Akademik Milli Dram Teatrı festivalda

Hörmətli oxucum, xatırlayırsansa, qəzetimizin ötən sayında dərc olunan yazıda sənə yeni mövsümün açılışı ilə bağlı məlumat vermiş və qeyd etmişdim ki, qarşımızda bizi (elə səni də, məni də!!!) gözləyən maraqlı və maraqsız, uğurlu və uğursuz, ədəbi və bədii, intellektual, qeylü-qallı, qalmaqallı teatr olayları ilə dolu uzun incə bir sənət yolu var.

Artıq bir həftədir ki, bu yolu sizinlə bərabər getməkdəyik. Mənim vəzifəm bu yolda baş verən hal-hadisələrdən Sizi xəbərdar etmək, Sizin borcunuz isə onları izləməkdir. Elə isə, vəzifə borcumu yerinə yetirib səni agah edirəm ki, hazırda Gürcüstanda IV Tbilisi Beynəlxalq Teatr Festivalı start götürüb.

Festivala kənardan baxış: Tbilisi Beynəlxalq Teatr Festivalı 2009-cu ildən etibarən hər il mütəmadi şəkildə keçirilir və böyük tamaşaçı marağı cəlb edir. Statistik məlumatlara görə, bu günə qədər festival 30 minə yaxın tamaşaçı auditoriyası toplaya bilib. 14-30 sentyabr tarixlərində keçirilən festivalda İsveç, Böyük Britaniya, Polşa, Belarus, Almaniya, Çin, Fransa, Rusiya, Litva, İsrail, Meksika, Moldova kimi ölkələrin nüfuzlu teatr kollektivləri ilə yanaşı, Azərbaycan teatrının da bu festivalda iştirakı Akademik Milli Dram Teatrının beynəlxalq əlaqələrin qurulması və inkişaf etdirilməsi, milli teatr sənətimizin dünya teatr məkanına inteqrasiyası istiqamətində atılan uğurlu addımların məntiqi davamı kimi qavranmalıdır.

Festival çərçivəsində tamaşalar Ş.Rustavelli adına Dövlət Dram Teatrının, K.Marcanişvili adına Dövlət Dram Teatrının, V.Abaşidze adına Musiqi və Dram Teatrının, A.Qriboyedov adına Tbilisi Dövlət Rus Dram Teatrının, Azad Teatrın, və digər teatrların binasında nümayiş olunacaq.

Festivalın içində: Azərbaycan Dövlət Akademik Milli Dram Teatrının mətbuat katibi Elçin Cəfərovdan aldığımız məlumata görə, teatr sözügedən festivalda iştirak etmək üçün 25-29 sentyabr tarixlərində Gürcüstanda olacaq və xalq yazıçısı Elçinin «Şekspir» pyesi əsasında hazırlanmış eyniadlı tamaşa ilə çıxış edəcək. Moldovalı rejissor Petru Vutkereunun quruluş verdiyi «Şekspir» tamaşası K.Marcanişvili adına Gürcüstan Dövlət Dram Teatrının səhnəsində, yerli vaxtla saat 20.00-da nümayiş olunacaq. Ötən il Azərbaycan Respublikasının Mədəniyyət və Turizm Nazirliyinin dəstəyi, Akademik Milli Dram Teatrının təşəbbüsü ilə həyata keçirilən «GUAM-ın teatr məkanı» layihəsi çərçivəsində hazırlanan tamaşanın qısa süjeti belədir: ruhi-əsəb klinikasındakı pasientlərin hər biri öz xəyalında qurduğu dünyasında yaşayır. Marslı saatlarla göyləri seyr edərək, onun arxasınca nə vaxt gələcəklərini gözləyir. Ər-arvad daim öz ikili təbiətinin problemləri ilə yaşayır. Stalin bütün günü törətdiyi əməllərin peşmançılığını çəkir. Sara Bernar hər dəqiqə özünü səhnədə təsəvvür edir.

Baş həkim xəstələrin xəyali dünyasını dərk etməyə çalışsa da, anlayır ki, o, buna qadir deyildir. Xəstə kimi müalicə olunan insanlar öz xəyal aləmlərində xoşbəxtdirlər. Bu şəraitdə onları yaşadan da budur. Xəstələrin ərzaqlarına əl uzatmaqdan belə çəkinməyən xəstəxana personalının hər cür təzyiq göstərdiyi, simasızlaşdırmağa çalışdığı pasientləri Şekspirin dühası öz ətrafına birləşdirir. Sara Bernarın sevimli əsəri olan «Romeo və Cülyetta» hamını öz ülviliyi və təmizliyi ilə məftun edir.

Xəstəxanaya Drob-13–ün gətirilməsi ilə hər kəs bir daha həyata münasibəti haqqında düşünməli olur. Hər kəs hərəkətlərinə yenidən, yadplanetlilərin gözü ilə baxır. Bir anda xəstəxana xəyal və hisslərin boğulduğu, sədaqət və inamın itdiyi, həyata fərdi baxışların qadağan edildiyi dünyamızın kiçik modelinə çevrilir. Şekspirin kitabını oxuyan Drob-13 də onun əsərlərindəki insan hisslərinin böyüklüyünə, gözəlliyinə heyran qalır və təəssüflə etiraf edir ki, onun planetində yaşayanlar çox dərin biliklərə malik olsalar da, onlarda teatr yoxdur. Söz verir ki, öz planetinə qayıdan kimi, oradakılara Şekspirin kitabını göstərəcək.

Tamaşanın quruluşçu rejissoru Kişenyovda Ejen İonesko adına Teatrın yaradıcısı və rəhbəri, Avropanın bir çox teatrlarında tamaşalar hazırlamış rejissor Petru Vutkereu, tərtibat rəhbəri Xalq Rəssamı, Dövlət Mükafatı laureatı Nazim Bəykişiyev, quruluşçu rəssamı Ramin Bəykişiyev, musiqi tərtibatçısı Həmid Kazımzadə, rejissor assistenti Dilbər İsmayılovadır. Tamaşada Əməkdar Artistlər Pərviz Bağırov (Stalin), Ayşad Məmmədov (Baş Həkim), Mətanət Atakişiyeva (Sara Bernar), Elşən Cəbrayılov (Veneralı), aktyorlar Nigar Güləhmədova (Həkim), Aslan Şirinov (Sanitar), Şəlalə Şahvələdqızı (Ər-arvad) və Anar Heybətov (Drob 13) çıxış edirlər.

Bu gün Gürcüstan teatrı yüksək inkişaf mərhələsindədir. Avropa məkanında kifayət qədər tanınan və qəbul edilən Gürcüstan teatrı ilə ikitərəfli əməkdaşlıq münasibətlərinin, beynəlxalq əlaqələrin qurulması milli teatrımız üçün böyük uğur hesab oluna bilər.

Azərbaycan teatr məkanında hadisəyə çevrilən, Azərbaycan teatrının yaradıcılıq potensialını aşkarlayan «Şekspir» tamaşasının Gürcüstan tamaşaçıları tərəfindən maraqla qarşılanacağına və qəbul olunacağına ümid edərək qeyd etmək istəyirəm ki, teatrımız sözügedən festivalda uğur qazansa, nə gözəl, birdən (Allah eləməmiş…) uğursuzluğa düçar olsa – yenə də qorxusu yoxdur. Əsas məsələ festivala getmək və orada iştirak etməkdir. Sonrasına isə baxarıq. Necə deyərlər, nəticə heç nə – proses hər şey!!!

P.S. «Festivaldan dünyaya baxış» bölməsini, inşaallah, teatr festivaldan qayıtdıqdan sonra diqqəti-nəzərinə təqdim edəcəyəm, hörmətli oxucum, odur ki, diqqətini ayıq-sayıq saxla…

Könül Əliyeva,

Teatrşünas

Kaspi.- 2012.- 22-24 sentyabr.- S.22.