Etimada sədaqətlə 20 il
“Çağ Öyrətim
İşlətmələri” şirkətinin fəaliyyətə
başlamasının 20 illik yubileyi keçirilib
Noyabrın
27-də Gülüstan sarayında “Çağ Öyrətim
İşlətmələri”nin fəaliyyətə
başlamasının 20 illik yubileyi münasibəti ilə
"Etimada sədaqətlə 20 il " devizi altında təntənəli
yubiley tədbiri keçirilib. Yubiley mərasimində tədbir
iştirakçıları türk dünyasının iki nəhəng
şəxsiyyətinin - ümummilli lider Heydər Əliyevin və
Mustafa Kamal Atatürkün xatirəsini bir dəqiqəlik
sükutla yad ediblər. Təntənəli yubiley gecəsi Azərbaycanın
dövlət himni və Türkiyənin istiqlal
marşının oxunması ilə açıq elan edilib və
"Çağ" Öyrətim İşlətmələrinin
20 illik fəaliyyətindən bəhs edən video-çarx
nümayiş olunub. Yubiley tədbirində Türkiyənin
prezidenti Abdulla Gülün təbrik məktubu oxunub. Mərasimdə
görkəmli dövlət xadimləri, elm adamları,
"Çağ Öyrətim" İşlətmələrinə
daxil olan liseylərin rəhbərləri, Qafqaz Universitetinin məzunları
və media nümayəndələri iştirak ediblər.
"Çağ"
Öyrətim İşlətmələri İdarə Heyətinin
sədri Enver Özeren çıxışında tədbir
iştirakçılarına bu özəl gündə onlara
dəstək olduqları üçün təşəkkürünü
bildirib və son 20 ildə Azərbaycanın inkişafından
söz açıb, bu prosesin bu gün də davam etdiyini qeyd
edib. “Çağ Öyrətim”in təhsilimizə verdiyi
töhfələrdən söz açan sədr bu qurumun
ölkədə beynəlxalq standartlı təhsil müəssisəsi
olmaqla ümummilli lider Heydər Əliyevin inam və
etimadına sədaqətlə xidmət etdiyini
vurğulayıb: “Fəaliyyətinin ilk günündən bu
günədək 20 il ərzində məqsədi yalnız
müsbət elmlərlə, milli və ümumbəşəri
dəyərlərlə zəngin yeni nəsillər
yetişdirmək olan “Çağ Öyrətim”
özünün Azərbaycan Türkiyə ümumtəhsil məktəbləriylə,
“Araz” Hazırlıq Kursları, Qafqaz Universitetinin fəaliyyəti
ilə göstərilən etimada sədaqətlə xidmətini
nümayiş etdirir. Tələbələrimiz öz bilik və
bacarıqları ilə Azərbaycanı həm bölgələrdə,
həm də dünyada şərəflə təmsil edirlər.
Beynəlxalq fənn olimpiadalarında alınan 520-dən
çox alınan medal, hər il məzunların 99 faizinin
ölkəmizin və dünyanın seçkin ali məktəblərinə
ən yüksək balla qəbul olunması və Prezident təqaüdü
ilə təhsil alanların sayının ilbəil artması
da bunu sübut edir. “Çağ Öyrətim”in tələbələri
dünyanın dörd bir yanında ən məşhur
universitetlərdə aldıqları təhsillə, elmi dərəcələrlə,
ən əsası əxlaqi dəyərlərə sahib
olmaları ilə fərqlənirlər”. Ənvər
Özeren bildirib ki, “Çağ Öyrətim” bu gün
möhkəm dayaqlar üzərində fəaliyyətini davam
etdirir və onun maddi-texniki bazası durmadan yüksəlir. ”Əgər
20 il əvvəl müəssisələrdə azərbaycanlı
müəllimlərin sayı azlıq təşkil edirdisə,
bu il dərs keçən müəllim və akademik səviyyədə
kadrların 80 faizdən çoxu azərbaycanlı müəllimlərdir.
Bu gün dünyanın hansı ölkəsinə getsəniz
orada Azərbaycanı ləyaqətlə təmsil edən
kadrlarla qarşılaşacaqsınız” – deyə Ə.Özərən
vurğulayıb.
Tədbirdə
iştirak edən təhsil naziri Misir Mərdanov şirkətin
20 illik yubileyini təbrik edib, “Çağ Öyrətim”in
keçdiyi keşməkeşli yollardan və qurumun
uğurlarından danışıb. O şirkəti
yaradanların ulu öndərə verdikləri sözə sədaqətlə
əməl etdiklərini vurğulayıb. Nazir tədbirdə
Azərbaycanda təhsilimizə göstərdiyi xidmətlərinə
görə “Çağ Öyrətim” şirkətinin bir
qrup əməkdaşını fəxri fərmanlarla və
“Azərbaycan Respublikasının qabaqcıl təhsil
işçisi” döş nişanı ilə təltif edib.
Bakı
Dövlət Universitetinin rektoru, Akademik Abel Məhərrəmov
qurumu 20 illik yubileyi münasibətilə təbrik edib və
bu günü Azərbaycan və Türkiyə təhsilinin
böyük bayramı kimi qeyd edib. Abel Məhərrəmov
ölkəmizin çətin vəziyyətlərində
Türkiyənin bizə əl tutmasından söhbət
açıb. “O zamanlar hər kəs Azərbaycanda öz
biznesini qurmağa çalışırdı. Kimi ticarət
işi qurmaq istəyirdi, kimi şirkətlər açmaq istəyirdi.
Yalnız “Çağ Öyrətim” şirkəti Azərbaycanda
əsl iş gördü. Digər şirkətlər
bağlandı, yaxud inkişaf etdi, ancaq bunların içində
ən çox tarixi mövqe tutan “Çağ Öyrətim”
oldu. Çünki biri digərinin cibinə pul qoyanda o xərclənib
gedər, məsləhət verirsə, savad verirsə, bu
ömür boyu davam edər. Buna görə də bu şirkətin
tarixi xidmətini Azərbaycan xalqı heç vaxt yaddan
çıxarmayacaq”.
Sonda
Abel Məhərrəmov qurumun məzunlarından Nobel
mükafatı gözlədiyini bildirib.
Tədbirdə
iştirak edən Türkiyə Böyük Millət Məclisi
sədrinin yardımçısı Mehmet Sağlam qurumu
yubiley münasibətilə təbrik etdikdən sonra Heydər
Əliyevlə bağlı xatirəsini qonaqlarla
bölüşüb və müəllimlərə böyük
qiymət verməklə onların türk dünyasının
gələcəyini inşa etdiklərini bildirib.
Yubileyin
sonunda 20 illik fəaliyyətlərində seçilən məzunlar
müəyyən hədiyyələr və fəxri fərmanlarla
mükafatlandırılıb.
Qeyd
edək ki, “Çağ Öyrətim” şirkəti
hazırda 10 lisey, 1 gimnaziya, 1 ibtidai məktəb, 13 ali təhsil
hazırlıq kursları və 1 universiteti özündə
birləşdirir. Şirkət 1992-ci ildə fəaliyyətə
başlayıb, ayrı-ayrılıqda onun bütün müəssisələri
Beynəlxalq TSE-EN-ISO 9000:2008 sertifikatını alıb.
AYGÜN CƏFƏRLİ
Kaspi.-2012.-29 noyabr.-S.9.