İstedadlı adamın yaşı olmur

Musiqili Komediya Teatrının direktoru Əliqismət Lalayev: “Keçirdiyimiz müsabiqə istedadlı insanlar üçün geniş imkanlar yaradır və perspektivlər vəd edir”

Sevindirici haldır ki, bütün sahələrdə gənclərin üzünə qapılar açılır. Müxtəlif dövlət orqanlarında artıq gənclər aparıcı qüvvə kimi təmsil olunur. Bu prosesin reallaşması həm də gənclərə olan inamın açıq təzahürünü nümayiş etdirir. Mədəniyyət sahəsində də gənclər siyasəti davam etdirilir. 102-ci mövsümünü yaşayan Musiqili Komediya Teatrında gənc və istedadlı kadrların teatra cəlb edilməsi üçün keçirilən müsabiqə bu gün başa çatır. Teatrın həm aktyor heyətinə, həm də xor, balet və orkestr kollektivinə gənclər seçilib. Müsabiqə barədə məlumat almaq üçün Musiqili Komediya Teatrının direktoru, əməkdar incəsənət xadimi Əliqismət Lalayevin fikirlərini öyrəndik.

– Nəticələr bu gün açıqlanır. Müsabiqə barədə yekun fikriniz nədir?

– Müsabiqə zənnimcə, çox obyektiv və səviyyəli keçirildi. Müsabiqəyə Asəf Zeynallı adına Musiqi Kollecinin, Mədəniyyət və İncəsənət Universitetinin, Milli Konservatoriyanın tələbələri, eləcə də hansısa peşəkar təhsili olmayan, amma istedadlı, bacarıqlı gənclər qatılmışdılar. Əsas odur ki, biz öz qapılarımızı gənclərin üzünə açmışıq, meydan vermişik. Onlar da həvəsli və istedadlıdırlar. Keçirdiyimiz müsabiqə istedadlı insanlar üçün geniş imkanlar yaradır və perspektivlər vəd edir.

– Əliqismət müəllim, müsabiqədə əsas tələblər nədən ibarət idi?

– Siz də yaxşı bilirsiniz ki, rəhbərlik etdiyim teatrda səhnəyə çıxmaq digər teatrlarla müqayisədə çox çətindir. Yəni, bizim teatrda çalışmaq istəyən aktyorun həm gözəl səsi, həm rəqs, həm də aktyorluq bacarığı olmalıdır. Özü də sadaladığım xüsusiyyətlər bir-birini tamamlamalıdır. Yalnız belə olan halda aktyor tamaşaçının sevimlisinə çevrilir. Bizim teatrda balet truppası var, ora da gəncləri dəvət etmişik ki, gəlib özlərini sınasınlar. Çünki klassik rəqsləri bilən gənclərə, xoreoqrafiyanı bilən insanlara ehtiyacımız var. Müsabiqənin keçirilməsini zəruri edən səbəb həm bizim gənclərə teatrımızda yer vermək, həm bacarıqlı gəncləri üzə çıxarmaq istəyimiz, həm də gənclərə olan ehtiyacımızdan qaynaqlanır. Biz istəyirik ki, teatrda gənclər də geniş təmsil olunsun.

– Bu prosesi dövlət başçısının gənclər siyasətinin davamı kimi də başa düşə bilərikmi?

– Əlbəttə. Bu müsabiqədə bu və ya başqa dərəcədə gənclər siyasətinin davamıdır. Biz istəyirik ki, yeni adları, bu günə qədər naməlum qalmış nadir istedadları üzə çıxaraq və onlara kömək edək. Onlar teatrda təmsil olunsa, teatrda rəngarənglik yaranacaq. Yeni seçimlər yeni adlar deməkdir. Bilirsiniz ki, Musiqili Komediya Teatrında hazırda təmir işləri gedir. Təmir işləri başa çatandan sonra biz daha səylə çalışacağıq.

– Hazırda teatrınızda çalışan gənclərin fəaliyyətindən razısınızmı?

– Şübhəsiz ki, razıyam. Gənclər daha enerjilidir, daha çox əmək sərf edirlər. Bilmədiklərini öyrənirlər. Bizim də borcumuz onların üzünə qapı açmaqdır. Onlar öz istedadlarını ortaya qoymaq, nümayiş etdirmək, tanınmaq istəyirlər. Xoş haldır ki, bu işlərin məsuliyyətini də dərk edirlər. Bizim gənc aktyorlarımıza inamımız olmasa, heç müsabiqə də keçirməzdik. Əgər çalışanlara inanmırıqsa, gələcəkdə bizim teatrda təmsil olunanlara necə inana bilərik?

– Rəhbərlik etdiyiniz teatrın gələcək fəaliyyət planı haqda nə deyə bilərsiniz?

– Planlarımız çoxdur. Bəzi danışıqlar gedir. Gürcüstana səfərimiz olacaq. Yeni tamaşalar da hazırlayırıq. Hazırda Mirzə Fətəli Axundovun 200 illiyi ilə bağlı “Molla İbrahimxəlil Kimyagər” əsərinin səhnələşdirilməsi prosesi gedir. Tamaşanın rejissoru Bəhram Osmanovdur. Əsərdə kimyagər rolunu Afaq Bəşirqızı oynayır. İndidən deyim ki, bu tamaşa böyük səs-küyə səbəb olacaq.

– Yaş məhdudiyyəti Musiqili Komediya Teatrında gündəmdə olan məsələlərdəndirmi?

– Bizim teatrımızda da yaş məhdudiyyəti nəzərə alınacaq. Müəyyən olunmuş yaşı keçən aktyorlar ştatdan çıxarılacaq. Amma onlar müqavilə şərtləri ilə yenə tamaşalarda rol ala biləcəklər. Ümumiyyətlə, bu prosesin birdən-birə getməsi çox da asan məsələ deyil. Müəyyən boşluqlar yarana bilər. Səhnədə rolları, tamaşaçıların sevimlisi olan aktyorlar səhnə enerjiləri olduqca səhnədə qalacaqlar. Hətta 80 yaşları olsa belə. İstedadlı adamın yaşı olmur. Kimlər ki bacarıqlıdır, onlar səhnəmizdə hələ uzun müddət qalacaq. Bu gün elə aktyorlar var ki, müqaviləylə işləyir, amma ştatda olandan daha çox əməkhaqqı alırlar. Onu demək istəyirəm ki, ştat heç vaxt əsas göstərici olmayıb, bundan sonra da olmayacaq. Yeganə göstərici istedaddır.

– Bəzi teatrlar tamaşaçı azlığından şikayətlənir, amma Musiqili Komediya Teatrında daim yer problemi olur. Kiçik bir ölkədə, özü də teatrların əsasının paytaxtda yerləşdiyini nəzərə alsaq, bu dərəcədə fərqi hansı amillər mümkün edir?

– Görünür, bizim aktyorlarımızın və rejissorlarımızın işlərini daha çox sevirlər. Amma teatr kollektiv əməkdir, bizim teatrın tamaşaçı toplaya bilməsində bütün teatr işçilərinin əməyi var və mən heç kəsin əməyini heçə endirə bilmərəm. O ki qaldı digər teatrlara, bu haqda qəti fikir deyə bilmərəm. Hər halda problemlər aydınlaşdırılmalıdır, məsələnin kökü tapılmalıdır və aradan qaldırılmalıdır. Teatrda repertuar siyasəti düzgün olmayanda böyük problemlər ortaya çıxır. Repertuarı necə gəldi qurmaq olmaz.

Fərid Hüseyn

Kaspi.- 2012.- 26 yanvar.- S.16.