“Qızıl kəlmə” öz sahiblərinə qovuşdu

Əbülfəs Qarayev: “Qoy gənclər görsün ki, onların yaratdığı əsərlər qiymətləndirilir”

Bu gün Mirzə Fətəli Axundov adına Milli Kitabxanada “Qızıl Kəlmə” Ədəbi Mükafatı komissiyasının yekun iclası keçirildi. Tədbirə tanınmış yazarlar, mədəniyyət işçiləri və mətbuat nümayəndələri təşrif buyurmuşdu.

Bu il müsabiqədə nəsr, poeziya, ədəbi tənqid, publisistika və orijinaldan bədii tərcüməyə xüsusi yer ayrılmışdı. Əsərlərin qəbulu mart 1-də başa çatan sözügedən müsabiqəyə 30 əsər təqdim edilib. Komissiya üzvlərinə əsərlərin qiymətləndirmə cədvəli verilib. Tam şəffaf şəkildə keçirilən müsabiqənin yekunları hər kəsi məmnun etdi.

Tədbirdə ilk olaraq çıxış edən mədəniyyət və turizm naziri Əbülfəs Qarayev bu il keçirilən tədbirlərin əksəriyyətinin Heydər Əliyevin xatirəsinə həsr olunduğunu və ulu öndərin Azərbaycanın qələm sahiblərinə hər zaman böyük hörməti olduğunu, yazıçıların yaratdıqları əsərlərin xalq tərəfindən qəbul edilməsi üçün daima çalışdıqlarınıını qeyd etdi: “Bu mükafatlandırmanın əsas mahiyyəti yazıçılar, şairlər tərəfindən yaradılan, dünya ədəbiyyatına yaxın olan əsərləri oxuculara çatdırmaqdan ibarətdir. “Qızıl kəlmə” mükafatı yazıçıların həm yaradıcılığının, həm tərcümə əsərlərinin, həm də ədəbi tənqidin inkişafına yönəlib. İnanıram ki, bizim laureatlarımızın gələcəkdə yeni kitabların nəşr olunması üçün əvəzsiz rolu olacaq və öz əsərləri ilə Azərbaycan mədəniyyəti, tarixi və gələcəyi haqqında böyük əsərlər yazacaqlar. Bu mükafatlandırmanın fikir olaraq ortalığa qoyulması və gerçəkləşdirilməsi yazıçılarımızın əməyinin qiymətləndirilməsi üçün böyük amildir. Ümumiyyətlə, belə layihələrin gerçəkləşməsi üçün əlimizdən gələni edəcəyik. Bu nominasiyaların sırasında “Şans” adlı layihə də var ki, burada biz gənclərə yeni bir şans veririk. Qoy gənclər də görsün ki, onların yaratdığı əsərlər qiymətləndirilir. Ötən il “Şans” nominasiyasına layiq görülən gəncimiz bu il Azərbaycanda ən çox oxunan və əsərləri diqqət cəlb edən gənc yazarlar sırasındadır”.

Nazir ildən-ilə Azərbaycan yazıçılarının kitablarının çoxalmağa doğru getdiyini və bu il Azərbaycanda üçüncü böyük beynəlxalq kitab sərgisinin keçirilməsinin nəzərdə tutulduğunu söylədi: “2011-ci ildə vətənimizdə keçirilən kitab sərgisində otuza yaxın ölkə iştirak etmişdi. Bu il isə vətənimizə təşrif buyuran ölkələrin sayının artması gözlənilir. Bu kimi tədbirlərin və sərgilərin keçirilməsi insanların kitaba marağını artırır. Belə tədbirlərin keçirilməsi kitabsevərlərin yeni əsərlərlə tanış olması və onları oxuması üçün təşkil olunub. Baxmayaraq ki, son dövrlər dünyada və Azərbaycanda kitab oxucularının sayının azaldığını və hər kəsin əsərləri sosial şəbəkələrdən oxuduğunu söyləyirlər. Əgər kitabxana yeni formata uyğunlaşarsa, gənclərin maraq göstərdiyi yeni kitabları alarsa, o zaman nə oxucuların sayı azalar, nə də yazıçılar həvəsdən düşər. Bu ildən etibarən ədəbiyyat aləmində və Yazıçılar İttifaqında yeni insanlar, adlar tanınmağa başlayır və o simaların əsərlərini tanıtmaq üçün hər cür imkan yaradırıq. Onu da qeyd edim ki, Azərbaycan xalqının formalaşmasında qələm sahiblərinin söz və yazılarının böyük rolu var”.

Əməkdar incəsənət xadimi Çingiz Əlioğlu münsiflər heyətinin doğru seçim etdiyini, qalibiyyətə layiq görülən namizədlərin bu mükafata layiq olduqlarını söyləyib, onları təbrik etdi: “Son dövrlər kitab yazmağa böyük maraq yaranıb. Bu tədbirə qatılanlar da kitaba və yazıçılıq sənətinə diqqət və qayğı göstərənlər siyahısındadırlar. Mərasimdə ölkəmizin düşüncə sahibləri, yazıçılar, ictimai xadimlərimiz iştirak edir. Ölkəmizdə bədii yaradıcılıqla məşğul olan insanların mükafatlandırılması Əbülfəs Qarayevin təşəbbüsü ilə həyata keçirilib. Müsabiqədə istər ədəbiyyat yaradıcılığı ilə məşğul olan sənətkarlar, istərsə də gənc şair və yazıçılar iştirak edirlər. Ədəbi mükafata bir çox əsərlər layiq görülə bilərdi, çünki müsabiqəyə həddindən artıq əsərlər təqdim olunmuşdu”.

“Qar yağacaq” povestinə görə mükafata layiq görülən yazıçı Pərvin hər kəsə minnətdarlığını bildirdi: “Bu kitabımın bir il öncə təqdimat mərasimində xalq yazıçısı Anar gənc yazıçıların tez arxayınlaşdığını qeyd etmişdi. O, mənə söylənilən xoş sözlərdən dolayı arxayınlaşmamağımı və həmin sözləri özümə avans hesab etməməyimi söyləmişdi. Mən də onun dediyi kimi etdim. Yaradıcılığıma qısa bir fasilə verən zaman isə belə bir mükafata layiq görüldüm. Söz verirəm ki, mənə inanan, etimad göstərən hər kəsin etimadını doğruladacağam. Sabah dünənkindən daha yaxşı yazmağa çalışacağam”.

Nazir qaliblərə diplom və pul mükafatları təqdim etdi.

Mükafatın nəsr əsərləri nominasiyasında Mustafa Çəmənlinin “Ölüm mələyi”, Şirməmməd Nəzərlinin “Çəkilməmiş film” romanları, Pərvinin “Qar yağacaq” (povest və hekayələr), Səriyyə Müslümqızının “Xocalı uşaqları - qan içində qar çiçəyi” əsərləri mükafata layiq görüldülər. Poeziya nominasiyası üzrə Adil Cəmil “Yurd yerim - dərd yerim”, Elçin İsgəndərzadə “Qürbət hücrəsində”, Ədəbi-tənqid və publisistika üzrə Rüstəm Kamal “Sözü işığa danışdım”, Əsəd Cahangir “Kim yatmış kim oyaq?” əsərləri ilə qalib oldular. Bədii tərcümə nominasiyası üzrə Elxan Zal Qaraxanlı, Akif Əhmədgil, “Qızıl Kəlmə” mükafatı çərçivəsində “Şans” ödülünə isə Qismətin “Meqapolis hüznləri”, Elnarə Akimovanın “Yeni təfəkkür və ədəbi tənqid” kitabları layiq görüldülər.

Xəyalə Rəis

Kaspi.-2013.-8 may.-S.13.