QatilŞimali Kiprdə 

 

Kimdeyir, desin, mənə görə, Azərbaycan teatr məkanında ötən ilin ən uğurlu hadisəsi Akademik Milli Dram Teatrında Mehriban Ələkbərzadənin quruluşunda hazırlanan “Qatil” tamaşası idi. Azərbaycan cəmiyyətində yaşadığımıza görə kimlərinsə bu fikrimi tərəfkeşlik, reklamya pyes müəllifinə yarınmaq cəhdi kimi anlaya biləcəyini istisna etmirəm. Amma vurğulamalıyam ki... teatr sistemində çalışdığıma görə hər hansı müsbət hesab etdiyim teatr hadisəsinə səmimi fikir bildirməkdən imtina etməli olduğumu düşünürsünüzsə, heç bu yazımı oxumaya da bilərsiniz.

Ümumiyyətlə, Mehriban Ələkbərzadə intellektinə, yaradıcı düşüncəsinə, istedadına və şəxsiyyətinə hədsiz hörmət bəslədiyim az sayda rejissorlardandır. Elə bu səbəbdən rejissorun yaradıcılığını izləmək, onun yeni işlərindən xəbər tutmaq şəxsən mənim üçün maraqlıdır. Artıq neçə müddətdir ki, Mehriban xanım Şimali Kipr Türk Respublikasında tamaşa hazırlayırdı. Özü də ki, Elçinin “Qatil” pyesini. Kiprdəki tamaşa Mehriban Ələkbərzadənin “Qatil”lə üçüncü təması idi. Bunun özünü maraqlı və əlamətdar bir fakt hesab etdiyimi vurğulayaraq, bu fakta münasibətimi, yəni rejissorun bir əsərə bir neçə dəfə quruluş verməsi haqqında mülahizələrimi bir başqa yazıya saxlayıram.

Hələliksə, bu sənət faktı haqqında mənə məlum olan informasiyaları Sizlərlə bölüşmək istəyirəm. İş bu ki, Azərbaycan Dövlət Akademik Milli Dram Teatrı ilə Şimali Kipr Türk Dövlət Teatrları İdarəsi arasında imzalanan müqaviləyə görə, Şimali Kipr Teatrları ilə Azərbaycan teatrlarının genişmiqyaslı yaradıcılıq mübadiləsi nəzərdə tutulur. “Qatil” əsərinin Şimali Kiprdə Mehriban Ələkbərzadənin quruluşunda hazırlanması da, əslində, bu müqavilədə həyata keçirilməsi nəzərdə tutulan silsilə tədbirlərin başlanğıcıdır. Bu istiqamətdə yaxın gələcəkdə də bir sıra ikitərəfli layihələrin həyata keçirilməsi planlaşdırılır. Hələliksə gələcək planları bir yana qoyub da, artıq nəticəsi bəlli olan hadisə haqqında danışmaq daha doğru olar.

Beləliklə, Mehriban Ələkbərzadənin Şimali Kipr Respublikasında Xalq yazıçısı Elçinin “Qatil” pyesi əsasında hazırladığı tamaşa 8 fevral tarixində Lefkoşadakı Atatürk Kültür Mərkəzində seyrçilərə təqdim olunub. Tamaşada rolları kiprli aktyorlar Oya Akın, Tuyqun Töre, Yılsay Özbudak və Bilen Kılıç ifa ediblər. Səhnə əsərində Cem Adrianın musiqilərindən istifadə olunub.

Tamaşanın premyerasında iştirak etməyi çox istəyirdim. Amma bu mümkün olmadığı üçün hələlik tamaşanın fotoları və videofraqmentləri, bir də rejissorun söhbətləri ilə kifayətlənməli oluram.

Mehriban xanımın sözlərinə görə, o Bakıdakı quruluşun əsas prinsiplərini Kiprdə də saxlayıb. Rejissor yozumuna uyğun aktyor seçimində, maddi-texniki təminat baxımından çox böyük çətinliklərlə üzləşdiyini deyən Mehriban Ələkbərzadə nəticə etibarilə maraqlı bir işin ərsəyə gəldiyini düşünür.

Şimali Kiprdə “Bayraq xəbər” televiziyasının “Sənət xəbər” proqramında rejissor öz tamaşasının məğzini bir cümləylə belə ifadə edir: “Biz sosiumun içindən çıxan gerçək insanların real həyatını təsvir etməyə, insandan və insanlıqdan bəhs edən bir tamaşa hazırlamağa çalışmışıq”.

Növbəti aylarda tamaşanın Bakıda nümayiş olunması nəzərdə tutulur.

 

 

Elçin Cəfərov,

Teatrşünas

 

Kaspi.-2013.-16-18 fevral.-S.23.