“START”a start verildi

Bakıda sayca 8-ci dəfə keçirilən Beynəlxalq film festivalı başladı

Hər il mütəmadi olaraq keçirilən Gənclərin “START” Beynəlxaq Film Festivalı özünün 8-ci ömrünü yaşayır. Belə ki, noyabrın 28-də Nizami Kino Mərkəzində bu ilki yarışma açıq elan olundu. Festivalın əsas məqsədi beynəlxalq ölkələr arasında gənclərin rejissorluq baxımından özlərini sınaması və özlərinə inam qazanmalarıdır. Hər dəfə maraqlı filmlər təqdim olunan bu festivalda elə bizim yerli gənc rejissorlarımızın da filmləri təqdim olunur və onlar əcnəbi filmlərdən heç də geri qalmır.

Festivalın aparıcısı Kamilə Babayeva və səhnə arxasından səsi ilə tədbiri idarə edən Qurban Mənsimov tamaşaçıları salamlayıb builki festival barədə tamaşaçıları bilgiləndirdi.

Gənclər və idman nazirinin müavini İntiqam Babayev festivalın ənənəvi layihəyə çevrildiyini vurğuladı: ”Festivalın keçirilməsi istedadlı gənclərin ikinci respublika toplantısına təsadüf edir. Bu festival filmdə çalışan gənclər arasında böyük bir təcrübədir. Bir neçə il öncə bu festivalda 3-4 əcnəbi film nümayiş olunurdusa, indi 20-dən çox xarici film nümayiş olunacaq. Bu özü də bir irəliləyişdir. İnanıram ki, 9-10-cu “START” film festivalında daha çox əcnəbi filmin nümayişi gerçəkləşəcəkdir. Azərbaycan gənclərinin böyük yaradıcılıq potensialı var. Dövlət qurumlarının üzərinə düşən əsas vəzifə isə həmin gənclərə lazımi şəraiti yaratmaqdır”.

İranlı rejissor, ssenarist, jüri qismində çıxış edən Təhminə Milani Azərbaycanın öz vətəni olduğunu, burada belə festivalın keçirilməsini yüksək qiymətləndirdiyini bildirdi: ”Bu gün çox xoşbəxtəm. Çünki 8 yaşımda öz vətənimi, Azərbaycanı tərk etmişəm. İndi mən öz vətənimdəyəm, sevincimin həddi-hüdudu yoxdur. Vətən həsrəti ilə yaşayan bir insanın doğma vətəninə jüri kimi gəlməsi necə bir hissdirsə, indi mən o hissləri yaşayıram. İnanıram ki, festivalın sonunda ədalətli seçim edəcəyik və layiqli namizəd qalib olacaq”.

Kamilə Babayeva festivalda Şəfiqə Məmmədovanı tamaşaçılara təqdim edərkən onu da qeyd etdi ki, o öz obrazlarında Şəfiqə xanımın jestlərindən istifadə etməyə çalışıb, baxmayaraq ki, tamaşaçılar bunu hələ də hiss etməyib.

Azərbaycanın xalq artisti Şəfiqə Məmmədova festivalın Qəmər Salamzadəyə ithaf edilməsi və bu münasibətlə də jüri heyətinin qadınlardan təşkil olunması barədə danışdı: ”Artıq bir neçə gündür ki, mən bu gənclərin içərisində özümü gənc kimi hiss edirəm. İndi mənim tələbələrim xalq artisti, əməkdar artistdirlər və mən bununla fəxr edirəm. İndi gənclərə böyük meydan açılıb, bütün bu festivallar onların özlərini realizə etmələri üçündür. Sonda ədalətli nəticələrin olmasına da heç kəsin şübhəsi olmasın. Onların əziyyətini yüksək qiymətləndirirəm. Ən böyük arzum isə filmlərimizin dünyada nümayiş olunmasıdır”.

Festivalın rəsmi hissəsi bitdikdən sonra festival iştirakçıları estrada ulduzlarımız Çingiz Mustafayev və Elnarə Xəlilovanın ifasında musiqilər dinlədilər. Sonda isə Xəyyam Abdullayev və Elməddin Alıyevə məxsus olan “Ağ qan” filmi tamaşaçılara təqdim olundu.

Qeyd edək ki, 3 gün davam edəcək pulsuz kino günləri Nizami Kino Mərkəzində öz seyrçilərini gözləyir.

Xəyalə Rəis

Kaspi.-2012.-30 noyabr.-S.16.