“Mənimçün
o həmişə sağdı, bizim aramızdadı”
Ramiz
Novruz o aktyorlardandır ki, saysız tamaşaçı sevgisi
qazanıb. Uşaq ikən ailəsi onun hərbiçi
olmasını istəsə də
Ramiz Novruz sonda qərara gəlib ki, bütün sənətləri
birləşdirəcək yalnız bir yol var, o da aktyorluqdur.
Ramiz
Novruz çox səmimi insandır. Heç kəsə
paxıllıq etməz, əksinə yardım əlini uzadar.
Eyni zamanda çox ailəcanlı birisidir. O, ailədə necə
səmimi, qayğıkeş, başadüşəndirsə,
elə sənətdə, dostları arasında da o
cürdür. Aktyor çox təmkinlidir, problemləri olarsa
ya ailəsi ilə bölüşər, ya da qapı
arxasında qoyar. Boş vaxtlarını ailəsi ilə
keçirməyi sevir.
Beləliklə,
müsahibim Azərbaycanın
xalq artisti Ramiz Novruzdur.
- "Saf niyyətli,
gözü-kölnü tox adamlar hələ ki var. Deməli
dünya hələ dağılmayıb”. Ramiz Novruz da mı
belə düşünür?
- Əslində
ssenaridəki sözlərə mənim də müdaxiləm
olub, amma bu sözdən çox xoşum gəlir. Elədi, məncə hələ
də var. Elə biri də mən özüm (gülür).
- Hikmət Bədirli ilə sizin
öz həyatınızda bənzəyişlər var. Bu təsadüfdür
ya ssenariyə sizin də müdaxiləniz olub?
-
Rövşən İsaq istedadli insandi. Lakin ssenaridən basqa əgər
aktyordan ağılabatan təklif gəlirsə, o qəbul
edir, ən yaxşısını seçir, əlbəttə
ki, mənim də müdaxiləm az olmayıb.
- Siz kinoaktyorlar
gildiyasının yaradanlardansınız.
Bu barədə nə deyə bilərsiniz?
-
Açığı desəm onun yaranmasında o qədər
də aktivlik etməmişəm. Sadəcə o vaxtlar Həmidə
xanım mənə təklif edəndə mən də
müsbət qarşıladım. Ancaq sonradan həm kino
çəkilişləriylə həm də teatrdakı
işlərimlə əlaqədar olaraq
çatdırmadım.
- Özünüzü daha
çox səhnədə, yoxsa çəkiliş
meydanında rahat hiss edirsiniz?
- Mənimçün
fərqi yoxdur, əsas odur ki, mövzu məni
maraqlandırsın, obrazın bu gün üçün deyəcək
sözü olsun.
- Daima gözlərinizin dərinliyində
bir saflıq var. Yeri gəlmişkən, gözləriniz sizi
satmır ki?
-
Deyirlər yaradıcı adamlar uşaqlıq
saflığını qoruyub saxlayır. Aktyor da elədir,
uşaq kimi inanır, inanmalıdır. Əlbət ki söhbət
peşəkar rejissorun verdiyi roldan və mizandan gedirsə.
Yaqin məndə də uşaqlıq saflığı qalıb.
- Sizcə aktyorun sevilməsi ilə
aktyorun özünü sevdirməsi arasında nə kimi fərq
var?
-
Aktyorun özünü sevdirməsi ustalıqdan, yüksək
peşəkarlıqdan irəli gəlir, necə gözəl
oyun nümayiş etdirməsindən. Lakin aktyorun sevilməsi
ilahidən gələn bir şeydir, necə məlahətlidir,
səhnəyə çıxan kimi tamaşaçılar tərəfindən
həməncə sevilir. Bax Telman Adıgözəlov,
Füzuli Hüseynov həmin aktyorlardandır.
- Sizə "Sizi həyatımdan
çox sevirəm " deyən olubmu?
-
Olub, hal-hazırda evdədi, o vaxt başımı aldatdı,
ağartdı (ürəkdən gülür).
-
Orta məktəbi qurtardıqdan sonra bir müddət fəhlə
işləmiziniz. Bu ali məktəbə daxil ola bilməməyinizlə
əlaqədar idi, yoxsa...
-
İki ilə qədər evdən mənim aktyor
olmağıma razı olmayıblar. Birinci ili sənədlərimi
gizlin verdim, çünki o vaxt incəsənət institutunda
imtahanlar tez başlayırdı. Birincidən keçə bilsəm
də yazıdan keçə bilmədim. Amma mənə dedilər
ki, başqa instituta daxil ol, bir il sonra keçərsən incəsənətə.
Mən də elə etdim. Pedaqoji instituta qəbul oldum. Bir il
sonra isə Ədil İskəndərovun kursunu seçdim.
- Elə olub ki Ədil müəllim
sizi hələ tələbə ikən məhz filan rolda
gördüyünü desin?
- Bir
dəfə "Eşq və
İntiqam” pyesində bi səhnə var, mən tufəngi əlimə
alıb deyirəm ki, quşu belə vurmaq lazimdi. Bu vaxt Ədil
müəllim məni saxladi və dedi ki "qadam bax bu rolu belə jestlə
harda oynasan, hansi rejissor səni görsə bəyənib
filminə çəkər”. O mənə deyirdi ki, sən hər
səpkidə oynaya bilən aktyorsan. İstər komediya, istər
faciə, istərsə də dramatik.
- Nədən sizi çox vaxt
tarixi şəxsiyyətlərin roluna dəvət edirlər?
- Yəqin
simamda bir qəhrəmanlıq, bir tarixi şəxsiyyəti
görürlər (gülür).
- Elə olubmu ki, tamaşanın gedişində tərəfmüqabilləriniz
ya sizi pis vəziyyətə salmaq
üçün, ya da zarafat etməkçün mətndən
kənar çıxıblar?
-
(gülür)Çox olub. Amma onu deyim ki, mənim səhnədə
çox iti zəkam var, nə artıq-əskik söz desələr
o dəqiqə cavabın verəcəm. Söz altda qalan deyiləm,
ona görə də daha mənimlə belə bir zarafat etmirlər.
- Ən çox sediyiniz və sevmədiyiniz
rolunuz?
-
Sevdiyim rollardan ən çox "Yaşlı xanımın gəlişin”də İll, "Xəcalət”də
Murad, "Hara gedir bu dünya”da
Laçın, "Xanuma”da Knyaz Pantiaşvili. Sevmədiklərim
çox olub, amma saymaq istəmirəm(gülür).
- Teatr tənqidçilərindən
biri "Xanuma "dan bəhs edərkən Pantiaşvilini
sizin "dəcəl, şuluq, kefcil, içi zarafatla dolu
yorğa at” kimi
oynadığınızı
yazır. Buna sizin münasibətiniz?
-
(gülür) Eynilə elədir. Qocalığda
yorğalıq etmək istəmişdi. Bu rolu sanki
tıqqıldadarkən içi boş nağaraya bənzədirəm.
Mən bu tamaşanın Leninqrad versiyasına baxmışam.
Lakin mən oynadığım Knyazı azərisayağı
Pantiaşvili kimi oynamaq istəmişəm.
- Hansı sovet aktyoru ilə bir səhnədə
oynamaq istərdiniz?
-
Innakenti Smaktunovski, Ulyanov, Yankoviçlə.
- Gənc aktyorlardan kimləri fərqləndirərdiniz,
bu gün istedadlı gənclərimiz varmı?
-
Var, sadəcə onları düzgün yönləndirmək
lazımdır, bax elə Anar Heybətovu, Rövşən Kərimduxtu,
Hikmət Rəhimovu deyə bilərəm.
- Qələminizi dramaturgiya sahəsində
sınayanda tənqid olunmaqdan qorxmadınız ki? Ya bəlkə
bizdə Belinski kimi tənqidçilərin
olmadığından əmin idiniz?
- Hə,
iki pyesin müəllifiyəm. Biri 20 yanvar hadisələrindən
danışır, digəri isə
"Hələ sevirəm
deməmişdilər” adlanır. Bu isə Qarabağda səni
sevirəm deməyə vaxt tapmadan ölən gənclərdən
danışılır. Mən hansısa pyesi yazanda fikirləşmirəm
ki, kimsə məni tənqid edəcək. Yazmaq xətrinə
yazmıram, sadəcə
hansısa mövzu məni narahat edirsə, o barədə
yazaram.
- Həyatda ən çox nəyə
məyus olmusunuz?
- Ən
çox sənətimlə bağlı bir hadisəyə məyus
olmuşam. Barat xanım Şəkinskaya ilə görüsə
bilməməyimə. Ha dedim gedərəm, gedərəm, bir
də ayıldım ki, artıq Barat xanım
dünyasını dəyişib.
- Vaxtilə Milli Teatrda eyni səhnəni
paylaşdığınız hansı görkəmli
aktyorumuzun itgisi sizə daha
çox təsir edib?
-Səməndər
Rzayevin, Hamlet Xanızadənin, Məmmədrza Şeyxzamanovun ölümünə çox kədərlənmişəm.
Hətta atam öləndə elə ağlamamışdım
ki, Şeyxzamanovun
ölümünə o cür ağladım. Ancaq bircə
Telman Adıgözəlov haqqında heç vaxt
dünyasını dəyişmiş kimi
danışmıram. Mənimçün o həmişə sağdı,
bizim aramızdadı.
Nigar Pirimova
Kaspi.- 2013.-25-27 may.- S. 12.