Avropanın musiqi bayramı finala çatdı

57-ci “Eurovision” mahnı müsabiqəsinin bir ildir davam edən və getdikcə yüksələrək kulminasiya həddinə çatan həyəcanına bu gecə Bakıda son qoyulacaq

Odlar Yurdu Azərbaycan bu il dünyanın ən nüfuzlu musiqi yarışması olan “Eurovision” mahnı müsabiqəsinə ev sahibliyi edir. Hazırda bütün dünyanın musiqisevərləri qonaqpərvər Azərbaycan xalqının dostluq məşəlinin başına toplaşıb. "Eurovision-2012" mahnı müsabiqəsi "Öz məşəlini alovlandır" ("Light your fire") şüarı altında insanları bir araya gətirib. Bu məşəlin işığı müsabiqənin 42 ölkəni təmsil edən nümayəndələri, dünyanın hər yerindən gələn qonaqlar və jurnalistlər də daxil olmaqla hamını məftun edib. Paytaxtımızın möhtəşəm ünvanlarının birində - Bayraq meydanında yerləşən "Baku Crystall Hall"da keçirilən müsabiqə təşkilatçılıq səviyyəsinə görə də qeyri-adiliyə imza atıb.

“Azərbaycan, sən möhtəşəmsən” fikirlərini müsabiqənin iştirakçısı olan həm yerli tamaşaçılar, həm də xarici qonaqlar ürəkdən dilə gətirirlər. Onlar "Eurovision-2012"nin təşkilatçılıq səviyyəsini hətta digər ölkələrdə keçirilən yarışmalardan daha üstün qiymətləndirirlər. Azərbaycan paytaxtının gözəlliyi və qədimliyi, milli mətbəximizin sözəgəlməz dadı və ləzzəti, insanların qonaqpərvərliyi, mehribanlığı onları məftun edib.

Onlar Azərbaycanın bir ev sahibi kimi qonaqlarına göstərdiyi lütfkarlıqdan, diqqətdən, qayğıdan, ehtiramdan danışırlar. Müsabiqənin birinci yarımfinalı zamanı "Baku Crystal Hall"un 18 ölkənin bayrağı rəngində işıqlandırılması – müsabiqə tarixində ilk dəfə nümayiş olunan şounun "Crystal Hall"a qeyri-adi bir gözəllik və möhtəşəmlik bəxş etməsi elə əsas yarışma başlamamışdan öncə müsabiqənin qeyri-adi keçəcəyindən xəbər verib. Qonaqlar "Baku Crystal Hall"u isə müasirliyi ilə unikal bir tikili adlandırıblar. Əcnəbi jurnalistlər söhbətləri zamanı bildirirlər ki, Bakıda keçirilən "Eurovision-2012" mahnı müsabiqəsi möhtəşəmliyi ilə uzun müddət yaddaşlardan silinməyəcək.

Portuqaliyalı telejurnalist Pedro Souza ölkəmizdə olduğu günlərdə yaşadığı gözəl anları belə ifadə edir: “"Eurovision" mahnı müsabiqəsinin keçirildiyi arena dünyada gördüyüm ən möhtəşəm kompleksdir. Bütün bunlardan sonra rahatlıqla söyləyə bilərəm ki, ölkəniz təkcə musiqi yarışmalarına deyil, eyni zamanda digər böyük beynəlxalq yarışlara da ev sahibliyi etməyə layiqdir”. İsveçli jurnalist Stefan Erikssonun fikirləri də maraqlıdır: Bir çox mahnı müsabiqəsinin iştirakçısı olmuşam, lakin belə bir təşkilatçılığın ilk dəfədir ki şahidiyəm. Hər şey möhtəşəmdir. Təşkilatçılıq isə daha da gözəldir. Elə düşünürəm ki, "Crystal Hall" dünyanın ən böyük konsert zallarından biridir. Müsabiqə çərçivəsində səhnədəki işıq effektləri, ölkəniz haqda videoçarxlar və sonda qavaldaşda ifa edilən Azərbaycan folklor sənəti – heyrətamizdir”.

Dünyanın nüfuzlu mətbuat orqanları müsabiqəyə geniş diqqət ayırıblar. Məsələn, İngiltərənin “The Independent” qəzetində dərc olunmuş məqalədə deyilir: “Bakının hava limanı yarışın reklamı ilə al-əlvan bəzədilib. Eyni şeyi Azərbaycanın paytaxtındakı hər bir avtobus və ya taksiyə, eləcə də bir çox binalara aid etmək olar. Xüsusi olaraq müsabiqə üçün inşa olunmuş 25 min yerlik konsert zalı vaxtında təhvil verildi və onun açılışında ölkə prezidenti şəxsən iştirak etdi. Heç bir gün axşam xəbərləri bu hadisə (“Eurovision 2012” mahnı müsabiqəsi) haqqında coşğun süjetsiz keçmir”.

Rekord sayda tamaşaçı

Mətbuat Mərkəzində digər ölkələrdə keçirilən müsabiqələrə nisbətən jurnalistlərin sayının çoxluğu isə bu yarışmaya dünyada marağın çox böyük olmasından xəbər verir. “Eurovision” mahnı müsabiqəsinin birinci yarımfinalını "Bakı Kristal Zalı"nda rekord sayda tamaşaçının izləməsi də yarışmaya olan böyük maraqdan xəbər verir. “Eurovision” mahnı müsabiqəsinin təşkilati rəhbəri Sietse Bakker də bunu etiraf edib: “Müsabiqənin gec saatlarda keçirilməsinə baxmayaraq, insanların bu şouya böyük marağının şahidi olduq”.

Müsabiqənin icraçı rəhbəri Yan Ola Sand 1-ci yarımfinaldan sonra keçirilən mətbuat konfransında həm “Crystall Hall”u, həm də müsabiqənin builki Mətbuat Mərkəzini bənzərsiz adlandırıb: ““Eurovision” müsabiqəsi Azərbaycanda ilk dəfə keçirilir və bu müsabiqədə 42 ölkə təmsil olunur. Azərbaycan 2008-ci ildən müsabiqədə yüksək səviyyəli ifaçılarla təmsil olunur. İlk dəfədir ki, “Eurovision” yeni tikilmiş bir məkanda keçirilir. Bu məkan heç bir sınaqdan çıxmayıb, məşqlər və şoularla bu məkan sınaqdan keçir”.

Möhtəşəm final həyəcanı

Artıq ölkəmizdə keçirilən “Eurovision-2012” mahnı müsabiqəsinin bütün finalçıları məlumdur. Hazırda paytaxt Bakıda 57-ci “Eurovision” Mahnı Müsabiqəsinin final həyəcanı yaşanır. Belə ki, 1-ci yarımfinalın nəticələrinə görə, Rumıniya, Moldova, İslandiya, Macarıstan, Danimarka, Albaniya, Kipr, Yunanıstan, Rusiya, İrlandiya təmsilçiləri finala vəsiqə qazanıblar. İkinci yarımfinalın nəticələrinə görə isə, Litva, Bosniya və Herseqovina, Serbiya, Ukrayna, İsveç, Makedoniya, Norveç, Estoniya, Malta, Türkiyə nümayəndələri finala çıxıblar. Finala birbaşa vəsiqə ev sahibi kimi Azərbaycana və böyük beşlik ölkələri olan Almaniya, Fransa, İtaliya, İspaniya, Böyük Britaniyaya verilib. Finala vəsiqə qazanan bütün iştirakçılar finalda çıxış etməkdən qürur duyduqlarını bildiriblər.

Mayın 26-da «Baku Crystal Hall»da keçiriləcək finala vəsiqə qazanmış 26 ölkənin çıxış ardıcıllığı isə belədir: Böyük Britaniya, Macarıstan, Albaniya, Litva, Bosniya və Herseqovina, Rusiya, İslandiya, Kipr, Fransa, İtaliya, Estoniya, Norveç, Azərbaycan, Rumıniya, Danimarka, Yunanıstan, İsveç, Türkiyə, İspaniya, Almaniya, Malta, Makedoniya, İrlandiya, Serbiya, Ukrayna, Moldova.

Qeyd edək ki, ölkəmizi müsabiqədə Səbinə Babayeva “When the Music Dies” mahnısı ilə təmsil edəcək. Təmsilçimiz səhnəyə 13 nömrə altında çıxacaq. Azərbaycanın yenə də müsabiqənin favoriti olmasını söyləyənlər isə saysız-hesabsızdır.

Bu gün gecə möhtəşəm müsabiqənin final həyəcanı sona yetəcək. Təkcə qalib ölkənin təmsilçisi deyil, müsabiqənin bütün iştirakçıları, eləcə də qonaqlar Azərbaycandan ən xoş təəssüratlarla ayrılacaqlar. “Öz məşəlini alovlandır” şüarı ilə möhtəşəm müsabiqəyə layiqincə ev sahibliyi edən ölkəmizdən qəlblərinə bəxş edilən əbədi odla gedəcəklər. Gedəcəklər ki, bir də Odlar Yurduna qayıtsınlar!

Təranə Məhərrəmova

Kaspi.-2012.-26-28 may.-S.12.