“Cırtdan”II Bakı Beynəlxalq Kukla Teatrları Festivalı başlayır

“Azərbaycan Teatrı 2009-2019-cu illərdə” Dövlət Proqramına uyğun olaraq 2013-cü il noyabr ayının 9-dan 16-dək Bakıda Azərbaycan Respublikası Mədəniyyət və Turizm Nazirliyi və UNİMA Beynəlxalq Kukla Teatrları Assosiasiyasının birgə təşkilatçılığı ilə II Bakı Beynəlxalq Kukla Teatrları Festivalı keçiriləcək. Bu ildən etibarən festivalımız xalq nağıllarının qəhrəmanı Cırtdanın adını daşıyacaq. Festivalın açılış mərasimi noyabr ayının 9-da saat 10:30-da Azərbaycan Dövlət Kukla Teatrında başlayacaq. Festival çərçivəsində 11 ölkənin kukla teatrları - Azərbaycandan A.Şaiq adına Azərbaycan Dövlət Kukla Teatrı, Qax Dövlət Kukla Teatrı, Böyük Britaniyadan Dorset Kukla Teatrı Kompaniyası, Yaponiyadan «Yuki» Teatrı, İtaliyadan Teatro Verde Burattini, «Kapra Ballerina», Bolqarıstandan Tarqovişte Kukla Teatrı, Xorvatiyadan «Zorin dom» Karlovaç Şəhər Teatrı, İsveçrədən «Le Ginyöl A Roulettes» Kukla Teatrı, Macarıstandan İvet Bojik Kompaniyası, Tatarıstandan «Ekiyat» Tatar Dövlət Teatrı çıxış edəcək.Festival zamanı həmçinin, UNİMA-nın icra komitəsinin toplantısı keçiriləcək. Toplantıda nüfuzlu beynəlxalq teatr təşkilatlarının rəhbərləri – UNİMA-nın prezidenti Dadi Dorab Pudumyee (Hindistan), UNİMA-nın baş katibi Jak Trüdeu (Paris), Teatr Tənqidçiləri Beynəlxalq Assosiasiyasının Baş Katibi Mişel VAİS (Kanada), BTİ-nin Yaxın Şərq Ölkələri üzrə koordinatoru İbrahim ASSİRİ (Səudiyyə Ərəbistanı), UNİMA-nın icra komitəsinin üzvləri Tamiko Naito (Yaponiya), Manuela Moran Martinez (ABŞ), Migel Angel Lorefais (Argentina), Karen Anne Smit (Avstraliya), Zang Fan (Çin), Nina Monova (Rusiya), Rafaele Fleuri (Fransa), Anqel Kasado Qarretas (İspaniya), Knut Alfsen (Norveç), İda Xledikova (Sloveniya), Pyer-Alen Roll (İsveçrə), Roni Alfons Antoin Aelbrext (Belçika), Qreta Mariya Brugeman (Belçika) və başqalarının iştirakı gözlənilir.Noyabr ayının 9-da saat 09.30-da Azərbaycan Dövlət Kukla Teatrında media nümayəndələri üçün mətbuat konfransı təşkil olunacaq.

Kaspi.-2013.-9-11 noyabr.-S.9.