Ramil Səfərov vətənə gətirildi və əfv edildi

Prezident İlham Əliyevə təşəkkürünü bildirən Ramil Səfərov əfv olunaraq azadlığa buraxılmasını ədalətin bərpası kimi qiymətləndirib

Avqustun 31-də Azərbaycan ordusunun zabiti Ramil Səfərov Macarıstandan Bakıya gətirilib. O, vətənə döndükdən az sonra Prezident İlham Əliyevin sərəncamı ilə əfv olunub. Sərəncamda deyilir: «1977-ci ildə anadan olmuş, Macarıstanın Budapeşt Paytaxt Məhkəməsinin 2006-cı il 13 aprel tarixli hökmü ilə ömürlük azadlıqdan məhrum etmə cəzasına məhkum edilmiş Azərbaycan Respublikasının vətəndaşı Səfərov Ramil Sahib oğlu cəza çəkməkdən azad edilsin. Bu Sərəncam imzalandığı gündən qüvvəyə minir».

APA-ya açıqlama verən Ramil Səfərov bu qərardan olduqca şad olduğunu söyləyib. O, Azərbaycan Prezidenti, Ali Baş komandan İlham Əliyevə təşəkkürünü bildirib: “Bu, ədalətin bərpasıdır”.

Zabitimiz həbsə düşdüyü ilk gündən dövlətimizin, xalqımızın qayğısını hər an hiss etdiyini qeyd edib: “Qeyd etmək istəyirəm ki, dövlətimizin, millətimizin qayğısını həmişə hiss etmişəm. Bundan əvvəl olduğu kimi, indi də dövlətimizin xidmətində bir oğul kimi dayanmağa hər an hazıram”.

R.Səfərov gələcəkdə hərbiçi kimi fəaliyyətini davam etdirmək fikrində olduğunu da vurğulayıb: “Həbs həyatı mənim üçün çox ağır keçib. Amma həbsdə olmağıma baxmayaraq heç vaxt ümidimi itirməmişəm. Çünki həbsdən azad edilməm üçün Azərbaycanda aparılan işlərdən xəbərdar idim. Ona görə də indi mənim üçün çalışan hər bir kəsə və bütün türk dünyasına öz təşəkkürümü bildirirəm. Mən Qarabağ problemi ilə bağlı aparılan işləri də hər zaman diqqətdə saxlamışam. Ali Baş Komandanın bu istiqamətdə göstərdiyi fəaliyyəti yüksək qiymətləndirirəm”.

Ramilin atası Sahib Səfərov da Modern.az-a açıqlamasında baş verənlərin onun üçün gözlənilməz olduğunu və hədsiz sevinc yaşadığını vurğulayıb. O, hazırda evinə çoxsaylı insanların gəldiyini, hər kəsin ona göz aydınlığı verdiyini qeyd edib. S.Səfərov Azərbaycan prezidenti, Ali Baş komandan İlham Əliyevə təşəkkür edib.

Ramil Səfərov dünən gün ərzində Fəxri Xiyabanda ümummilli lider Heydər Əliyevin məzarını, Şəhidlər Xiyabanını və həbsdə olarkən dünyasını dəyişmiş anası Nübar Səfərovanın məzarını ziyarət edib.

Ramil Səfərovun hüquqlarının müdafiəsinin koordinatoru, millət vəkili Azay Quliyev zabitimizin azad edilməsində yalnız və yalnız Azərbaycan Respublikası Prezidentinin əməyi olduğunu qeyd edib. Deputat bildirib ki, onun adından və bütün Ramil sevənlər adından Azərbaycan Prezidenti İlham Əliyevə təşəkkür edir: “Ramil Səfərov həbs olunandan bu günə qədər Azərbaycan Prezidenti bütün strukturlara göstəriş verib. Onun azad olunması üçün mümkün olan bütün işlər görüldü. Ona görə də bu, yalnız Azərbaycan Prezidentinin adına yazılmalıdır. Bu, bir daha göstərir ki, Azərbaycan Prezidenti hər bir vətəndaşın, dövlətinin qayğısına qalır. Prezidentimizin rəhbərliyi ilə Qarabağ da tezliklə azad olunacaq”.

Zabitimizi təbrik etmək üçün onun yaşadığı ünvana gələn digər millət vəkili Qənirə Paşayeva da Ramil Səfərovun azadlığa buraxılmasında görə ölkə prezidenti İlham Əliyevə minnətdarlığını bildirib. O, Ramilin vətənə dönməsindən sevindiyini bildirərək, bu hadisənin bütün azərbaycanlılarda sevinc hissi yaratdığını qeyd edib: “Bu, Azərbaycanın hüdudlarından kənarda yaşayan insanlarımızı, bütün türk millətini sevindirən çox böyük bir hadisədir və cənab prezidentə biz hamımız çox təşəkkür edirik. Ramil gerçəkdən dövlətimizin, millətimizin qəhrəman oğullarından biridir. Mən 4-5 gün əvvəl onunla telefonla danışmışdım, o, mənə zəng etmişdi. Söhbət etmişdik, söhbətimizin əsasında öz sosial şəbəkədə də fikirlərimi yazdım ki, Ramillə ilk görüşən zamanı yeni həbs olunmuşdu, onda mənə bir söz dedi ki, Qənirə xanım bayrağımız bizim namusumuzdur, şərəfimizdir. Biz bayrağımızı, vətənimizi təhqir edənlərə hər zaman qarşı olmalıyıq və heç zaman onları buna imkan verməməliyik. Mən millətimizi, onun atasını, çox təəssüf ki, anası bu günü görmədi, təbrik edirəm. İnanıram ki, Ramil hər zaman millətinə yararlı övlad oldu. Bundan sonra millətimiz, vətənimiz üçün yararlı, gözəl işlər görməkdə davam edəcək. Təbrik edirəm. Cənab prezidentə təşəkkür edirik. Prezidentin bu addımı bütün gənclərimiz üçün bir mesaj idi ki, dövlət, vətən üçün əlindən gələni edən insanların dövlət hər zaman yanında olacaq”.

Bütöv Azərbaycan Xalq Cəbhəsi Partiyasının (BAXCP) sədri, millət vəkili Qüdrət Həsənquliyev Ramil Səfərovun azadlığa buraxılmasını kifayət qədər cəsarətli və ədalətli addım kimi dəyərləndirib. Millət vəkili qeyd edib ki, Azərbaycan torpaqlarının Ermənistan tərəfindən işğalı zamanı Ramil Səfərovun çoxsaylı ailə üzvləri və yaxınları - dinc insanlar ermənilər tərəfindən vəhşicəsinə qətlə yetiriliblər: “Baş verən bu hadisələrdən Ramil Səfərov və onun sağ qalmış ailə üzvləri ciddi mənəvi sarsıntı keçiriblər. Bu baxımdan Ramil Səfərovun onu və Azərbaycan bayrağını təhqir edən Ermənistan zabitini qətlə yetirməsinin səbəbi aydın və anlaşılandır. Şübhəsiz ki, Ramil Səfərov bu əməli güclü ruhi sarsıntı vəziyyətində törətmişdi və belə hallarda ən çox 3 ilə qədər həbs cəzası nəzərdə tutulur. Ramil Səfərov isə bu hadisəyə görə 3 qat artıq cəza çəkib və onun azadlığa buraxılması həm hüquqi, həm də mənəvi baxımdan tamamilə ədalətli qərardır. Bu baxımdan mən Ramil Səfərovun əfv olunması ilə bağlı Azərbaycan prezidentinin sərəncamını alqışlayıram”.

Millət vəkili Zahid Oruc da Ramil Səfərovun ölkəyə gətirilməsindən böyük sevinc hissi keçirdiyini dilə gətirib. O, buna görə, ilk növbədə Azərbaycan prezidentinə xüsusi minnətdarlığını bildirib: “Bu, millətin adını qaldıran bir hadisədir. Öz-özlüyündə Ramil Səfərov bir atanın övladı deyildi. O, Azərbaycan xalqını təmsil edirdi. Bütövlükdə millətə məxsus idi və ona çıxarılmış hökm Qarabağ savaşımıza verilən qiymət idi. Bu yaxınlarda onun ad günü idi və biz bu hadisəni dəyərləndirərkən bir tərəfdən illər uzunu onun dəmir barmaqlıqlar arasında qalmasının məqsədini qeyd etdik, o biri tərəfdən isə onun orada ömürlük saxlanmasının bizim mübarizəmizə, ərazi bütövlüyümüzə nə qədər mənfi təsir göstərdiyindən bəhs etdik. Azərbaycanın tarixində yaşayan Mübariz İbrahimovlar, Ramil Səfərovlar və digər insanlarımız öz əməli ilə bir şəxsin, bir fərdin uğurunu yaratmırlar. Bütövlükdə öz cəmiyyətinə, xalqına, millətinə bu hadisəni yaşadırlar. Ramil Səfərovun da adı millətinə bu dərəcədə bağlanmışdır və onun gətirilməsi təbii bir hadisə kimi dəyərləndirilməlidir. Və buna görə hamımıza göz aydınlığı verirəm”.

Millət vəkili bu hadisənin milli ruhun qalxmasına müsbət təsir göstərəcəyini qeyd edib: “Çünki o hadisə böyük bir karyeranı başladan, NATO-nun sistemində formalaşan bir azərbaycanlı zabitin sındırılması, öz gələcək iş xəttindən daşındırılması, həmin şəxsin generallılığa gedən yolunun qabağını kəsmək demək idi. O səngərdə Azərbaycanın döyüş qabiliyyətinə təsir göstərəcək insanlardandır. Biz o yerdə Ramil Səfərovun olmadığını görürüksə, düşmən də güclənmiş olur. Ramil Səfərovun orada saxlanması üçün erməni dövləti bütün gücünü qoymuşdu. Prezidentin bu qərarı və addımı, onun əfv olunaraq öz ailəsinə və millətinə dönməsinin təşkil olunması qürurverici bir haldır. Ramil Səfərov yenidən Qarabağ cəbhəsində erməniyə qarşı vuruşacaq. Doğurdan da bunun gələcək dönəmdə böyük bir hadisə kimi həyatımıza təsir göstərəcəyinə əminəm və çox ümidvaram ki, bu gün bir-birinə göz aydınlığı verən insanlar torpaqlarımızın bütövləşməsinə və işğal olunmuş ərazilərimizin azad olunmasına görə də bir-birini təbrik edəcəklər”.

Xatırladaq ki, Ramil Səfərov 25 avqust 1977-ci ildə Cəbrayıl rayonunda doğulub. Hələ körpə olanda erməni vəhşiliklərini öz gözləri ilə görən Ramildə onlara qarşı əbədi nifrəti yaranıb. Düşmənə sonsuz nifrəti, Vətənə dərin məhəbbəti Ramili hərbi məktəbdə təhsil almağa istiqamətləndirib. 1991-ci ildə Cəmşid Naxçıvanski adına hərbi təmayüllü məktəbə daxil olub. 1992-ci ilin sentyabrında Azərbaycan Müdafiə Nazirliyinin sərəncamı ilə təhsilini davam etdirmək üçün Türkiyənin İzmir şəhərinə göndərilib. Maltəpə hərbi liseyini müvəffəqiyyətlə bitirdikdən sonra Ankara Ali Hərbi məktəbinə daxil olub və hərbi təlim kursları keçib. 2001-ci ilin may ayından 2002-ci ilin mart ayına qədər Müdafiə Nazirliyinin sərəncamı ilə Gədəbəydəki “N” saylı hərbi hissədə taqım komandiri vəzifəsində qulluq edib. 2002-ci ilin mart ayında Müdafiə Nazirliyinin sərəncamı ilə Heydər Əliyev adına Ali Hərbi Məktəbə göndərilib. Qulluq etdiyi müddətdə baş leytenant rütbəsinə qədər yüksəlib.

2004-cü ilin yanvar ayında Müdafiə Nazirliyinin sərəncamı ilə NATO proqramları çərçivəsində Macarıstanın Budapeşt şəhərində keçirilən 3 aylıq ingilis dili kurslarına ezam olunub. Vətənə dönməyə 20 gün qalmış - fevral ayının 19-da kurslarda iştirak edən Qurqen Markaryan adlı erməni zabitini Azərbaycan bayrağını və şəhidlərimizin ruhunu təhqir etdiyinə görə qətlə yetirib. Elə həmin tarixdə Budapeştin hüquq-mühafizə orqanları tərəfindən həbs olunub. Budapeşt Şəhər Məhkəməsinin 13 aprel 2006-cı il tarixli hökmü ilə ömürlük azadlıqdan məhrum edilib. Ramil Səfərov həbsxanada macar dilini öyrənib, macar dilindən Azərbaycan dilinə iki bədii əsər tərcümə edib.

Rufik İSMAYILOV

Kaspi.-2012.-1-3 sentyabr.-S.3.