz.
Mənim
o zaman arzuladığım həmin o Şah İsmayıl
insanları sevən, işıq gələn adamları himayə
edən, savaşa hazırlaşdığı vaxt ölkəsinin
sənətçilərini, ziyalılarını,
yazarlarını, rəssamlarını, şairlərini
ölkənin ən dərin yerində gizlədib mühafizə
edən - biz ölək, onlar qalsınlar, çünki bizim
millətimizi onlar yaşadacaqlar - düşüncəsinin
sahibi olan bir kəsə ona yaraşmayan adlar qoymaq olmaz. Mənim
Şah İsmayılım bu cür adamdır.
- Nurəddin bəy, biz bilirik ki,
Türkçülük Tanrının istədiyi şəkildə
yaşam tərzidir. Amma bizim dırnaqarası
türkçülər bunun əksini iddia edirlər. İstər
dünyada, istər bu yeddi türk dövlətində olsun,
istərsə də Azərbaycanda Tanrının istədiyi
şəkildə yaşam tərzini kimlər yaşayır?
- Bəli,
Türklük, bir yaşam tərzidir, Türklük bir əxlaq
sistemidir, bir mənəviyyat və dəyərlər sistemidir
və bir ilkdir. Türk millətinin taleyinə, tarixinə, adət-ənənəsinə
baxın. Dünyaya baxış fəlsəfəsinə, ailə
fəlsəfəsinə baxın. Dünyanın bütün
xalqlarından başqalarına yanaşma tərzi ilə,
Allaha, təbiətə, Yaradanın yaratdıqlarına
münasibəti ilə fərqlənir və seçilir. Siz
fikir verirsiniz, dünya tarixində bir çox xalqlar
üç-dörd ölkəni ələ keçirib və
faşizmə uğrayıb, Türk dünyaya hökm edib,
amma türk faşizmi deyilən bir anlayış olmayıb,
olmayacaq da. Nədən, bilirsinizmi? Siz bütün xalqların
mifolojisinə bir baxın, ən əvvəl elə burdan
başlayır fərqlilik, bütün dünya xalqlarının
mifolojisində var ki, Allah insanı palçıqdan
yaratdı, sonra ruhundan üfürdü və insan yarandı.
Amma Türkün yaranış mifolojisinə baxın və
bundan sonra bunu necə başqa millətlərlə
yanaşı qoymaq olar? Göydən düşən
işıq su ilə qovuşur, su hamilə olur, ondan Oğuz
doğulur, mələklər onu ağacın koğuşuna
aparırlar, bir Bozqurd peyda olur, Oğuzu götürüb tərbiyə
edir. Bu, necə Bozqurddur? Ağzından od çıxan,
gözləri işıq saçan bir Qurd. Bu, Türkün
yaradılış fəlsəfəsidir, mifolojisindədir.
İndi artıq elm də sübut eləməyə
başlayıb ki, Yer üzünə həyat göydən gəlib.
Niyə biz öz mifolojimizdəki həqiqət köklərimizin
olmasına inanmayaq? Var axı. Türk üçün müqəddəs
sayılan şeylər həmin Yaranış fəlsəfəsində
olan şeylərdir. İşıq, Su, Ağac, Qurd. Demək,
Türk Tanrının sevdiyi, eyni zamanda
yaratdığıdır ki, onu çamurdan deyil,
işıqdan, nurdan yaratdı. Və ona görə də
soruşuram, siz mənə başqa bir millətin şifahi
xalq ədəbiyyatında, ya da eləcə söyləməsində
belə ifadələr tapa bilərsinizmi: “Özünü niyə
göylə aparırsan?”, “Sən göydən gəlmisən?”,
“Qurd ürəyi yeyib”, “İşıq haqqı”, “Su haqqı”
,”Ocaq haqqı”.
Siz
baxın, türklərin ayaqları altında olan Avropada bir
körpü sınmayıb, bir abidə uçulmayıb.
Tikilib və nə tikiblərsə, hamısı yerindədir.
Bəs elədisə niyə biz abidələrimizi yerin altından
tapıb çıxarırıq indi? Niyə? Çünki
onlar gəlib xaraba qoyublar. Elə bunun nəticəsidir ki,
onların bütün mədəniyyət abidələri
ortalıqdadır və yaşayır, bizimki isə
torpağın altından çıxarılır. Siz mənə
deyin görüm, bizim muzeylərdə bir ingilis, bir fransız
xalçası var? Nələrisə götürüb gətirmişik
bura? Xeyr! Avropanın bütün muzeyləri bizdən
apardıqları mədəniyyət abidələrilə
doludur. Xalçamız, palazımız, sənət abidələrimiz,
gil mədəniyyətimiz, metal işləmələrimiz,
paltar işləmələrimiz, geyimlərimiz, hətta əlyazmalarımız.
Talayıb aparıblar. Elə bunun özü göstərir
ki, bu gün Avropa mədəniyyəti adı altında bizə
sırınan bəzi şeylər var ki, o bizim əslində
öz sifətimizə xidmət edən şeylərdir. Bəli,
Avropada elə dəyərlər var ki, bəşəri dəyərlərdir,
biz də onlardan xali deyilik, sadəcə olaraq, sən
özün kimi yox, mənim kimi yaşayacaqsan deyəndə,
istər-istəməz özünü qoruma instinkti işə
düşür, yaxşı olan bir şeyi də özünə
yaxın buraxmamağa başlayırsan.
Bu
sırınanların insanlıqla, mədəniyyətlə, əxlaqla
heç bir bağlantısı yoxdur, ona görə də mənə
belə gəlir ki, biz öz milli missiyamızın, ümumiyyətlə,
dünyaya gəlişimizin nədən ibarət olduğunu
anlasaq, kimdənsə nəsə öyrənməyə
ehtiyacımız qalmaz. Türk milləti Tanrının sevdiyi
bir millətdir. Dünyaya işıq, mədəniyyət, rahatlıq,
asayiş gətirən bir millətdir. Var olduqca dünya məhvərindən
qopmaycaq. Atatürkün gözəl bir sözü var: “Əgər
nə zamansa rəssamlar Türkün simasını kayb etsələr,
yerinə YILDIRIMı çəksinlər!” Kimdir Atatürk?
Sınmış, dağılmış bir ölkəni
toparlayan, on dörd ölkəyə qarşı üz-üzə
dayanan və qələbə çalan, bir milləti yoxluqdan
var eləyən, yoxluqdan bir ölkə quran insan deyir bu
sözü. Biz özümüzü o yerə
qoymamalıyıq ki, nəyisə başımıza döyə-döyə
öyrətməyə çalışsınlar. Bir öz
böyüklüyümüzü dərk edəndə və
özümüzə sahib çıxanda bizdən yenidən
öyrənməyə başlayacaqlar.
- Bəlkə elə İŞIQdan,
NURdan yarandığındandır ki, Türk olan sevgisini, nifrətini
də gözündən od püskürməklə
çatdırır?
- Bilmirəm
fərqinə varmısız ya yox, millətlər öz
xarakter və xüsusiyyətlərinə oxşayan
heyvanları özlərinə totem seçiblər. Fikir
verin, Qurd savaşa necə gedir? Açıq-aydın. Gəlməmişdən
əvvəl bir dağ başına çıxır və
ulayır ki, bənd-bərəni, ev-eşiyini bağla, gəlirəm.
Düşmən üstünə getdiyini belə
açıq bəyan edir. Və ya ovuyla açıq
savaşa çıxır. Tülkü isə əksinə.
Gizlənir, sinsiyə-sinsiyə, özünü
ölülüyə vurur və ovunu oğurlayıb
qaçır. Dünyadan heç vaxt heç nəyi
oğurlamadıq. Heç vaxt heç kimi arxadan vurmadıq.
Açıq savaşa çıxdıq.
- Nurəddin bəy, niyə bu məsələləri
ortaya qoyacaq güclü bir ssenari, layihə yoxdur?
Türkiyə öz fikirlərini bax
elə o serial vasitəsilə deyir, amma biz başdan-ayağa
sponsorları reklam edən, heç bizə yaraşmayan
ssenarilərin səhnələşdirilməsi ilə məşğuluq...
- Mən
bilmirəm Azərbaycan televiziyalarında hansısa bir ciddi
iş görülür, ya yox. Bəlkə bundan sonra nələrsə
olacaq, amma bu vaxta qədər ümumiyyətlə bu
mövzuya toxunulmayıb. Tarixi mövzuda da bir, ya iki əsər
var. “Hökmdarın taleyi”, bir də ki “Cavad xan” filmidir, son illərin
filmləri.
- Bizim
heç doğru-düzgün Koroğlumuz da yoxdur...
-
Bilirsinizmi niyə? Hamı hər şeyi dövlətdən
gözləyir. Xeyr, dövlətin başqa işləri var.
Bu günkü Azərbaycan respublikasının kifayət qədər
ciddi problemləri var. Bəs bu ölkədə milyonlar qazanan
bizim iş adamlarımız nə ilə məşğuldurlar?
Onlar nə səsi, nə əxlaqı, nə mənəviyyatı,
nə də sənəti olan birinin altına birdəfəyə
100-150 minlik maşınlar qoya bilirlər, amma Azərbaycanın
tarixi-taleyilə bağlı bir tamaşanın ortaya
qoyulmasına qəpik verməyə canları
çıxır? Və yaxud hansısa cennifer lopezləri, van
damları, kimlərisə sünnət məclisinə gətirmək
üçün iki-üç milyon pul xərcləyirlər...
Mənə belə gəlir ki, birmənalı şəkildə
bu adamların bu millətə bir aidiyyatı yoxdur. Biz bizə
aid olmayanları da azərbaycanlı kimi təqdim etməklə
özümüzü kiçildirik. Bu adamların nazı ilə
bu şəkildə oynamamalıyıq. Onlar qoy getsinlər o gətirdikləri
adamlarla oturub-dursunlar, onlara pul paylasınlar. Mətbuat
işçilərimizdə də günah var, bəzi
adamların təbliği ilə elə məşğul
olurlar ki, düşünürsən, ilahi, bu, Azərbaycan
üçün nə eləyib, görəsən? Bəlkə
gedib bizim bir rayonun dərdinə-sərinə qalıb? Nə
edib axı? Moskvada klip təqdim elədi, Avropada oyun
çıxardı, axı, bunlardan mənə nə?!
İstehsalatdakı bugünkü inkişaf gözəldir,
yeni iş yerləri-filanlar, amma bütün bunları idarə
edəcək və mədəniyyət sahiblərini,
taleyini-tarixlərini tanımayacaq bir cəmiyyət sabahkı
gün bütün o varidatın içərisində belə
xoşbəxt ola bilməyəcək və özünün
sahibi olmayacaq. Millətin varlığını saxlayan, nəsildən-nəslə
aparan onun yazısıdır, sənətidir, onun ədəbiyyatıdır,
mədəniyyətidir. Min illər əvvəl belə olub,
indi də belədir, min il sonra da belə olacaq. Ona görə
də Hacı Zeynalabdin Tağıyevi körpə uşaq da
tanıyır. Çünki o, bu millətdən
qazandıqlarını bu millətin mədəniyyətinə
xərclədi, ona görə adına küçə də
var, heykəl də. Adına tamaşalar qoyulur, filmlər çəkilir. Sevilir, rəğbətlə
anılır. Kim o əməlin sahibidir, bundan sonra da
anılacaq, kimlər deyil, onların ömrü pulları bitənə
qədərdir. Bunu dərk etsək və belə
düşünməyə başlasaq, o zaman artıq bizim
özümüzə qayıtmaq prosesimiz başlayacaq. Ona
görə Oğuz xaqan deyirdi:
“Ey
Türk, titrə və özünə dön! Sən
özünə dönəndə böyük olursan!”
Nigar İsfəndiyarqızı
Kaspi.-2012.-15 may.-S.11.