ŞƏMS TƏBRİZİNİN
HEKAYƏTLƏRİ
ŞƏMS TƏBRİZİ haqda
Şəms Mövlananı Mövlana eləyəndi. Şəmslə qarşılaşana qədər Mövlana alimdi. Konyanın sevimlisi, kamil, fərasətli baş müdərrisidi.* Ağlın və onun övladı olan biliyin dairəsi içində dolaşan məntiqli İslam alimini cazibə adamına çevirən Şəmsdi.
Şəms qəfildən gəlir. Yaşı qırxı haqlamış Mövlananın bəlkə də heç gözləmədiyi, ümid eləmədiyi anda. Amma qırx peyğəmbərsayağı yaşdı. Üstəlik, son fürsətdi.
Qapı döyülür… taybatay açılır. Yolçu dinməzcə içəri girir. Yoldan keçirmiş… elə-belə baş çəkib… qala bilər…
Şəms qəribdi. Bu qəfildən gələn məğrur adam tamamilə başqa cür məğrurdu. Saxta təvazökarlığı təkəbbürə bərabər sayır, buna görə də ona nifrət eləyir. Qabiliyyət Allah vergisidisə, onu gizlətməyin də saxtakarlıq mənasına gəldiyini düşünə-düşünə məğrurdu. Dili ona görə bu qədər itidi. Qaydadan xaricdi, amma möcüzəlidi. Üstəlik, hər kəlməsində «bəla»ya dəvət var.
Şübhəli, naməlum, yad adamdı. Dayanacaq tanımayan yolçudu. Yolçunu yolundan saxlayan dilbərdi.
Şəxsiyyəti məlum deyil, amma nə olar; Şəmsin saçları Təbrizin gecəsidi. Üzü İsfahanın günəşidi. Günəşlə Ay onun kəlamından tökülür. Çünki, Şəms xatırladır. Nəhayət, böyük qarşılaşma baş verib.
Şəmsdi. Şəms “Günəş” deməkdi. Elə bir daşqın yaradır ki, Mövlananın əngin dənizlərə oxşayan, amma hələ də külək görməmiş, sakit, əmin-amanlıq hökm sürən ruhunda Ayın kiçik dənizlərin səthində yaratdığı qabarma-çəkilmələrin onun daşqını yanında adını çəkmək belə olmaz. Çünki, Mövlana okeandı.
İndiyə
qədər elə hey dənizlərin, ayların ardınca
gedib, ancaq indi Günəşin cazibəsinə tutulub.
Gündəlik
həyatın qarmaqrışıqlığından fərqli
miqyasda, su torpağa hopan kimi yox, iki su bir-birinə qovuşan
kimi qovuşurlar. Şəms Mövlananın həm canı, həm
cananı olur. Müridi və mürşidi olur. Əslində,
bərəkətin daşqını bu çoxluqdadı.
Kimin aşiq, kimin məşuq olduğu bu qovuşmada bəlli
deyil. Nə olar! Aralarındakı eşqdi. Zamanın, məkanın
və cinsiyyətin hüdudlarını çoxdan
aşmış, bu aşmaqla eşqin qaynağına gedib
çıxmış, ədəbsiz baxışlar tərəfindən
dərk edilməsi mümkün olmayan eşqdi. Dərk eləməyənləri
də həssas olmadıqlarına görə
bağışlamaq mümkündü, hardan dərk eləsinlər
ki?..
Sonu
o qədər qanlı gələcəyinə görə bəlkə,
Şəms bıçaq kimi Mövlananın
ömrünü ortadan düz ikiyə bölür. Əvvəllər
Mövlana nəydisə, artıq o deyil. Təmkinliydisə, təmkindən
əl çəkir, ağıllıydısa, ağlın
hüdudlarını dağıdır.
Şəms
sükut deyildi. Mövlana bu qədər fırtınanı
necə gəzdirdi? Necə oldu ki, bu qədər yandı, amma
külə dönmədi?
Şübhə
yoxdu ki, Təbrizlinin ən qabarıq təsviri şübhəliliyidi.
Amma onun şübhəliliyi şübhə yox, sirr
olduğuna görə belə işıqlandırır. Kim
olduğu, ailəsi, sülaləsi, mahiyyəti bəlli
olmamaqla birgə bu mücüzəli şübhəliliyə
ən uyğun gələn ad yenə də Şəmsdi.
Şəms… Demişdim ki, günəş deməkdi. Bəlkə
də buna görə Mövlana ayininin rəngi əvvəl
qaradı, ağ tənnurə* sonra açılır.
Adı
- Məhəmməd, atası - Əli, vətəni - Təbriz.
Vəssalam-şüttamam.
Başqa heç bir şey yoxdu. Nə olar, elə qalsın!
Çünki,
başqa bir şeyə ehtiyac yoxdu. Bu nə qədər səmimi
sözdü belə!
Şəmsə
də nə qədər yaraşır!
İki
qübbə var İslam aləmində: ikisi də
yaşıl, Qübbeyi-Hədradı. Biri Peyğəmbərin,
biri Mövlananın. İndi Mövlana Qübbeyi-Hədrasının
altındadı. Atası, oğlu, çələbisi* və
katibi. Səlahəddini və Hüsaməddiniylə üzərində
titrəyən zərif tünlüyünün arasındadı.
Qıyıb toxunmaq mümkün olmayan nəcib, nəzakətli
güldü; nazlı-qəmzəlidi. Vüqarlı-qururludu.
Şəhər adamıdı, incədi, nəzakətlidi, zərifdi.
Daha çox da zaman keçdikcə dərk olunur. Şəms
uzaqdadı. Öz naməlumluğundadı. Bir guşədədi.
Tənhalığındadı. Tənha yatır.
Tənhalıq eşqin vəkalətidi. Ölüm eşqin yüngülləşməsidi.
Hər eşq bir baş aparır. Bu dəfə baş verən Şəms olub.
Nazan Bəkiroğlu
HEKAYƏTLƏR
QƏLBLƏRİ ÇÜRÜDƏN
XASİYYƏTLƏR
On pis xasiyyət
üzündən qəlbləriniz
ölüb. «Allah qəlbləri
ölənlərin duasını
qəbul etməz.» On pis xislət
bunlardı:
1. Allahı tanıdığını
iddia eləyir, amma ona olan
borcunuzu vermirsiniz. Bu borcu, fəqir
və möhtaclara ehsanla ödəyin.
2. Quran-Kərimi oxuyursunuz, amma hökm və qanunlarından xəbəriniz yoxdu. Oxuduqlarınızı həyata keçirin.
3. Şeytanın düşməniniz
olduğunu iddia eləyir, amma ona itaət göstərirsiniz. Onun təkliflərindən
boyun qaçırın.
4. Özünüzü Mühəmməd ümmətindən
sayır, amma sünnəni həyata keçirməyə çalışmırsınız.
5. Cənnətə girmək
istədiyinizi deyir, amma ona girmək
üçün zəruriiəməllərin
heç birini etmirsiniz.
6. Oddan aralı durmaq istəyir, amma günahlarınızla,
pis əməllərinizlə
özünüzü daim
ona doğru sürükləyirsiniz.
7. Ölümün hamının
başına gəldiyini
bilir, amma ona heç bir hazırlıq görmürsünüz.
8. Bütün din qardaşlarınızın
nöqsanlarını görür,
amma öz nöqsanlarınızı görmürsünüz.
9. Allahdan gələn bütün nemətlərə
şükr eləmədən
yeyir, istifadə eləyir, amma ona olan minnətdarlığınızı
sizə bəxş elədiyi nemətlərdən
möhtaclara verməklə
göstərmirsiniz.
10. Ölülərinizi, eyni sonun sizin
də başınıza
gələcəyini billə-bilə,
ibrət almadan basdırırsınız».
Peyğəmbərlər və vəlilər güzgü kimidilər; güzgülər bizə
üzümüzdəki çirkləri
göstərdikləri kimi,
övliyalar da sizə səhvlərinizi göstərirlər.
RUH
Ruh bu dünyaya aid deyil. Haqq mərtəbəsindən
gəlib. Ruh bədənə
girəndə, elə
bil, qəfəsə salınır. Orda həbs
həyatı yaşayır.
Bədənimizdə bir
çox başqa şey eləməyimizə
şərait yaradan orqanlar var: məsələn,
ürəyimiz. Amma bədəndə
bu fiziki intuisiyaları əmələ
çevirəcək güc
olmadığına görə
ruhdan kömək alır. Güc ruhdadı; amma
vasitələr bədəndədi.
Ruh bu vasitələri istənməyən
əmələ çevirəndə,
o zaman ruhun xüsusiyyətlərindən danışmaq
olar. Allah çirkin və pis olan
heç bir şey yaratmayıb. Pis və çirkin olan bizim öz
cüzi iradəmizlə
elədiyimiz sui-istifadələrdi.
İndi
bu vəziyyətdə
pis hərəkətlərimizdən
kim məsuliyyət
daşıyır, bədənmi,
ruhmu? Qiyamət günündə bədən ruhu, «Pislik eləməyə gücüm yoxdu» deyə, ruh da bədəni «Pislik eləməyə vasitəm yoxdu» deyə günahlandıracaqlar.
Bir-birlərini günahlandırmalarına
bu cavab veriləcək: Siz pislikdə bir-birlərinə
yardım eləmiş
olan götürümə
və kora oxşayırsınız. Götürüm
görür, qərarları
verirdi: amma korda pisliyi etdirəcək
bədən və güc vardı. İkisi də günahkar idilər.
Nəfs öz-özlüyündə pis
şey deyil. Nəfsinizi qəti
günahkar eləməyin.
Təsəvvüfi təhsilin vacib
bir qayəsi də nəfsin mərtəbəsini ucaltmaqdadı.
Nəfsin ən aşağı
mərtəbəsində ətrafımız
tamamilə cismani və şəhvani arzularla əhatə olunub. İkinci səviyyədə elədiyimiz bütün pislikləri görüb özünüzə qəzəblənirsiniz,
hər şeyi Allahın rizasına uyğun eləməyə
çalışırsınız. Bir sonrakı səviyyədəsə
istər xeyir olsun, istər şər, Allahdan gələn hər şeyə razı oluruq.
Allah, «Biz Adəmə öz ruhumuzdan üfürdük» buyurmuşdu. Bax, ölüm anındakı
«Rəbbinə qayıt!» əmrinə qədər bədəndə
həbs olan ruh, həmin ruhdu. Ruhun ən aşağı
səviyyələri bədəni
tərk eləmək istəmir. Artıq, az qala,
bədənin bir parçasına çevrildiklərinə
görə oranı tərk eləməmək
üçün üsyana
qalxırlar.
PEYĞƏMBƏRLƏRİN VƏ
VƏLİLƏRİN RUHU
Onların ruhları bizimkilərdən
tamamilə fərqlidi. Daha təmizdilər.
Bu kamil insanların
bədənindəki dünyəvi
maddələr dünyanın
ən müqəddəs
və təmiz yerlərindən götürülüb.
Bədənləri pislik işləmədiyi,
tamamilə təmiz olduğu üçün
ruh belə bədənlərə girəndə
qətiyyən çirklənmir.
“Nəfsini tanıyan
Rəbbini tanıyar» sözünü, az qala, hamı bilir. Bunun iki mənası
var.
İlk mənası budur: öz ehtiyacımızı,
arzumuzu, zəifliklərimizi
bilir, bunun yanında sonsuz qüdrət sahibi olan Allaha iman
gətiririk. Daha sonra da bizi bu dünyada
qidalandıran, geyindirən,
daldalanacaq verən hamiyə ehtiyacımız
olduğunu bilirik.
İkincisi daha sirli izahdı. Allah «Sizə şah damarınızdan daha yaxınam» buyurub. Özümüzü tanıma müddətində
Allahla olan bu dərin əlaqəni
kəşf eləməyə
başlayırıq. Bu
əlaqədən istifadə
eləyib Haqqa çatırıq. Bu dünyada olanda Allaha qayıtmaq, yəni ölməmiş yalnız və yalnız O-nun əmrlərinə
əməl eləməklə
mümkündü. Allahıın arxasınca getməyib şeytana uyanlar ayrılacaqlar.
Bir salxım
üzümü fikirləşin. Salxımdan
qopan hər dənə dərhal çürüyür: amma
qoparılmayanlar uzun yaşayırlar. Üzüm dənəsi salxımda
qaldığı müddətdə
qidalanır. Hər şey
eynidi, zati etibarilə də gözəldi. Çirkin olan
yalnız zahiri xüsusiyyətlərdi.
YUXULARIMIZ
Yuxuda olanda ruh qəndildən düşən işıq
kimi bədənlə
olan əlaqəsini qırmamaq şərtilə
onu tərk eləyir. Bu işıq
gizli guşələrə
qədər uzanıb
özüylə əlaqəli
olan bölümləri
«oxuyur». Yatanda əl
fənərinin söndürülməsi
kimi ruh da vücuda geri qayıdır. Ruhun bu cür uzaqlara
uzanmasının nəticəsində
normal vəziyyətdə elmimizə
çevrilməsi mümkün
olmayan bir yığın şeyləri
öyrənə bilərik.
Amma bu öyrəndiyimiz hər zaman üçün ilahi elmin bir hissəsidi.
Yuxuda şeylər
və simvollar var; onları yalnız həqiqətən
bilikli olanlar oxuya bilərlər; amma həmin simvollardan çıxarılan
məna səviyyədən-səviyyəyə,
adamdan-adama, ruhdan-ruha fərqlənir.
Hər bir adamda yeddi cür
ruh var. Ruhi-mədəni,
ruhi-nəbati, ruhi-heyvani,
ruhi-insani, ruhi-mələyi,
ruhi-sirr və ruhi-sirrüs sirr. Yuxudakı simvollar
bağlı olduqları
ruh səviyyəsinə,
onları dərk eləyən ruha və görən adama görə fərqlənirlər. Sultan
köləylə eyni
yuxunu görə bilər, amma mənaları fərqlidi.
Yuxunu
hansı səviyyəli ruhun gördüyü çox vacibdi.
Ruhi-heyvani və ruhi-nəbatinin gördüyü yuxular
adamın məqsədlərini və nəfsi arzularını
əks etdirir. Məsələn, ac yatsanız, yuxunuzda
böyük ehtimalla yemək yediyinizi görərsiniz.
Ruhi-insani simvollar görür. Məsələn, ilan mal mənası
verə bilər, amma dərviş görəndə alt dərəcədəki
ruha işarə ola bilər.
ÖLÜM QORXUSU
Peyğəmbərimizin
bir hədisi var: «Möminlər ölməzlər, amma nəql
olurlar». Yəni, ölüm ayrı şeydi, nəql olmaq
ayrı şeydi. Məsələn, sən dar və
qaranlıq evdəsən, orda gəzə bilmirsən:
ayaqlarını uzada bilmirsən, amma ordan, geniş
bağçalı guşəyə nəql olsan, buna
ölüm demək olarmı? Bu sözlərim güzgü
kimi lap aydındı. Əgər səndə aydınlıq və
zövq varsa, ölümü arzula (qorxma). Allah sənin
köməyin olsun! Təbrik eləyərik, məni də
dualarından əksik eləmə. Əgər belə bir
zövq və arzu səndə yoxdusa, onda bu cür
zövqü yarat, axtar, cəhd elə; çünki, Quranda
bunu necə eləyəcəyin haqqında bu məlumat var: «Əgər
səmimi möminsinizsə, ölümü
arzulayarsınız» (“Bəqərə”, 94). Kişilər və
qadınlar arasında mütləq belə səmimi imana malik
olan adamlar var. Bu sözlər sizə güzgü olsun, öz
halınızı da həmin güzgüdə görün.
Ölümə nifrət eləmədikcə hansı halda və
işdəsinizsə yaxşı hesab olunur. Bir işdə və
halda çəkingənlik oldumu, bu güzgüyə baxıb
qərar ver. Parlaq işıqda oturub ölümə
hazırlaş, gözlə və ya cəhd göstərən
kimi, sən də cəhd göstərib bu halı əldə
elə.
İgid
olan adam sıxıntılı vəziyyətində xoş və
kədərli vaxtı xoşbəxt olmağı bacaran
adamdı: çünki, muradlar muradsızlıq içində
gizlənib. Ümidsizliyində nə qədər ümidlər
var, amma dərhal narahat olmaq əsl ümidsizlikdi. Mən
qızdırmalı, xəstə ola-ola xoşbəxtdim;
çünki bilirdim ki, sabah sağalacağam, sağlam ola-ola
sabah xəstə ola bilərəm, belə
narahatlığım vardı. Bəzən deyirlər, «O yeməyi
yeməsəydim, bu gün xəstə olmazdım». Bu sözlərdə
təsəlli axtarırlar. İgid olansa, hər cür
sıxıntıya dözməyi bacaran adamdı. Onun
böyüklüyü budur. O, bu cür kamil insan olub.
Tərcümə edən: Nəriman
Əbdülrəhmanlı
Kaspi.-2012.-3-5 noyabr.-S.16.