PEYĞƏMBƏRİ TƏHQİR
EDƏNLƏR...
II yazı
Uca Allah buyurur: "Əlbəttə, siz
malınız və canınızla imtahan ediləcəksiniz. Sizdən əvvəl kitab verilmiş kimsələrdən
və Allaha şərik qoşanlardan bir çox əziyyətli
sözlər eşidəcəksiniz. Əgər
səbr edib Allahdan qorxsanız, bilin ki, əlbəttə, bu, məqsədə
müvafiq işlərdəndir" ("Ali-İmran" surəsi,
3/186).
... Bağışlamağın
ən məqbulu gücün çatdığı halda
bağışlamaq, yaxşılıqların ən gözəli
isə pisliyə qarşı yaxşılıqla əvəz
verməkdir. Mərhəmətin ən üstünü
isə sənə zülm edənlərə şəfqətlə
yanaşmaqdır...
Yazımızın birinci hissəsində
təhqirlərə, fizioloji və psixoloji təzyiqlərə,
əziyyətlərə məruz qalan Muhəmməd peyğəmbərin
necə davranmasından, əslində isə
bağışlamasından bəhs etdik. Burada isə son vaxtlar baş verən hadisələrə
toxunaraq müsəlmanların necə etiraz etməli
olduqları barədə söhbət
açacığıq.
Təhqirlər
nə vaxt başlayır?
Peyğəmbərə qarşı
təhqir və təzyiqlər İslamı
açıq-aşkar təbliğ etməsilə
başlamışdı. Müsəlmanların
sayısının çoxalması ilə təhqirlər təcrid,
zorakılıq və işgəncə ilə əvəzlənmişdi.
Bəs Qərbdə? Amerika və Avropa qitəsində
nə vaxtdan start götürüb bütün bunlar? Yenə
eyni cavab: müsəlmanların sayının özündən
əvvəlki dinlərin mənsublarının sayından
artmasından sonra...
Müsəlmanların
artımı
Təsəvvür edin ki, dünyadakı
müsəlman əhalinin sayı 1973-cü ildə 500 milyon
idisə, hazırda bu rəqəm 1,5
milyardı ötür. Demoqrafik hesablamalar
Avropada müsəlman əhalinin sürətlə
artdığını, dünya miqyasında isə ilk dəfə
olaraq müsəlmanların sayca xristianlardan çox
olduğunu göstərir. Qərb mütəxəssisləri
miqrasiya proseslərinin və İslamla bağlı
mövzuların sayının artması və bu sahəyə
yönələnlərin axtarışları nəticəsində
çox sayda avropalı və amerikalının İslamı
qəbul etdiyini müşahidə edirlər. Bu tədqiqatçılar bir neçə on illikdən
sonra Avropanın İslamın ən böyük mərkəzlərindən
birinə çevriləcəyini proqnozlaşdırırlar.
Hətta bəzilərinin iddia etdikləri kimi bu
islamlaşma III dünya ölkələrindən gələn
mühacirlərin sayəsində deyil, kommunizmin iflasından
sonra kapitalizmin daxili tənəzzülü, hazırda
dünya miqyasında baş verən iqtisadi böhranın
müqabilində İslamın alternativ bir
dünyagörüşü kimi qəbul edilməsi yoluyla həyata
keçəcəyini müəyyənləşdirirlər.
Artımın
qarşısını necə almalı?
Bəs bunun qarşısını
necə almalı? Bəli, dəfələrlə
"dişlərinə vurduqları" bir plan yada
düşür. Bu plan nədir? Təxribat. Və təxribata qarşı
kütlə psixologiyasından istifadə edilərək
törədiləcək etiraz aksiyaları və bunun əvəzində
İslamın sürətinin qarşısını
tormozlamaq...
Hətta Peyğəmbərin
sağlığında müsəlmanların
artımının qarşısını almaq
üçün Peyğəmbər haqqında "sehrbaz,
kahin, dəli" kimi təhqiramiz ifadələr işlədir,
ləqəblər qoyurdular. Əlbəttə
ki, bu danışıqlar Peyğəmbərimizin
qulağına çatmış və hələ ilk gündən
məruz qaldığı bu ləkəyaxma kampaniyasına
görə çox kədərlənmişdi. Amma buna
cavab olaraq Allah belə buyururdu: "Ey əbasına
bürünən Peyğəmbər! Gecəni - az bir hissəsi
istisna olmaqla - qalxıb namaz qıl..." ("Muzzəmmil"
surəsi, 1-4). Böhtan atanların həvəsdən
salma kampaniyasına qarşı insanı daha da ümidləndirən
gecə namazı... Bunu isə çox az
adam başa düşər...
Təhqir etdikləri dinin peyğəmbəri
isə öz işi ilə məşğul olurdu. Müsəlmanların sayı isə hər ötən
gün artır və müsəlmanların güclərinin
üstünə güc gəlirdi. Təhqir
yolunu seçənlər isə özlərini və vaxtlarını
buna həsr etdikləri üçün zəifləyir,
müxtəlif böhranlara düçar olurdular. Amma təhqirlərə məruz qalan Peyğəmbərin
ümməti çox qısa vaxt ərzində əsrlərin
imperiyası olan Sasanilər kimi imperiyanı tarix səhnəsindən
sildilər. Ardınca Bizans imperiyasını
eyni aqibətə düçar etdilər. Və bu
gün 1 nəfərlə başlayan İslamın mənsublarının
sayı 1,5 milyardı ötüb.
Məşhurlaşmaq
üçün təhqir yolu
Müsəlmanların güclü
olduqları dövrlərdə belə bir təhqiri heç kim ağlının ucundan da keçirmirdi. Amma zəiflik müşahidə olunan kimi eyni metod fərqli
aktyorların əli ilə həyata keçirilməyə
başlandı. Bunlardan biri də 1888-ci ildə
baş verəcəkdi. Osmanlı
imperiyasının süquta qərq olmağa
başladığı dövrlər idi. Fransız
yazıçı Henri de Bornye "Muhəmməd"
adlı Peyğəmbərimizi təhqir edən pyesini
yazıb sona çatdırdı və bunun səhnəyə
qoyulması üçün Fransanın məşhur teatrlar
ilə razılıq əldə etdi. Tamaşanın
geyim və dekorasiyası hazırlanıb məşqlər
edilərkən qəzetlərdə, bu pyesin Peyğəmbərimizi
təhqir etməsilə bağlı xəbərlər dərc
edildi. Osmanlı padşahı II Abdulhəmidin
məsələyə qarışmasından sonra Fransa
tamaşanın səhnələnməsini saxladı. Tamaşası Fransada qadağan edildikdə, müəllif
bunu İngiltərədə həyata keçirməyə
çalışdı. Lakin Osmanlı rəhbərliyi
diplomatik səylərilə tamaşanın İngiltərədə
də səhnəyə qoyulmasının
qarşısını aldı. Sonralar
tamaşanı İtaliyada da səhnəyə qoymaq istədilər.
Bunun də qarşısı eyni metodlarla
alındı və tamaşa səhnələnmədi.
Yazıçı və təşkilatçılar
tamaşanı Avropada səhnəyə qoya bilmədikdə
bunu ABŞ-da həyata keçirməyə
çalışdılar. Osmanlı
rəhbərliyinin buradakı səylərilə də
Prezident Klevələnd (Stiven Qrover Klivlend) tamaşanı
qadağan etdi.
Təhqirlərin
xronologiyası
Tarix boyu Avropada İslam dininə və
Peyğəmbərimizin şərəfinə toxunmaq məşhur
yazıçı olmaq üçün ilk addım olub. Bunlar şəxsi mənada həyata keçirilən
və şəxslərin məşhurlaşması
üçün edilən addımlar idi. Amma
müasir dünyamızda bu kimi hallar isə müəyyən
qrupların, beyin institutlarının, xüsusi xidmət
orqanlarının böyük planlarını həyata
keçirmək üçün tələyə qoyduqları
pendir, ya da qarmağa taxdıqları yem rolunu oynayır.
Salman Rüşdinin "Şeytan ayələri"
adlı kitabı ilə başlayan mərhələ,
Hollandiyada Wildersin "Fitnə" filmi, Danimarkadakı
karikatura, Roma Papasının Regnsburg
çıxışı, ABŞ-dakı bir keşişin
Quranı yandırması, İsveçrədəki minarə
referandumu, Fransada hicabla bağlı yasaq, Almaniyadakı
sünnət qadağası, Nyu-York metrolarındakı reklam
afişləri, Avropanı İslam təhlükəsinə
qarşı xəbərdar etmək üçün 77 nəfəri
qətlə yetirən Breyvikin terroru, İslamafobiya közərtiləri
ilə dolu olan internet saytları, Avropa ölkələrində
müsəlmanları qızışdırmaq
üçün kəsilmiş donuz başlarının məscidlərin
qapısına atılması və axırıncı olaraq da
yenə ABŞ-da ortaya çıx(arıl)an "Müsəlmanların
günahsızlığı" filmi...
Bütün bunlara ümumi nəzər
yetirdikdə şəxsi olaraq başlayan məsələlərin
necə ümumiləşdirilərək
yayıldığını müşahidə edə bilərik.
Yaralı müsəlmanlar
Təxribat texnoloqları çox
gözəl bilirlər ki, müsəlmanlar hazırda
"yaralı"dır. Uzun illərdir Fələstində
baş verənlər, Əfqanıstanda öldürülənlər,
nüvə silahı adı altında ölkəyə daxil
olan işğalçıların İraqda 3 milyondan çox
insanı qətlə yetirməsi, hazırda Suriyada 40 minə
yaxın müsəlmanın öldürülməsi, Myanmada
müsəlmanların başlarına gətirilənlər,
ölkəmizin Qarabağ kimi problemləri bu yaralardan bir
neçəsidir. Bunları bilənlər yeni
yaralar üçün başqa bir təxribatın
qığılcımını yandırdılar. Və çox səviyyəsiz bir film ortaya
çıxardılar.
"Müsəlmanların
günahsızlığı"
İndi isə gələk konkret olaraq
İslamı və Muhəmməd peyğəmbəri təhqir
edən "Müsəlmanların
günahsızlığı" (The Innocence of Muslims) filminə...
Bu filmin məqsədi birmənalı olaraq təxribatdır.
Muhəmməd peyğəmbərin (s) təhqir
olunduğu, uşaqbaz və arvadbaz adam kimi qələmə
verildiyi, İslamın isə "absurd və yalan
yığnağı" kimi təqdim edildiyi "Müsəlmanların
günahsızlığı" filminin rejissoru Sem Besil (Sam
Bacile) "The Wall Street Cournal" qəzetinə verdiyi
müsahibədə bunları özü deyib: "Bəli,
etiraf edirəm ki, filmi qəsdən, bilərəkdən belə
çəkdim. Məqsədim provokativ bir lent,
kütlələri hərəkətə gətirəcək əsər
hazırlamaqdı. Bu film İslama və müsəlmanlara
qarşıdır. Çünki İslam
bəşəriyyətin vücudundakı xərçəng
yarasıdır. Müsəlmanlar isə məhv
edilməsi gərəkən murdar həşəratlardır.
Filmimdə də İslamın nifrətlə
yoğrulmuş din olduğunu göstərdim. Filmin çəkilişi üçün 100 nəfər
israilli sponsordan 5 milyon dollar aldım. Filmimi
İsrail üçün çəkmişəm".
Rejissor filmin hazırlanmasında
Quranı yandırmaqla məşhurlaşan keşiş Terry
Conasdan da dəstək aldığını etiraf edib. Özünü əslən yəhudi kimi təqdim
edən təxribatçının əsl adının Nakoula
Basseley olduğu isə sonradan məlum olub. Bu adamın vaxtı ilə törətdiyi cinayətə
görə hazırda şərti həbs cəzası ilə
azadlıqda olduğu da ABŞ polisləri tərəfindən
bildirilib.
Antisemitizm meyilləri
gücləndirmək məqsədi
ABŞ-da yaşayan dinlər tarixi tədqiqatçısı
professor Caner Dağlıi bloqunda (muslimcomment.com) bu adamın əslində
yəhudi olmadığını, sadəcə arxasında yəhudilərin
olduğunu hiss etdirmək və ona qarşı olanları
antisemit, etiraz aksiyalarını da antisemitizm kimi göstərməyi
planlaşdırıb. Buna baxmayaraq
İsrailin bu məsələdə səssiz qalması da
maraqlıdır.
Digər tərəfdən, əgər
bu film bu qədər yayılmasaydı, neçə nəfər
tamaşa edəcəkdi buna? Heç
bir sənət əsəri olmadığı halda bu film
milyonların izlədiyi bir video halına gətirildi. Filmin ərəb dilindəki titrlərlə Misir və
Liviyada internet istifadəçilərinin ixtiyarına verilməsindən
xeyli vaxt sonra ilk etirazların Liviyada başlaması
qaranlıq məqamlardan xəbər verir. Bu
etirazlardan ən böyük zərəri etiraz edənlərin
mənsubu olduqları İslam görür. İslamofobiya isə bunlardan qidalanır.
Filmin rejissoru və
arxasındakılar bu filmlə dünyaya çatdırmaq istədiyi
məqsədlərindən bir çoxunu həyata keçirə
bildilər. Müsəlmanları
qızışdırdılar, küçələrə
çıxardılar, səfir öldürtdülər və
etirazçıların dinlərini barbar və terror dini kimi
göstərdilər. Bu baxımdan film və filmin
istehsalçıları istəklərinə nail olublar.
Elşad
MİRİ
Kaspi.- 2012.- 28 sentyabr.- S.12.