Əbədi şəhidlik zirvəsində

Bu il oktyabrın 16-da Qusar rayonunda vəzifə borcunu yerinə yetirərkən həlak olan polis mayoru Qabil Quliyevin xatirəsinə

Polis mayoru

Polis olmaq böyük arzusu imiş Qabilin. Bəlkə də heç düşünmürdü ki, elə bu arzusu onun Əzrayılı, bu arzuya çatmaq üçün etdiyi çabalar ömrünün baltası olacaq. Sevə-sevə, sevinə-sevinə əldə etdiyi polis mayoru rütbəsi onun bu dünyada son, şəhidlik isə o dünyada əbədi rütbəsi olacaq. Vətən yolunda canından keçən Quba rayon Çiçi kənd sakini Qabil Quliyev haqda yazmaq çətin olduğu qədər də asan oldu. Çətin idi, çünki artıq bu həyatda olmayan, bu dünyada ona çoxlarının ehtiyacı olan bir insanın ölümü haqda dönə-dönə düşünməli olduq. Həmkəndliləri Sadiq və Nərmin onu o qədər gözəl anlatmışdılar ki, haqqında yazmaq üçün xoş sözlər tapmaqda heç bir çətinliyimiz olmadı.

Bu il oktyabrın 16-da Qusar rayonunda polislə vəhabi olduğu bildirilən və özlərini “Meşə qardaşları” adlandıran bir qrup silahlı şəxs arasında baş verən atışmada həlak olub Qabil. Söylənənlərə görə, bir dəfə yaralansa da, əməliyyat yoldaşlarını tək qoymayıb, silahlı şəxslərə qarşı atışmaqda davam edib. Lakin ikinci dəfə yaralananda onun həyatını xilas etmək mümkün olmayıb.

Bulaq suyu-dağ havasının yetişdirdiyi qəhrəman

1971-ci ildə Quba rayonunun dağ kəndi olan Çiçidə anadan olub Qalib Quliyev. Dağ kəndi, dağ havası, dağın təmiz suyu və qidası onun dağ ürəkli, dağ cüssəli, igid bir oğlan kimi yetişməsində, boya-başa çatmasında öz təsirini göstərib. Qabil Çiçi kənd məktəbini əla qiymətlərə bitirdikdən sonra əmək fəaliyyətinə başlayıb. Kənd uşaqları əmək fəaliyyətinə 4-5 yaşlarından başlayırlar. Ailənin təsərrüfat içlərini yerinə yetirirlər. Bu da onlarda əməksevərlilik, dözümlülük və çeviklik əlamətlərinin yaranmasına səbəb olur. Qabil də hələ uşaqlığından çətinlikdən və zəhmətdən qorxmayan bir gənc kimi yetişir. Onun tərbiyə alıb böyüyü ailə, başda atası Əkrəm kişi olmaqla, əməksevər, zəhmətkeş adamlardır. Bu da Qabilin sağlam ruha, əməyə, vətənə məhəbbət ruhunda tərbiyə alıb, böyüməsinə öz təsirini göstərməyə bilməzdi. Az müddətli əmək fəaliyyətindən sonra Qabil hərbi xidmət borcunu yerinə yetirmək üçün Quba hərbi komissarlığına çağırılır. Onu Türkmənistanın dağlıq sərhəd zonasında yerləşən çox məsuliyyətli qaynar zonaya göndərirlər. Qabil öz doğma kəndində qazandığı hörməti orduda da qazanır. Xidməti borcunu şərəflə yerinə yetirir. Ordu rəhbərlərinin, əsgər yoldaşlarının hörmətini qazanır. Xidmət etdiyi hissədən valideynlərinə saysız-hesabsız təşəkkür məktubları göndərilirir. Qalib arıq, uzun, sarışın olduğundan və xidmət zonasında ona at verildiyindən yoldaşları və komandirləri ona zarafatla “Don Kixot” ləqəbi veriblərmiş. O, sərhəddə igidlik nümunəsi olur.

Uşaqlıq arzusu-polislik

Hələ orta məktəbdə oxuyandan ən böyük arzusu polis işçisi olmaqmış. Hərbi xidmət zamanı sərhəd zonasında olduğu üçün onu dessant kimi hazırlayırlar. Bu hazırlıq onun polis olmaq arzusuna da uyğun idi. Hətta vətənə qayıdıb kənd təsərrüfatı fəaliyyətinə başlayanda da bu arzuya çatmaq üçün çalışır. O, bu məqsədlə Quba rayon Daxili İşlər Şöbəsində sıravi polis kimi işləməyə başlayır. Böyük arzusuna çatmaq üçün məsuliyyətlə çalışır. Bütün tapşırıqları qüsursuz yerinə yetirir, vəzifə öhdəliklərini layiqincə həyata keçirir. Çox keçmədən savadlı və bacarıqlı işçi olduğunu görən rəhbərlik onun ixtisas təhsili alması üçün Azərbaycan Daxili İşlər Nazirliyinə namizədliyini verir. Nazirlikdə Qabilin tərcümeyi-halı və xidmət sahələri ilə tanış olduqdan sonra, o, qeyri-şərtsiz Mərdəkan Milis Məktəbinə göndərilir. İmtahanı müvəffəqiyyətlə verən Qabil tələbələr sırasına qəbul edilir. Beləliklə arzusuna çatmağa ilk addımını atmış olur. Qabil burada da qabiliyyətini nümayiş etdirir. Dərslərini yaxşı oxuyur, çox çalışıb əla qiymətlər alır, müəllim və tələbə kollektivinin hörmətini qazanır.

Təhsilini başa vurduqdan sonra Daxili İşlər Nazirliyinin göndərişi ilə Qusar rayon Polis Şöbəsinin sərəncamında xidmətə başlayır. Tezliklə təmizliyi, namusluluğu, qorxmazlığı, qanunları pozanlara, zəhmətkeş xalqı incidənlərə qarşı qətiliyi, Azərbaycanın müstəqilliyinə xələl yetirmək istəyənlərə qarşı sərtliyi ilə Qabil təkcə iş yoldaşlarının deyil, Qusar rayon sakinlərinin də hörmətini qazanır. Qusar rayon PŞ-nin rəhbərliyi çətin əməliyyatları Qabilə həvalə edir. Ona göstərilən etimadı doğrultmaq üçün Qabil ciddi-cəhdlə çalışır və bu məsuliyyətinin müqabilində ona tezliklə mayor rütbəsi verilir. İşinə verilən yüksək qiymət ona daha da irəli getmək üçün qüvvə verir. Üstəlik, qəlbindəki Vətən sevgisi, dövlətə xidmət, vətəndaşların təhlükəsizliyinin keşiyində dayanmaq istəyi Qabilə əlavə ruh verir.

Lakin xaricdən dəstəklənən qüvvələr özlərini rahat hiss etmirdilər. Onlar Azərbaycanın bu gözəl şimal bölgəsində yuva salıb, özlərinə “Meşə adamı” adını vermişdilər. Yanlış yola sapmış insanlar kimin çaldığına oynadıqlarını, kimə, nəyə xidmət etdiklərini bəlkə də bilməyə-bilməyə qan tökməkdən çəkinmirlər. Havayı yerə dinc insanların rahatlığını pozur, onlara maddi və mənəvi ziyan vururlar. Qusar rayonunda yerləşən neqativ ünsürlər tez-tez polis işçilərini əməliyyat keçirməyə məcbur edirlər. Qabil bu əməliyyatlarda fəal iştirak edirmiş. Bir neçə il əvvəl Qusar rayonunun özündə onun rəhbərliyi ilə keçirilən əməliyyatda üç güllə yarası alsa da, geri çəkilməmiş, əməliyyatı davam etdirmiş və nəticədə cinayətkar dəstə məhv edilmişdi. Qabil də cərrahiyə əməliyyatı ilə sağalaraq vəzifə başına qayıtmışdı.

Qusar sevgisi...

Ona dəfələrlə başqa rayonlarda iş təklif olunub. Lakin Qabil “mənim Qusar camaatına böyük hörmətim var, mən Qusarı sevirəm” deyib bu təkliflərdən imtina edib. Birinci əməliyyatdan 3-4 il keçsə də, cinayətkarlar tam yox edilməmişdi. Onlar meşəyə çəkilərək öz məkrli planlarını həyata keçirmək üçün növbəti hiyləyə əl atmış, Qurban bayramı günü polis işçilərinə qəfil həmlə edib atışmaya səbəb olmuşdular. Səhəri gün cinayətkarları zərərsizləşdirmək üçün keçirilən əməliyyat zamanı Cinayət Axtarış Şöbəsinin rəisi Əliyev Mövlud ağır yaralanıb, polis mayoru Quliyev Qabil həlak olub, digər iki polis məmuru da yaralanıb xəstəxanaya düşüblər.

Beləliklə, uşaqlıq arzusuna böyük uğurla çatan Qabil bu uğurlarının davamını yaşaya bilmədi. O, Vətən yolunda şəhid oldu. Qusarda və digər sərhəd zonalarda yerləşən quldurların və onların arxasındakı qüvvələrin məqsədi müstəqilliyimizə, bütövlüyümüzə mane olmaq, biz məhv etmək olsa da, onlar bilməlidirlər ki, Qabil kimi, Mövlud kimi minlərlə vətənsevərlərimiz canları bahasına olsa da, buna əsla yol verməyəcəklər. Ulu öndərimiz Heydər Əliyev “Azərbaycanın müstəqilliyi daimidir, əbədidir, dönməzdir” deyərkən də məhz Azərbaycanın bu cür igid, qorxmaz övladlarının olduğunu düşünərək bu əminliyini ifadə edirdi.

Millətimiz Vətən uğrunda savaşan mərd oğul və qızlarımızı layiqincə qiymətləndirə bilir. Vətən yolunda ölmək bizim üçün şərəf işidir. O gün Qabil bu şərəfli işin qurbanı oldu. İndi Qabilin doğmaları, əzizləri prezidentimiz İlham Əliyevin bir ifadəsinə xitabən rahatlıq tapırlar: “Asayiş orqanları əməkdaşlarına əl qaldıranlar layiqli cəzalarını alacaqlar”. Azərbaycan daxili işlər naziri Ramil Usubovun göstərişi ilə cinayətkarlar axtarılır. Qabili sevənlər ümidlə gözləyirlər ki, onun canını alanlar layiqli cəzalarına çatacaqlar.

Şəhidlik zirvəsi...

Qabil şəhid oldu, şəhid kimi dəfn edildi. Onun dəfn mərasimi üç rəngli bayrağımız və yaylım atəşləri altında, şəhidlərə layiq şəkildə keçirilib. İgid vətən oğlu Quba rayonunun Çiçi kəndində - öz dədə-baba yurdunda dəfn edilib.

Tarix boyu bütün xalqlar xainlərə, zülmkarlara nifrət bəsləyib, xeyirxahları, qəhrəmanları isə böyük hörmət və sevgiylə yad ediblər. Məsələn, Yəhudi Uskaryot İsa peyğəmbərə xəyanət etdiyinə görə xristian dünyasında ən iyrənc şəxs hesab olunur. Heç kim onun adını uşaqlarına qoymur, onu yad etmir. Müsəlman aləmində Yezid qəddar və alçaq adam hesab edilir. Heç kəs onun adını belə çəkmək istəmir. Müsəlman aləmində bir nəfər də onun adını daşımır.

İndi asayişi qoruyan, müstəqillik uğrunda canlarından keçən şəxslərə əl qaldıran qatilləri kim yad edəcək? Öldükdən sonra onları kim və necə dəfn edəcək? Əlbəttə ki, heç kim.

Özündən sonra qalanlar

Qabil ailəli idi. İki oğlu var. Oğlanları da ataları kimi polis olmaq istəyirlər. Atalarının qanını almaq istəyirlər. Neçə-neçə oğulu onlar kimi atasız qalmaqdan qorumaq istəyirlər. Bu məqsədə çatmaq üçün onlara dəstək lazımdır.

Qabilin ölümü ailəsi, yaxınları və Çiçi camaatı üçün ağır olsa da, hamı onlunla fəxr edir. O, ölümü ilə də düşmənlərə qalib gəldi. Qabilin babası Əhəd kişi də Azərbaycanın müstəqilliyi uğrunda mübarizədə həlak olub. O, sovetlərə xidmət etməkdən cəsarətlə imtina edib, Məhəmməd Əmin Rəsulzadənin Hitlerdən müstəqillik üçün razılıq ala biləcəyinə inam bəsləyib. Bu mümkün olmadıqdan sonra ümidini itirib təslim olub və cəza yerində həlak olub.

Vətənimizin Qabil kimi övladları bizdə bir daha düşmənlərimizə qələbə çalacağımıza ümid yaradır. Onun həyatı gənclərimiz üçün əsl vətənpərvərlik məktəbidir.

Allah rəhmət eləsin!

Hazırladı: Həbibə Abdulla

Kaspi. - 2013.- 7-9 dekabr.- S. 7.