İstanbul Şoppinq Festivalının tanıtımı Azərbaycandan başladı

Gələn ildən media nümayəndələrimiz də Türkiyədə həm əylənə, həm də alış-veriş edə biləcəklər

Bu gün Bakıda İstanbul Şoppinq Festivalının təqdimatı keçirildi. Təqdimatda festivala həsr edilmiş qısa tanıtım video roliki nümayiş olundu. Videoda Türkiyənin satış mərkəzləri, İstanbulun küçələri və əhalinin sıx məskunlaşdığı ərazilər göstərilirdi.

İstanbul Şoppinq Festivalının təşkilat komitəsinin sədri Vahab Küçük alış-verişlə bərabər əyləncə xarakteri daşıyan festivalın məqsədinin İstanbul şəhərinin dünyaya daha yaxşı tanıdılması olduğunu bildirdi: “Hər il olduğu kimi, bu il də festivalın tanıtımına Azərbaycandan başladıq. Bu, Azərbaycanla aramızda olan dostluq və yaxınlığın göstəricisidir. Bu il türk markalarına böyük maraq göstərən azərbaycanlıların sayının daha da artacağını gözləyirik. Keçən ilin iyun ayında festivalla bağlı İstanbula gedən azərbaycanlıların sayı 35% artıb. Əsas məqsədimiz İstanbulu dünyanın alış-veriş mərkəzlərindən birinə çevirməkdir. Bu il həyata keçirdiyimiz İSF Traveler Card əldə edən turistlər festival çərçivəsində hotel və restoranlarda özəl endirim xidmətlərindən yararlana biləcəklər. 8-30 iyun tarixlərində keçiriləcək İstanbul Şoppinq Festivalı 35 ticarət mərkəzini əhatə edəcək. Festival çərçivəsində İstanbulda 90 mağazada 40 gün, 40 gecə alış-veriş tədbirləri həyata keçiriləcək. Festivalın əsas məqsədlərindən biri də insanlara sərfəli qiymətlərlə çox gözəl geyimlər təklif etmək olacaq”.

Türkiyənin Azərbaycandakı səfirliyinin mədəniyyət üzrə müşaviri Seyid Əhməd Arslan da azərbaycanlıları festivalda fəal iştirak etməyə çağırdı: “Biz də öz növbəmizdə Azərbaycanda hər il Türkiyənin turizm məkanlarının reklamını edirik. 2013-cü ildə daha fəal iş görəcəyimizi rahatlıqla söyləyə bilərəm. Bu il üçün gözəl layihələrimiz var.

Televiziyalarda, internet saytlarda, küçə lövhə və monitor reklamlarında işlərimizi davam etdirəcəyik. Reklamlarımız yenə internet saytlarda daha çox yer alacaq. Belə bir təşəbbüsün yaradılmasını yaxşı qarşılayıram və daha böyük uğurlar arzulayıram”.

İSF icra qurumunun üzvü Hüseyn Doğan Azərbaycanda olduğu və mətbuat nümayəndələri ilə görüşdüyü üçün məmnunluğunu bildirdi: “Nəzərinizə çatdırım ki, Türkiyə bazarlarında təqdim olunan keyfiyyətli markalar dünya ölkələri ilə rəqabətdə ən ön yerləri tutur. Dünya arenasında Türkiyə markaları seçilir və hər kəs də bu barədə kifayət qədər məlumatlıdır. Sizləri ölkəmizdə qarşılamaqdan qürur duyarıq”.

Müğənni Tünzalə Ağayeva Türkiyədən gələn bütün media nümayəndələrini və digər qonaqları salamladı. Müğənni Türkiyəyə heyran olduğunu bildirdi: “Dünyada İstanbulu sevən insanların sayı çoxdur. Mən də o insanların siyahısına daxiləm. Fransız yazarı söyləyib ki, dünyanın ən gözəl şəhərinin bir əksi varsa, o da İstanbulun dənizdəki əksidir. Qadınlar şoppinqi sevirlər. Ona görə də qadınlarımızı bu layihədən yararlanmağa çağırıram. Belə təşəbbüs təkcə ticarət məqsədi ilə hazırlanmır. Düşünürəm ki, layihə çərçivəsində Türkiyənin mədəniyyəti, tarixi də özünə turist cəlb edəcək. Bu festivala bir neçə dəfə qatıldım və qatılmağa davam edəcəyəm”.

Təqdimatın sonunda mətbuat nümayəndələri layihənin təşkilatçılarına suallar ünvanladılar. “Azərbaycanın media nümayəndələri nə zaman layihə çərçivəsində Türkiyəyə səfər edə biləcəklər” sualı türkiyəli qonaqların marağına səbəb oldu. Verilən cavablardan aydın oldu ki, gələn ildən etibarən mətbuat nümayəndələrimiz də adıçəkilən layihə çərçivəsində Türkiyədə həm əylənə, həm də alış-veriş edə biləcəklər.

Mətbuat nümayəndələrinin növbəti sualı TRT-nin baş direktoru İbrahim Şahinə yönəldi. Belə ki, “Azərbaycan haqqında TRT-də nə zaman filmlər çəkiləcək” sualına cavab verən İ.Şahin bu il Azərbaycandan bəhs edən bir sıra sənədli filmlər çəkildiyini bildirdi: “TRT kanalında Azərbaycanla bağlı 2000 mindən çox xüsusi reportajlar hazırlanıb. Biz 2 millət, bir dövlətik. Bu sistemə görə də uyğunlaşırıq. “Sakarya Fırat” filmində Mübariz İbrahimov haqqında kiçik parça hazırlamışdıq və bu parçanın sosial şəbəkələrdə yayıldığını, böyük marağa səbəb olduğunu gördük. Bundan sonra TRT kanalında Azərbaycanın dahi şəxsiyyətləri ilə bağlı seriallara, filmlərə daha çox önəm verməyə çalışacağıq və bu yöndə müəyyən işlər görəcəyik”.

Qeyd edək ki, dünən Heydər Əliyev Sarayında Azərbaycan və Türkiyədən olan sənətçilərin iştirakı ilə festivalın açılışına həsr edilmiş konsert keçirildi. Tədbir həm yerli televiziya kanallarında, həm də TRT-də canlı olaraq göstərildi. Festival barədə daha geniş məlumat almaq istəyən oxucular isə www.istshopfest.com saytına baş çəkə bilərlər.

Xəyalə Rəis

Kaspi.-2013.-2 may.-S.15.