“Hər il və hər ay bizi qələbəyə yaxınlaşdırır”

Prezident İlham Əliyev: “Azərbaycan ordusu böyük qüvvədir və biz bu qüvvədən lazım olan halda istifadə edəcəyik”

Yanvarın 16-da Prezident İlham Əliyevin sədrliyi ilə Nazirlər Kabinetinin 2011-ci ilin sosial-iqtisadi inkişafının yekunlarına və 2012-ci ildə qarşıda duran vəzifələrə həsr olunmuş iclasında dövlət başçısı ötən ildə ölkə qarşısında duran bütün sosial və iqtisadi vəzifələrin uğurla icra edildiyindən söhbət açıb. O, 2011-ci ildə Azərbaycanın bütün sahələrində nəzərə çarpan inkişafın getdiyini diqqətə çatdıraraq, ordu quruculuğu sahəsində həyata keçirilən islahatlara da toxunub. Prezident Azərbaycan ordusunun maddi-texniki bazasının gücləndirilməsi məqsədilə bu sahəyə böyük vəsait sərf olunduğunu, nəticədə silahlı qüvvələrimizin regionda böyük bir qüvvəyə çevrildiyini və bu qüvvədən lazım olan halda istifadə ediləcəyini bildirib:

“Heç kimə sirr deyil ki, biz hərbi gücümüzü artırırıq və artıracağıq. 2010-cu ildə bu rəqəmləri mən dəqiq xatırlayıram, başqa rəqəmləri də xatırlayıram. Amma bu rəqəmləri yaddaşımda xüsusilə dəqiq saxlayıram – 2011-ci ildə hərbi məsələlərə 3 milyard 413 milyon dollar xərclənmişdir, 2012-ci ildə 3 milyard 474 milyon. İki ildə görün, biz ordu quruculuğuna nə qədər böyük vəsait sərf edirik. Əvvəlki dövrdəki vəsaiti də əlavə etsək, biz də görərik və hamı da görər ki, bu gün Azərbaycan ordusu böyük imkanlara malikdir. Biz bölgədə ən güclü orduya malikik, maddi-texniki təchizat yüksək səviyyədədir, ən müasir silahlar, texnikalar, döyüş helikopterləri, döyüş təyyarələri, raketlər, artilleriya qurğuları, - hamısını sadalamaq çətindir, - alınır və bizimlə hərbi sahədə əməkdaşlıq edən ölkələrin coğrafiyası da genişlənir. Eyni zamanda, Azərbaycanda istehsal olunan hərbi məhsulların sayı və çeşidi artmaqdadır. Biz 600-ə yaxın çeşiddə hərbi məhsul istehsal edirik. Yəni, bu gün Azərbaycan ordusu böyük qüvvədir və biz bu qüvvədən lazım olan halda istifadə edə bilərik və edəcəyik. Qarşı tərəf də bunu bilir. Ona görə də qarşı tərəfdə - Ermənistanda Azərbaycanın hərbi imkanları ilə əlaqədar böyük təlaş və təşviş vardır… Bizim imkanlarımıza cavab vermək üçün onların heç bir imkanı yoxdur”.

Dövlət başçısı 2012-ci ilin dövlət büdcəsinin xərclərinin 22 milyard dollar, icmal büdcənin isə təxminən 25 milyard dollar səviyyəsində olduğunu bildirərək, bunun tarixdə ən böyük göstərici olduğunu vurğulayıb. O, 2012-ci ilin büdcəsindən ayrılmış böyük vəsait hesabına ordumuzun maddi-texniki təchizatının daha da gücləndiriləcəyini qeyd edib: “Bizim hərbi potensialımız daha da artmalıdır. Biz indi hərbi xərcləri yüksək səviyyədə saxlayırıq. Müqayisə üçün deyə bilərəm ki, Ermənistanın ümumi xərcləri 2 milyard dollardır. Bizim hərbi xərclərimiz ondan təxminən 2 dəfə çoxdur. Yəni, bu, artıq reallıqdır. İllər keçdikcə bu fərq daha da artacaq, Azərbaycanın hərbi gücü artacaqdır. Hazırda imzalanmış kontraktların icrası nəticəsində indi demək istəmirəm, amma bizim döyüş qabiliyyətimiz əhəmiyyətli dərəcədə artacaqdır və məsələnin həlli üçün biz az itkilərlə daha da böyük uğurlar əldə edə bilərik. Ancaq yenə də deyirəm, Azərbaycan sülhsevər dövlətdir. Biz çalışırıq ki, məsələ sülh yolu ilə həll olunsun. Ancaq onu da bilirik ki, hər il və hər ay bizi qələbəyə yaxınlaşdırır. Hər il və hər ay Azərbaycan daha da güclü, Ermənistan daha da gücsüz olur”.

Prezident İlham Əliyev hərbiçi ailələrinin mənzil-məişət problemlərinin həlli istiqamətində görülən işlərə də toxunub. Bəyan edib ki, cari ildə hərbi hissələrin binalarının əsaslı təmiri məsələləri həllini tapacaq, iyirmi il qüsursuz xidmət göstərmiş gizirlər, zabitlər dövlət tərəfindən mənzillərlə təmin ediləcəklər: “Mən qarşıya vəzifə qoymuşam ki, bütün hərbi hissələrimizin binaları yüksək səviyyədə təmir edilsin, bəlkə də yeniləri tikilsin, yeni hərbi bazalar, hərbi şəhərciklər yaradılmalıdır. Orduda xidmət edənlər yaxşı şəraitdə xidmət etməlidirlər. Onların həm məişət, həm iş şəraiti yaxşı olmalıdır. Onlar çətin, ağır şəraitdə, bəzi hallarda soyuqda, istidə xidmət aparırlar. Bütün hərbi hissələrdə, o cümlədən ilk növbədə təmas xəttində yerləşən hərbi hissələrdə 2012-2013-cü illərdə yaşayış, xidmət aparmaq üçün bütün infrastruktur yeniləşməlidir, yenidən yaradılmalıdır. Hərbçilərin sosial vəziyyətinin yaxşılaşdırılması üçün konkret tədbirlər görülür. İyirmi il qüsursuz xidmət göstərmiş gizirlər, zabitlər dövlət tərəfindən mənzillərlə təmin ediləcəklər”.

Tərxis Olunmuş Hərbçilərin Gəncləri Maarifləndirmə İctimai Birliyinin sədri Emin Həsənli ölkə rəhbərinin Nazirlər Kabinetinin 2011-ci ilin sosial-iqtisadi inkişafının yekunlarına və 2012-ci ildə qarşıda duran vəzifələrə həsr olunmuş iclasında söylədiyi fikirlərə münasibət bildirərkən, əsası ümummilli lider Heydər Əliyev tərəfindən qoyulan ordu quruculuğu sahəsində əldə olunan nailiyyətlərin Ali Baş Komandan İlham Əliyev tərəfindən də uğurla davam etdirildiyini deyib. O, Azərbaycan Silahlı Qüvvələrinin hazırda dünyanın ən güclü və peşəkar orduları ilə bir sırada dayandığını dilə gətirib: “Ölkədə müşahidə olunan yüksək iqtisadi artımdan dövlət başçısının bu sahəyə yüksək diqqəti və qayğısı sayəsində Azərbaycan Ordusu da bəhrələnib. Silahlı Qüvvələrin şəxsi heyətinin hazırlıq səviyyəsinin yüksəldilməsi, hərbi qulluqçuların sosial-məişət ehtiyaclarının ödənilməsi, onların hüquqlarının müdafiəsi ordunun maddi-texniki və müasir silahlarla təchizatı ilə paralel olaraq yüksək səviyyədə aparılır. İndi Azərbaycanın hərbi büdcəsi Ermənistanın bütövlükdə dövlət büdcəsindən çoxdur. Bu gün Azərbaycan Ordusunun inkişafı göz önündədir. Azərbaycan Respublikası Prezidentinin 16 dekabr 2005-ci il tarixli sərəncamı ilə Dövlət Xüsusi Maşınqayırma və Konversiya Komitəsinin bazasında Müdafiə Sənayesi Nazirliyi yaradılması da ordumuzun inkişafına öz müsbət töhfəsini verib. Azərbaycan artıq silah və müxtəlif növ hərbi texnika istehsal edir, onları eksporta təklif edir. Ölkəmizin hərbi texnika, silah baxımından xarici şirkətlərdən və dövlətlərdən asılılığı azalmaqdadır. Azərbaycan əsgərinin ərzaq və geyimlə təminatı da 90-cı illərə nisbətən xeyli yaxşılaşıb. Bir sözlə, bu gün düşmən qarşısında, 90-cı illərdəkindən fərqli olaraq, qat-qat daha hazırlıqlı Azərbaycan əsgəri, nizami Azərbaycan Milli Ordusu dayanıb. Bu ordu artıq regionda bir faktdır, reallıqdır və mövcud status-kvonu Azərbaycanın xeyrinə dəyişmək onun üçün çətin bir məsələ deyil”.

Hərbi ekspert ordumuzun daha da inkişaf etməsi, müasir hərb elminin, döyüş taktikasının yeniliklərinin mənimsənilməsi üçün hərbyönümlü beynəlxalq təşkilatlarla əməkdaşlığın da vacib şərtlərdən biri hesab olunduğunu diqqətə çatdıraraq, bu istiqamətdəki vəziyyətdən də söhbət açıb: “Ordu quruculuğu elə bir spesifik sahədir ki, burada iş yalnız iqtisadi imkanlardan kifayət qədər bəhrələnməklə bitmir. Azərbaycan öz ordusunun gücünü, kadrların hərbi peşəkarlığını daim artırır, hərbi qüdrətini yüksəldir. NATO ilə sıx və səmərəli əməkdaşlığın əsas hədəfi də məhz ordu quruculuğu prosesini sürətlə təkmilləşdirmək, Silahlı Qüvvələri modernləşdirmək, müasir standartlara uyğunlaşdırmaqdır. Doxsanıncı illərin ortalarından başlayaraq, Azərbaycanın NATO ilə sıx və səmərəli əməkdaşlığı ordu quruculuğu prosesinin sürətlə təkmilləşdirilməsinə, Silahlı Qüvvələrimizin modernləşdirilməsinə, müasir standartlara uyğunlaşdırılmasına gətirib çıxarıb. Ulu öndərin uzaqgörən siyasəti nəticəsində 1994-cü ilin əvvəllərində Azərbaycan NATO-nun “Sülh naminə tərəfdaşlıq” proqramına, bu əməkdaşlığın davamı olaraq 1996-cı ildə “Planlaşdırma və analiz prosesi” proqramına, 2001-ci ildə isə “Fərdi Tərəfdaşlıq üzrə Əməliyyat Planı”na qoşulub. 2008-ci ilin sonundan isə bu əməliyyat planının ikinci mərhələsinə başlanılıb. İl ərzində 2 mindən çox Azərbaycan hərbçisi NATO proqramlarında və digər ikitərəfli əməkdaşlıq proqramlarında iştirak edir, ən son hərb yeniliklərini mənimsəyirlər. 1997-ci ildən etibarən Azərbaycanın hərbi təhsil müəssisələri də NATO standartlarına keçib. Silahlı Qüvvələrimizin tərkibində yaradılan sülhməramlı bölük, daha sonra isə sülhməramlı tabor NATO xəttilə həyata keçirilən hərbi-humanitar aksiyalarda fəal iştirak edərək, münaqişə ocaqlarında təhlükəsizliyin, sülhün təminatına əsgəri dəstək veriblər. Beynəlxalq sülhməramlı qüvvələrin tərkibində Kosovoda, Əfqanıstanda və İraqda zəngin təcrübə qazanan, və öz standartlarını NATO standartlarına uyğunlaşdıran Azərbaycan ordusu bu gün artıq modern bir orduya çevrilib. İldən-ilə hazırlıq səviyyəsi yüksələn və təkmilləşən zabit heyəti isə ordunu məharətlə idarə edir və istənilən tapşırığı yerinə yetirməyə daima hazırdır. Bir sözlə, Azərbaycan Silahlı Qüvvələri bu gün dünyanın ən güclü və peşəkar orduları ilə bir sırada dayanır. Bunun danılmaz bir fakt olduğunu beynəlxalq təşkilatlar, müxtəlif xarici qurumlar və siyasi-hərbi təhlilçilər də təsdiq edir. Ordumuzun gücünü artıran, hərbçilərimizin döyüş əhval-ruhiyyəsini yüksəldən əsas amillərdən biri də ölkə prezidenti, Silahlı Qüvvələrin Ali Baş Komandanı İlham Əliyevin hərbi hissələrə, xüsusən cəbhə xəttinə ardıcıl səfərlər etməsidir. Ön xətdə xidmət edən əsgər və zabitlərimizlə hər görüşündə onlara sonsuz mübarizə əzmi aşılayan Ali Baş Komandan bununla da orduya diqqət və qayğısını əyani şəkildə nümayiş etdirir”.

“Doktrina” Jurnalistlərin Hərbi Araşdırmalar Mərkəzinin direktoru Cəsur Sümərinli ölkəmizin müdafiə xərclərinin 2012-ci il üçün 3 milyard 474 milyon dollara qaldırılmasını müsbət hal kimi dəyərləndirərək, deyib ki, bu Azərbaycan üçün təhlükəsizlik və müdafiə sektorunda, o cümlədən Silahlı Qüvvələrdə iri həcmli təchizat məsələlərinin davam etdirilməsi perspektivləri açır: “Son illərdə Azərbaycan Silahlı Qüvvələrinin silah və hərbi texnika arsenalının yeniləndirilməsi istiqamətdə böyük vəsaitlər sərf edilib. Konkret olaraq 2010 və 2011-ci illər bu baxımdan diqqəti daha çox çəkir. Rusiyadan, Belarusdan, Ukraynadan, Türkiyədən müxtəlif həə hərbi avadanlıqdan tutmuş, zenit raket komplekslərinə qədər xeyli növdə silah və hərbi texnika növləri alınıb. Bu addımlar Azərbaycanın Ermənistan üzərində döyüş üstünlüyünün davam etdirilməsi baxımından çox əhəmiyyətlidir. Eyni zamanda milli hərbi sənaye kompleksinin inkişafına böyük həə vəsaitlər qoyulmasının müəyyən səmərəsi artıq ortadadır. Silahlı Qüvvələrin silah və sursatlarla təmin olunması prosesi ildən-ilə güclənir.

Müxtəlif silah və hərbi texnikaların istehsal prosesinə başlanılıb və bu istiqamətdə xarici ölkələrin hərbi sənaye kompleksləri ilə əməkdaşlıq münasibətləri qurulub. Bu kontekstdə Türkiyə, İsrail və Cənubi Afrika Respublikasının hərbi sənaye müəssisələrinin aktivliyini xüsusi qeyd etmək istərdim. Bunları nəzərə alaraq düşünürəm ki, 2012-ci ildə Azərbaycanın təhlükəsizlik və müdafiə sektorunun, hərbi birləşmələrin texniki təchizatının gücləndirilməsi, müdafiə sənaye kompleksi müəssisələrinin istehsal gücünün artırılması və onların beynəlxalq sənaye müəssisələri ilə əməkdaşlığının artması gözlənilir. Bütün bunlar Azərbaycan Silahlı Qüvvələrinin işğal altında olan torpaqlarımızın düşmən tapdağından azad olunması istiqamətində döyüş gücünün artmasına öz həlledici təsirini göstərəcək. Əsas hədəflərdən biri də hərbi qulluqçuların sosial təminatı ilə bağlı məsələlərdir. Düşünürəm ki, müdafiə xərclərinin kəskin artımı 2012-ci ildə Azərbaycan Silahlı Qüvvələrinin hərbi qulluqçularının sosial rifahının kəskin şəkildə güclənməsinə də öz müsbət təsirini göstərəcək”.

Rufik İSMAYILOV

Kaspi.- 2012.- 19 yanvar.- S.5.