Sponsorum sənətim olub
Roza Cəlilova: “O, rəqslər
bizimlə getdi, geri qayıtmaz artıq”...
Müsahibim Azərbaycanın rəqs tarixinə öz adını qızıl hərflərlə yazdıran
xalq artisti Roza Cəlilovadır. Roza xanımın
evində qonağı
olduq. Evində qastrol səfərləri
zamanı çəkdirdiyi
şəkillərdən tablo
yaradan rəqqasə o
anları bizimlə bir daha xatırladı.
Gənclik illərindəki
rəqslərinin xatirələri
ilə yaşayan Roza Cəlilova bu gündən də danışdı, bizimlə söhbətində
ara mahnılarının
musiqilərinə oynanılan
rəqslərdən razı
qalmadığını və
ümumiyyətlə, yerli
televiziya proqramlarında
ifa olunan rəqsləri professional hesab
etmədiyini söylədi.
Məni qorumağa çalışırdılar
- 84 illik ömrünüzün 60 ilini
bu sənətə həsr etmisiniz. Peşman deyilsiniz ki?
- Heç bir zaman rəqqasə olduğum üçün
peşman olmamışam.
Milli rəqsdən əvvəl
balet rəqsi oynayırdım. O zaman
11 yaşım var idi. Balet rəqqasəsi olduğum
zaman milli rəqslərimizə böyük
marağım vardı.
9 il balet
rəqsinin sirlərini
öyrəndim. O vaxt balet rəqqasəsi olduğum üçün
mənə təqaüd
verirdilər ki, balet sənətini tərk etməyim. Həmin zamanlar Azərbaycanda cəmi 4 baletmeyster var idi. Məni qorumağa çalışırdılar.
Ancaq hiss edirdilər ki, mən baleti
tərk edəcəyəm.
Ailəm
isə baletmeyster olmağımı istəyirdi.
Ailəmdən güclə icazə
alıb, mahnı və rəqs ansamblına gəldim.
46-cı ildən rəqs etməyə başlamışam. İki
il balerina
kimi fəaliyyət göstərdim. Ondan sonra 49-cu ildən
Üzeyir bəyin yaratdığı ansamblda
ömrümü Azərbaycanın
milli rəqsinə həsr etdim. Milli rəqslərimizi xalqımız
çox sevir.
Hər
bir xalqın folkloru onun güzgüsüdür. Balet rəqsi
dünyanın bütün ölkələrində var. Əgər
biz də balet oynasaq, milli rəqslərimizi kim oynayacaq? Hər
kəs təməlini məhz milli rəqsdən qoyduğu
halda, mən balet məktəbini bitirib, orada yoğrulub gəlmişdim
bu sənətə. Mənim yerimə kim olsa idi, baleti qoyub
milli rəqsi seçməzdi. Sevinirəm ki, mənim
zamanımda yaşayan tamaşaçılar məni görən
zaman rəqslərimin ismini söyləyirlər. Bu,
özü böyük nailiyyətdir. Hər rəqqasənin
rəqsi yaddaşlarda qalmır. Əminə Dilbazi, mən və
Bəsti Həmidovanın yaratdığı rəqslər hər
zaman xalqın yaddaşında qalacaq. Balerina kimi fəaliyyət
göstərdiyim zaman məni Berlinə göndərdilər.
Azərbaycandan oraya 30 nəfərlik heyət gedəcəkdi.
Ancaq son anda 30 nəfərin içərisindən
hamını ələyib 5 nəfər göndərdilər.
Bu 5 nəfərə mən, Həbib Bayramov, Mütəllib
Novruzov, Azər Məmmədxan və Böyükağa Məmmədov
daxil idi. Bu o demək idi ki, bizi çoxluğun içindən
seçmişdilər.
-
İndi rəqqasəliyə dırnaqarası bir sənət
kimi baxırlar. Ancaq sizin yaşadığınız dövrdə
rəqqasə sənəti daha hörmətli idi.
- Zəmanə
dəyişməyib, insanlar və şərait dəyişib.
Mən səhnədə rəqs edən zaman gözləyirdim
ki, zaldakı tamaşaçılar çıxıb getsin
ondan sonra səhnənin arxasından çıxıb evə
gedim. Tamaşaçıların məni görməsini istəmirdim.
Mən elə rəqqasə olmuşam. İstəyirdim ki, hər
kəsin yaddaşında səhnədəki Roza kimi qalım.
Heç zaman sənətimin qiymətini aşağı
salmamışam. Ona görə bizi tamaşaçı sevdi.
İndiki rəqqasələr kimi bütün günü
toylara gedib insanların içərisində olmaqla sevilmirsən.
Rəqqasə səhnəyə yaraşır. İndiki rəqqasələr
açıq-saçıq şəkildə el məclislərində
rəqs etməklə sevildiyini hesab edirlər. Onlar da ehtiyac
üzündən toylara gedir və milli rəqslərimizdən
uzaqlaşırlar. Rəqqasə gərək xalqın
içində görsənməsin. O zaman heç televizorlar
da yox idi, ancaq bizi hamı tanıyırdı. Deyiləsi
çox söz var, ancaq…
Bacarırlarsa oynasınlar
- Azərbaycanda ilk dəfə hind
rəqsini siz oynamısınız. Bu gün səhnədə
hind rəqsi adı ilə oynanılan rəqslər sizi qane
edirmi?
-
1957-ci ildə Həbəşistana getdim, orada məşhur bir
hind rəqqasəsi səhnədə gözəl hind rəqsi
ifa edirdi. O, səhnədə oynayarkən mən də gizli səhnənin
arxasından ona baxırdım. Rəqsi bitəndən sonra mənim
onu izlədiyimi gördü və dedi ki, hind rəqsini sənə
öyrədəcəyəm və paltarlarını da,
ayağındakı zəncirlərini də mənə verdi.
Hind rəqsini ondan öyrəndim. Azərbaycan səhnəsinə
hind rəqsini ilk mən gətirdim. İndiki hind rəqqasələrini
oynayan rəqqasələr hind kasetlərinə baxıb hərəkətləri
oradan götürürlər. Onlar rəqs hərəkətlərinin
mənasını da anlamırlar, beyinlərinə gələn
hərəkəti edirlər. Elə hesab edirlər ki, hind rəqsi
oynayırlar. İndiki hind rəqqasələrin heç biri
peşəkar deyil. 1965-ci ildə Cahangir Cahangirov mənə
söylədi ki, çox istəyərdim, sən ərəb
rəqsi də oynayasan. Ərəbistanın öz ansamblı
və orkestri ilə ərəb rəqsi oynamışam. Ərəb
rəqsini o zamanlar Ərəbistanın ən məşhur rəqqasəsi
Samira adlı rəqqasədən öyrənmişəm.
Samira bir ay ərzində mənə ərəb rəqsi
öyrətdi. Ərəb rəqsini ifa edən zaman həyəcandan
əsirdim. Deyirdim ki, birdən düzgün oynamaram. Zalda oturan
hər kəs rəqsimə heyran olmuşdu. Ərəbistanın
ifaçısı Cahangir müəllimə demişdi ki, Roza
xanım 6 ay Ərəbistanda məşq etsə, oranın
professional ərəb rəqqasəsi olar. Tamaşaçı
haradan bilir ki, rəqqasənin oynadığı ərəb rəqsidir,
ya hind? Rəqqasələr bacarırsa, mənim rəqsimi
oynasınlar. Rəqsə ürək qoymaq lazımdır.
Lirik rəqsləri ifa etmək çox çətindir. Onun
üçün gərək insanın ürəyi olsun. Ərəb
rəqsini indi hər kəs oynayır və indi o göbək
rəqsi kimi təqdim olunur. Açıq-saçıq geyimlərlə
rəqs etmək düzgün deyil.
- Rəqs geyimlərinizi necə əldə
edirdiniz?
- Rəqs
geyimlərimin hamısını özüm tikdirirdim. Hətta
geyimimin biri də muzeydə saxlanılır. Əgər səhər
efirdə rəqs edəcəkdimsə, gecəni yatmayıb
oynayacağım paltara bəzək düzəldirdim. Köhnə
paltarlarımın üstündə işləyib onu təzələyirdim.
Bizim zamanımızda qonorarlar çox gec-gec verilirdi.
Aldığım qonorara ancaq paltar alırdım. Mən
heç zaman açıq-saçıq geyinməmişəm.
Bir dəfə dizdən bir az aşağı səhnə
geyimim olub. O rəqsdə fırlanma hissəsi çox
olduğu üçün belə geyim lazım idi. Milli geyimlərimizin
hamısı uzun olub. Bizim zərli, dəbdəbəli
paltarlarımız yox idi. Əsl folklor geyimlərimiz vardı.
Ərəb rəqsi oynayan zaman da ona tül
bağlamışdım ki, bədənim görsənməsin.
Əsl ərəb rəqsi açıq-saçıq geyimlə
göstərilmir. Naimi Akefe adlı bir ərəb rəqqasəsi
ilə tanış olmuşdum. O, ərəb rəqsi geyiminin
üstündən qara tül geyinmişdi ki, ona heç kim
toxunmasın. 45 dəqiqə səhnədə oriyental rəqsi
etdi və insan o rəqsə baxanda heyran olurdu. Əsil oriyental
o idi.
-
İndi rəqs deyən zaman toydakı rəqqasələr
gözümüzün qabağına gəlir...
- Bir
müddət eşitdim ki, kiçik uşaqları aparıb
toylarda oynadırlar. Ayıbdır axı. İndi kiçik rəqqasələrin
belə başına tac qoyurlar. Bu, düzgün deyil. Tacı
qoya bilirdi Qəmər Almaszadə. Yalnız məşhur və
solist rəqqasələr tac qoya bilərdilər. Belə olmaz
axı. Sənəti pula dəyişməzlər. Sənət
özü pul gətirir. Ancaq pula görə sənəti
ucuzlaşdırmaq lazım deyil. Bir ara eşitdim ki, bəzi
analar övladlarını xarici rəqslərə qoymaq istəyirlər.
Heç bir xarici rəqsi Azərbaycan rəqsinə dəyişmərəm.
Nə villam, nə də
bağım var
- Bu
gün səhnədə professional rəqqasə olaraq kimi
görürsünüz?
- Sənətdə
bu gün özüm kimi bir rəqqasə görmək istəyirəm.
- Necə rəqqasə?
- Azərbaycan
mili rəqsini sevən və çox istedadlı rəqqasə.
Xalq rəqsini mənim çatdırdığım kimi
çatdıra bilən rəqqasə görmək istəyirəm.
Oğlumun qızını baletə qoymuşam, o, baletdə
yaxşı yoğrulub, gözəl rəqslər edəcək.
Ona ümidim çox böyükdür. Səhnə
üçün bacarıq lazımdır. İndi zövqlər
dəyişib. Yad musiqilər, yad rəqslər bütün
gündəmi zəbt edib. Hər şadlıq evinin
özünün rəqqasəsi olmalıdır. Bir rəqqasənin
10 dəqiqə burda oynayıb, 10 dəqiqə başqa
şadlıq evində oynaması düzgün prinsip deyil. 60
ildir sənətdəyəm, getmədiyim əcnəbi ölkə
yoxdur. Ordenim, imperator qızıl medalım, bütün
yüksək titulları, medalları almışam. Ancaq nə
villam, nə də bağım var. Çünki mən sənətlə
məşğul olmuşam. İndiki rəqqasələrimizin
sponsorları var. Mənim sponsorum sənətim olub. Sənət
rəqqasəni tamaşaçılara da sevdirəcək, ona
pul da gətirəcək. Musiqilərimiz ən çox toylarda
dəyişib. O zaman Səid Rüstəmov kimi bəstəkarlar
xalqa yaxın musiqilər yazırdı. Cahangir mənə
“İlk bahar”, “Zərif yerişli”, “İran poeması” kimi
mahnılar yazıb. Onlar çox gözəl
mahnılardır.
-
İndi hamının başı şou-biznesə
qarışıb. Milli rəqslər demək olar ki, unudulub.
- Mən şou-biznesi heç zaman qəbul etməmişəm.
Rəqs indi pul olub.
Təranə Muradova pul üçün səhnəyə
gəlməyən rəqqasələrdəndir.
Mənim
rəqsimlə “Tərəkəmə”,
“Qaragöz”, Əminə
Dilbazi ilə “Vağzalı”, “Mirzəyi”,
kimi rəqslər getdi artıq. Onlar geri qayıtmaz artıq.
- O rəqsləri
necə geri qaytarmaq olar?
- Biz artıq qocalmışıq.
Bəlkə bir əlli ildən sonra Əlibaba Abdullayev kimi insan dünyaya
gələr və hər şey yenidən bərpa olar. İndi o rəqsləri oynayan
yoxdur. Həm də o zaman
televiziya və video yox idi ki,
indiki rəqqasələr
bizim rəqslərimizə
baxıb nəsə öyrənsinlər.
Xəyalə Rəis
Kaspi.-2013.-4-6 may.-S.12.