“I am Free”-nin təqdimatı keçirildi

Eldar Qasımov: “Əsas o deyil ki, rejissor məşhur olsun, əsas odur ki, nə istədiyimi, duyğularımı, azadlığımı tamaşaçılara çatdıra bilsin”

“Mənim üçün bu mahnı hisslərimi, duyğularımı tamaşaçıya çatdırır. İstəyirəm ki, mahnını dinlədikdə hamı özünü azad hiss etsin”. Bu fikirləri “Eurovision-2011” Mahnı Müsabiqəsinin qalibi Eldar Qasımov dünən Beynəlxalq Mətbuat Mərkəzində yeni “I am Free” (Mən azadam) mahnısının Ukraynada çəkilən klipini təqdim edərkən səsləndirdi.

E.Qasımovun sözlərinə görə, bu layihə bütünlüklə Ukraynanın məşhur Euomedia Group şirkətinin komandası tərəfindən həyata keçirilib. Klipin rejissoru və ideya müəllifi Denis Qamzinov, operatoru Dmitri Peretrutovdur. Klipin hazırlanmasında 200 nəfərin əməyindən istifadə olunub: “I am free” klipində qapalı gecə klubunun və açıq səhnənin interyeri, həyatında əsaslı dəyişikliklər yaşayan qəhrəmanın emosional vəziyyəti təsvir edilir. Klip boyu qəhrəman sevgisini tapmaq üçün yol gedir, sevgisinə çatdıqda isə sevdiyi insan illüziyaya çevrilir.

Təqdimat mərasimində iştirak edən “Eurovision-2012” mahnı müsabiqəsinin aparıcısı Leyla Quliyeva Eldarın son illərdəki uğurlarından, yaradıcılığı ilə bağlı nailiyyətlərindən danışaraq, onun vətənimizdən kənarda da sevildiyini, musiqisinin dinlənildiyini vurğuladı.

Media işçilərinə klip barədə açıqlama verən Eldar Qasımov ilk solo klipi olduğu üçün çox həyəcanlı olduğunu bildirib: “Mən yalnız bir mahnı ifasından kənara çıxmaq istəyirəm, təkcə bir duet oxumaqla kifayətlənmək istəmirəm. “Runing Scared” mahnısının ancaq bir hissəsi mənə aiddir, bu mahnını biz duet şəklində ifa etmişik, yəni mən burda özümü tam şəkildə ifa edə bilməmişəm. Bu klipimdə öz solo ifamı da tamaşaçılara nümayiş etdirmək istəyirəm”. Müğənninin sözlərinə görə, bu mahnının kompozisiyası Azerilife Music Entetainment prodüser mərkəzi ilə birgə yazılıb, eyni zamanda DJ və prodüser Aligee və Rasif Babayevin də köməyindən istifadə olunub.

Media işçilərinin “niyə məhz ilk solo klipinizi xarici rejissora həvalə etdiniz?” sualını isə Eldar Qasımov belə cavablandırıb: ”Klip çəklişi üçün tender elan olundu və həm azəri rejissorların, həm də xarici rejissorların işlərinə baxdıq. Mən Denis Qamzinovun çəkdiyi klipləri çox bəyəndim, həm də onun yanaşdığı mövqe mənim mahnıma çox uyğun gəlir. Baxmayaraq ki o, Ukraynada elə də məşhur rejissor deyil, mənimçün bu elə də əsas şərt deyil. Əsas odur ki, mənim istədiyimi, mahnımda olan duyğularımı, azadlığımı tamaşaçılara aydın şəklidə çatdıra bilsin. Bunu da mən Denisdə gördüm və klipimi ona əmanət etdim”.

Klipdə Eldar Qasımovun rəqsi də media işçilərinin diqqətindən yayınmayıb. Bu barədə açıqlama verən Eldar bildirdi ki, klipdəki rəqsinin qurulmasında “Vabank” şou-baletinin böyük rolu olub. Belə ki, rəqs “caz-fank” üslubunda hazırlanıb: “Mən həmişə lirik musiqilər ifa etdiyimə görə rəqsimi tamaşaçılara təqdim etməmişdim, onu da xatırladım ki, mənim rəqs qabiliyyətim çox yaxşıdır”. Eldar Qasımov klipin məşhur telekanallarda, eyni zamanda Polşa, Yunanıstan televiziyalarında yayımlanacağını, həmçinin bu yönümdə Rusiya ilə danışıqların davam etdiyini qeyd edib: “Çalışacağam ki, bundan sonra da Azərabaycanı Avropada yüksək səviyyədə təbliğ edim”.

“Eurovision” qalibimiz klipin hansı qiymətə başa gəlməsi barədə sualı cavablandırmaqdan imtina etdi: “Əgər sənətçi puldan danışırsa, onun sənətinin dəyəri, kimliyi itir məncə. Qiymət burda əsas rol oynamır. Mən dəqiq bilmirəm, bu klip üçün nə qədər pul xərclənib. Bu layihənin sponsorluğu ZQAN Holding tərəfindən həyata keçirilib”.

Yaradıcılıq planlarından danışan müğənni Azərbaycan dilində İsa Məlikovun sözlərinə mahnı hazırladığını, yaxın gələcəkdə həmin mahnını da tamaşçılara təqdim edəcəyini bildirdi. Sonda Eldar Qasımov klipin çəlişində zəhməti olan hər kəsə təşəkkürlərini bildirdi və klipə yenidən baxış keçirildi.

Xəyalə Rəis

Kaspi.- 2012.- 14 sentyabr.- S.16.