Azərbaycanın ilk milli təhsil televiziyası təqdim olundu-"Oxu.tv"

Sona Vəliyeva: «Məqsədimiz Azərbaycanda bütün məktəblilərə yüksək səviyyəli dərslər almaq imkanları yaratmaqdır»

İnternet məkanına daha bir televiziya - elmin, təhsilin, milli-mənəvi dəyərlərimizin təbliği istiqamətində məqsədyönlü fəaliyyət göstərmək iddiasında olan oxu.tv daxil oldu. Fevralın 1-də Kaspi Təhsil Mərkəzinin dəstəyi ilə yaradılmış və Azərbaycanda ilk olan www.oxu.tv internet televiziyasının təqdimat mərasimi keçirildi. Tədbiri açan layihə rəhbəri Azər Cabbarov "oxu.tv" barədə məlumat verdi. Bildirdi ki, layihənin şüarı "təhsil yolunda birgə addımlayaq"dır.

Təhsil sahəsindəki ilklər

"Kaspi" Təhsil Şurasının rəhbəri Sona Vəliyeva bildirdi ki, layihə Azərbaycan təhsil məkanında yenidir və Kaspi Təhsil Mərkəzinin maddi, mənəvi, akademik sponsorluğu ilə araya-ərsəyə gəlib: "Layihə bizə təqdim olunanda uzun müddət təhlillər apardıq. Düşündük ki, bu layihəni Azərbaycan cəmiyyətinə sevdirə, onlar üçün faydalı edə biləcəyikmi. Çətinliklər, problemləri, onu araya-ərsəyə gətirmə yollarını təhlil edəndən sonra ən böyük məsələnin üzərində dayandıq. Bu layihənin xalqımız, millətimiz üçün, gənc nəslin yetişməsində böyük fayda verəcəyini nəzərə alaraq məsuliyyəti üzərimizə götürdük. Azərbaycan dövlətinin təhsil siyasətinə dəstək oluruqsa, bunu da edə biləcəyimizi düşündük. İlk olan layihəni həyata keçirmək, onu sevdirmək, araya-ərsəyə gətirmək böyük enerji ilə bərabər böyük məsuliyyət tələb edir. Biz bu məsuliyyəti üzərimizə götürməmişdən əvvəl özümüz-özümüzə ürək-dirək verdik ki, biz bunu bacararıq. Cəmi 5 ildə kiçik bir məkanda, 2 şöbə ilə belə bir mərkəzi açdıqsa, bunu da bacara biləcəyimizi düşündük. Düşündük ki, əgər biz respublikada ümumtəhsil məktəblərində bünövrə, özül qoyan bir müəssisə kimi çıxış ediriksə, buna mənəvi məsuliyyətimiz mütləq olmalıdır. İlk olaraq bu işi də öz üzərimizə götürməliyik".

S.Vəliyeva «Kaspi-kids» mərkəzinin yaxınlarda 6-cı filialını istifadəyə verəcəklərini də qeyd etdi. Onu da bildirdi ki, Azərbaycan Dillər və Qafqaz universitetlərindən sonra ilk müstəqil tədris mərkəzi olaraq Kaspi Təhsil Mərkəzi TOEFL imtahan mərkəzi açıb: "Bu, çox çətin, beynəlxalq statuslu bir məsələdir. Biz buna da nail ola bildik. Yeganə müəssisə idik ki, dünyada ilk 100 sırada olan universitetlərlə partnyorluq əlaqələri qurmuşuq. Amerika, Böyük Britaniya, İsveçrə, Almaniya, Avstraliya, Avstriya, Rusiya, Litva və digər dövlətlərin universitetləri ilə əlaqələrimiz bizə imkan verdi ki, biz daha ürəkli olaq, əminliklə işə başlayaq".

Azərbaycan cəmiyyətinə hədiyyə

S.Vəliyeva "oxu.tv"nin «Kaspi» Təhsil Mərkəzi tərəfindən Azərbaycan məktəblilərinə, gənc müəllim kollektivlərinə, ailələrə, ümumiyyətlə, Azərbaycan cəmiyyətinə bir hədiyyə olduğunu dedi: "Oxu.tv" milli təhsil televiziyasıdır. Ona görə bunu milli təhsil televiziyası adlandırırıq ki, burada Təhsil Nazirliyinin ümumtəhsil məktəbləri üçün nəzərdə tutduğu bütün proqramlar ardıcıl, sistemli, pedaqoji dərs metodikasına aid olan bütün üslub və nəzəriyyələri düşünərək bu keçirilib və videoformatda sayta qoyulub. Bu layihə peşəkar müəllim kollektivlərinin, peşəkar televiziya işçilərinin əməyi kimi ortaya qoyulub ki, milli təhsilimizə, ümumtəhsil bazasının gücləndirilməsinə dəstək olsun. Məqsədimiz Azərbaycanda orta təhsil bazasını daha da möhkəmləndirmək, bütün məktəblilərə yüksək səviyyəli dərslər almaq imkanları yaratmaq, müəllimlərin və xüsusilə gənc pedaqoji kadrlara alternativ dərslər görmək və bu sahədə təcrübə toplamaq imkanları yaratmaqdır. Ən böyük prinsipimiz ondan ibarətdir ki, "oxu.tv" bu və ya digər səbəbdən dərsə gedə bilməyən əlil balalar üçün dəstək olsun".

S.Vəliyeva "oxu.tv"nin həm də milli təhsillə bağlı xəbər portalı olduğunu dedi. Bildirdi ki, dünyada və Azərbaycanda baş verən təhsil yenilikləri ilə burada tanış olmaq mümkün olacaq.

Sosial yönümlü layihə

Daha sonra layihə rəhbəri Azər Cabbarov layihə barədə geniş məlumat verdi. Layihənin sosial yönümlü olduğundan daha böyük auditoriyanı əhatə edəcəyini dedi. A.Cabbarovun sözlərinə görə, bu layihə «of line» internet televiziyası formatında qurulmuş çoxşaxəli və geniş profilli təhsil portalıdır: "Oxu.tv-nin yaradılmasında təhsil sahəsində tanınmış mütəxəssislər və pedaqoji kadrlar, eləcə də peşəkar televiziya əməkdaşları iştirak edir. "Oxu.tv" saytının əsas funksiyası yüksək keyfiyyətlə hazırlanmış video dərslərin geniş tamaşaçı auditoriyası üçün yayımlanmasıdır. Video dərslər Azərbaycanın orta ümumtəhsil məktəblərində tədris olunan I-XI siniflər üzrə bütün fənləri əhatə edir. Dərslər Təhsil Nazirliyinin Tədris planına əsasən hazırlanıb".

Layihə rəhbəri qeyd etdi ki, "Oxu.tv" öz fəaliyyətini təhsil, gənclər və idman nazirlikləri, müxtəlif dövlət qurumları, uşaq gənclər və qeyri-hökumət təşkilatları ilə sıx əməkdaşlıq şəklində quracaq.

A.Cabbarovun sözlərinə görə, dərsləri tədris edən müəllimlər «əməkdar müəllim», «ilin ən yaxşı müəllimi» adını almış peşəkar pedaqoqlar, ali və orta məktəb dərsliklərinin müəllifləri, Azərbaycan Milli Elmlər Akademiyasının və nüfuzlu universitetlərin təcrübəli əməkdaşlarıdır. Layihə rəhbəri bildirdi ki, "oxu.tv" vasitəsilə tamaşaçıların hər bir informasiya və video materialına istənilən zaman baxmaq imkanı var. Saytda müxtəlif bölmələrin yer aldığını deyən A.Cabbarov bu bölmələr barədə geniş məlumat verdi.

"Valideynlər üçün"

Bildirdi ki, «valideynlər üçün» adlı bölmədə valideynlərə "oxu.tv"nin şagidlər üçün nə qədər faydalı olduğu izah edilir. Eləcə də, hər bir valideynin saytda öz fikirlərini yazmaq, peşəkar pedaqoq və psixoloqlardan yardım almaq imkanı olacaq. Saytdakı «müəllimlərimiz» adlı bölmədə video dərsləri nümayiş olunan müəllimlər haqqında ətraflı məlumat yerləşdirilib. «Xəbərlər» bölməsində isə təhsil sahəsində baş verən, eləcə də gənclər üçün maraqlı olan bütün yeniliklər yerləşdiriləcək.

«Məni tanıyın» bölməsində şagirdlər hər hansı bir sahədə, məsələn, rəssamlıq, rəqs, musiqi, ədəbiyyat, riyaziyyat və s. istedadlarını geniş tamaşaçı auditoriyasına nümayiş etdirə bilərlər. Bunun üçün hər kəs özünün mobil telefon və yaxud kameraya çəkilmiş görüntüsünü saytda yerləşdirə bilər. Biz də bunun üçün Bəstəkarlar və Rəssamlar ittifaqları ilə əməkdaşlıq edəcəyik.

"Sorğu» bölməsindəki cavablar əsasında isə sayt rəhbərliyi müxtəlif məsələlərə dair oxu.tv-nin tamaşaçı auditoriyasının rəyini öyrənə biləcək.

Bundan başqa, saytda müxtəlif fənlər üzrə test tapşırıqları və onların həlli yolları yerləşdiriləcək. Oxu.tv həm də gənc nəslin asudə vaxtının mənalı təşkil olunmasına xüsusi diqqət ayıracaq. Şagirdlər arasında musiqinin, incəsənətin, idmanın təbliği də saytın prioritet məsələləri sırasındadır.

"Psixoloq məsləhəti" bölməsində isə həm valideynlər, həm müəllimlər, həm də şagirdlər öz suallarını psixoloqa verə biləcəklər. Suallar istək əsasında anonim də verilə bilər. Həftədə bir dəfə psixoloq video şəklində bütün sualları cavablandıracaq.

Məşhur aktyorların ifasında Azərbaycan şairlərinin şeirləri də səsləndirilərək sayta yerləşdiriləcək ki, şagirdlər həmin şeirlərin necə intonasiya ilə oxunduğunu görsünlər.

Tok-şoular da olacaq

A.Cabbarov təhsil strukturları, müəllimlərlə sıx əməkdaşlığa ehtiyaclarının olduğunu dedi. Bildirdi ki, materiallar sayta darıxdırıcı dərs vəsaiti kimi qoyulmayacaq: "Müəllimlər, valideynlər öz fikirləri ilə forumda iştirak edəcəklər. Burada həmçinin təhsildə rəqabəti artıramq üçün şagirdlər üçün müxtəlif sahələrdə müsabiqələr keçiriləcək. Həmçinin tok-şoular, müxtəlif tipli verilişlər, müsahibələr də burada yer alacaq".

Layihə rəhbəri məqsədlərindən birinin də bölgələrdəki məktəbləri çəkmək olduğunu dedi: "Ucqar kəndlərimizdə elə müəllimlər var ki, onların da dərs metorlarını çəkib göstərəcəyik. Növbəti nəzərdə tutduğumuz məsələlərdən biri də uşaqlara yeni qəhrəmanlarımızı göstərməkdir. Bu qəhrəmanlar bizim gənc alimlərimiz, elm adamlarımız olacaq, onları daha çox təbliğö etməyə çalışacağıq".

Xarici təcrübə milliləşdirilir

Təhsil Araşdırmaları İnstitutunun direktoru Yəhya Kərimov dedi ki, sözügedən layihə Təhsil Nazirliyinin fəaliyyətinə çox böyük köməkdir: "Təhsil Nazirliyinin yüksək səviyyədə görmədiyi işləri «Kaspi» Təhsil Mərkəzi həyata keçirəcək. Bu mərkəzdəki yeni təlim metodlarını, innovasiyanı, xarici təcrübənin tətbiqini alqışlayıram. Ən çox xoşuma gələn isə odur ki, bu təhsil mərkəzində xarici təcrübə milliləşdirilərək tətbiq edilir".

Ailə, Qadın və Uşaq məsələləri üzrə dövlət Komitəsinin sədr müavini Aynur Sofiyeva sözügedən layihənin gələcəyimiz olan uşaqlar üçün uğurlu olacağını dedi: "Çünkü bu layihənin arxasında milli maraqlar dayanır. Bu işdə həm valideynlər, həm də uşaqların hüquqları ilə bağlı məsələlərdə bizim komitə sizə dəstək ola bilər".

"Təhsildə islahat düşüncədə islahat"

Mətbuat Şurasının (MŞ) sədri Əflatun Amaşov hər bir xalqın təhsilinin onun inkişafında mühüm yer tutduğunu bildirdi: "Azərbaycanda bu sahədə mühüm işlər gedir. Rəsmi qurumlar kifayət qədər islahatlar aparır. Amma bu sahədə hər şeyin düzəlməsi üçün vaxt lazımdır. Çünki təhsildə islahat düşüncədə islahat tələb edir".

Ə.Amaşov bildirdi ki, özəl təşkilatlar da təhsildə islahatlara yardımçı olmalıdır: "Kaspi Təhsil Mərkəzinin bir neçə tədbirində iştirak etmişəm, həmişə də yeniliklə qarşılaşmışam. Bu təhsil mərkəzində mindən çox gənc öz dil bacarıqlarını yaxşılaşdırır. Mənim oğlum da xaricdə təhsil almaq üçün məhz bu mərkəzdə dil bacarıqlarını təkmillədirdi".

MŞ sədri yaxın zamanlarda "oxu.tv"nin nəinki məktəblilər, həmçinin valideynlər üçün də ən çox daxil olunan sayta çevriləcəyinə əmin olduğunu dedi.

"İlk olmaq çətin, amam şərəflidir"

Kütləvi İnformasiya Vasitələrinə Dövlət Dəstəyi Fondunun sədri Vüqar Səfərli «Kaspi» Təhsil Mərkəzinin 5 ildə gördüyü işlərin göz qabağında olduğunu dedi: "Mən də «Kaspi» Təhsil Mərkəzinə öz adımdan təşəkkür edirəm. Oğlum bu mərkəzdə dil kursu keçərək elə «Kaspi» Təhsil Mərkəzinin xəttiylə hazırda xaricdə magistr təhsili alır».

"Azərbaycan" qəzetinin əməkdaşı Flora Xəlilzadə ilk olmağın çətin, amma şərəfli olduğunu dedi. Çünki ilklər tarixdə yaşayırlar. F.Xəlilzadə onu təklif etdi ki, orta məktəb dərsliklərindəki səhvlər bu saytda yer almasın.

Bakı Şəhər Baş Təhsil İdarəsinin ictimaiyyətlə əlaqələr şöbəsinin rəhbəri Zəminə Əlqızı da saytın müsbət tərəflərindən danışaraq gələcəkdə saytda məktəbəqədər hazırlıq kurslarının da yer alacağına ümid etdiyini bildirdi.

"Məktəbləri üzümüzə açın"

Təhsil Nazirliyinin mətbuat xidmətinin rəhbəri Bayram Hüseynzadə «Kaspi» Təhsil Mərkəzinin heç bir reklam olmadan yalnız öz fəaliyyəti ilə tanınmış nəhəng təhsil mərkəzinə çevrildiyini vurğuladı. Nazirlik sözçüsü tədbirdə iştirak etməyinin daha bir anlama gəldiyini dedi: "Bu, o deməkdir ki, Təhsil Nazirliyi bu layihəni dəstəkləyir. Öz əməkdaşlarımızla sizə kömək etməyə hazırıq".

Sona Vəliyeva Təhsil Nazirliyi yetkililərindən xahiş etdi ki, məktəbləri onların üzünə açsınlar: "Burada orta məktəb direktorları da iştirak edir. Amma onlar nədənsə çəkinərək bizim orta məktəblərə daxil olaraq layihələrimizi orada təqdim etməyimizə imkan yaratmırlar. İnşa müsabiqəsi keçirmək istəyirik, amma direktorlar məktəblərə girərək bunu şagirdlər arasında elan etməyimizə imkan vermir. Xahiş edirəm, nəzərə alın ki, başqa məqsədimiz yoxdur".

"İki sahil" qəzetinin baş redaktoru Vüqar Rəhimzadə də saytın önəmindən danışaraq, şagirdlərlə birbaşa ünsiyyətin çox böyük vasitə olduğunu dedi.

Sonda sayt tədbir iştirakçılarına təqdim edildi.

Lalə Musaqızı

Kaspi.-2013.-2-4 fevral.-S.5.