Hələ bizə çox gərəksən...

Qənbər Şəmşiroğlu – 80

Çoxdandır məni narahat edən bu duyğuları, düşüncələri yazıya almaq istəyirdim. Amma nədənsə cəsarətim çatmırdı. Hər dəfə qələmə toxunanda bütün vücudum titrəyirdi. Çünki haqqında yazacağım adama ulu Tanrı öz səxavətiylə, mənim nəzərimdə, saymaqla bitməsi mümkün olmayan çox qabiliyyətlər, istedadlar, məziyyətlər bəxş eləyib. Bunları vəsf eləmək isə təpər, bacarıq, hünər istəyir. Nəhayət ki, bu cürəti, bu hünəri Kəlbəcər adına, Kəlbəcər qüdrətinə söykənib tapdım özümdə. O Kəlbəcər ki, adı dilimizi, odu könlümüzü yandırır. O Kəlbəcər ki, altı da, üstü də, florası da, faunası da möcüzələrlə doludur. Dünyanın ən məşhur səyyahları onu dünyanın səkkizinci möcüzəsi adlandırmışlar.Bu möcüzələr içərisində səyyahların qeydə almadığı, ancaq ədəbiyyatçıların, folklorşünasların, nəhəng söz adamlarının kəşf etdiyi ulu bir saz-söz ədəbi məktəbi də var idi. Bu məktəbin təməli Ağdabanlı Qurbanla qoyulmuş, sarayı XX əsrdə aşıq sənətinin dədəlik zirvəsinə ucalmış Dədə Şəmşir tərəfindən ucaldılmışdı. Artıq iki əsrə yaxındır, bu məktəb özünün çox istedadlı, tərlan təbli varisləri ilə saz-söz vurğunlarını heyrətə gətirir. Kəlbəcərdə ucalan, Kəlbəcəri ucaldan, kəlbəcərlilərin başını uca edən uca şəxsiyyətlər sırasında bu gün haqqında söz açdığım, ömrünün 80-ci ilini qürurla yaşayan, bütün həyatı fəaliyyəti ilə həm müasirlərinə, həm gələcək nəsillərə örnək olan Qənbər Şəmşiroğlunun müstəsna yeri var.Qənbər Şəmşiroğlunu xalqına sevdirən nədir? Bu düşündürücü və aydın sualın cavabını onu tanıyanların əksəriyyəti yaxşı bilir. Mənim isə bir daha bu cavaba aydınlıq gətirmək kimi bir borcum var. Hələ əmək fəaliyyətinə başladığı ilk müəllimlik illərindən şagirdlərinin, həm də şagirdlərin valideynlərinin əzizi, sevimlisi olub. Hələ elmin, texnikanın geri qalan vaxtlarında Azərbaycanın hüdudlarından kənara çıxan Kəlbəcər təhsilinin şöhrətlənməsində Qara Bəhmən, Aslan müəllim, Cəfər Əhmədov kimi neçə-neçə təhsil fədaisinin sırasında Qənbər müəllimin də şərəfli yeri olub. Həmin vaxtlarda rayonun ən iri məktəblərindən olan 2 saylı orta məktəbə rəhbərlik edib. Bu gün Qənbər müəllim həmin məktəbin yetirmələri olan çoxlu alimlərlə, həkimlərlə, mühəndislərlə, müəllimlərlə fəxr edir. Onlar da öz müəllimləri ilə qürur duyurlar. Bundan sonra Qənbər müəllimin daha məsuliyyətli əmək fəaliyyəti dövrü başlayır. Respublikanın ucqar dağ rayonu olan Kəlbəcərdə rayon partiya komitəsinin ikinci katibi, rayon icraiyyə komitəsinin sədri kimi çətin və məsul vəzifələrdə çalışır. Xalqa canıyananlıq, yurda-yuvaya bağlılıq, işində prinsipiallıq bu vəzifələrdə çalışdığı vaxtlarda özünü parlaq şəkildə göstərir. Kəlbəcərin əksər kəndlərinə maşın yolu, elektrik, telefon xətləri çəkilir, bu kəndlərdə məktəb, klub, kitabxana, mağaza, xəstəxana kimi sosial tikinti obyektləri tikilir. Kəlbəcər şəhərinin özündə “Yuxarı düz” adlanan sahədə yeni bir gözoxşayan şəhər salınmışdı. Bircə faktı qeyd etmək yerinə düşər ki, Qənbər müəllim və onun yaxın yoldaşlarının fəaliyyəti ilə Murovun amansız, sərt aşırımları yarıldı və oradan bütün kəlbəcərlilərin nicat yolu açıldı. Yeri gəlmişkən, əgər Qənbər müəllim Kəlbəcərin dar macalında, mühasirə günlərində vəzifədən uzaqlaşdırılmasaydı, bu gün Kəlbəcər boyda itkimiz, həsrətimiz olmazdı. O zaman Gədəbəy rayonunda rəhbər işləyən Qənbər Qurbanovun cəhdləri, uzaqgörənliyi, tədbirliliyi, təşkilatçılığı sayəsində bədnam qonşularımızın Gədəbəyi ələ keçirmək niyyətləri gözlərində qaldı. İctimai fəaliyyəti ilə bağlı söhbət düşəndə Qənbər müəllim həmişə qürurlanır ki, mən çox xoşbəxt adamam, çünki ulu babam Miskin Abdal şah İsmayıl Xətai ilə çox yaxın ünsiyyətdə olub, mən də ulu öndər Heydər Əliyevin rəhbərliyi altında, ayrı-ayrı işlərdə çalışmışam. Şair dostum, görkəmli söz ustadı Məmməd Aslanın bir gözəl sözü məni yaman tutub: o deyir ki, dövlət işlərində işləmək Qənbər Şəmşiroğlunun söz istedadını uzun illər pərdələyib. Doğrudan da elədir, vaxtilə yüksək dövlət işlərində gecəsini-gündüzünə qatan Qənbər Şəmşiroğlunun dəyərli şeirlərindən, nəsr əsərlərindən, publisistikasından uzun illər özündən başqa bəlkə də heç kim xəbərdar deyildi. Bizdən gizli saxlanılan bu əsərlərlə tanışlığımız sonralar bizi bu heyrət dünyasına çox zərif və qırılmaz tellərlə bağlayıb. Hər gün gözləyirik ki, Qənbər Şəmşiroğlundan yeni dadlı-duzlu, şəhdi-şəkər bir söz çələngi alacağıq. 80 yaşında, bu nurlu çağında Qənbər Şəmşiroğlu ilə bu günlərdə yenə mötəbər məclislərdə görüşürük. Qənbər müəllim öz ləngəri, müdrikliyi ilə ölkəmizdə gedən dinamik inkişafı, dövlətimizin artan beynəlxalq nüfuzunu elə incəliklərlə izah edir ki, insan heyran kəsilir.Kəlbəcərli gənclərin ali məktəblərə qəbul olunmasının təbrik məclislərinin ilk xeyir-dua verəni məhz Qənbər müəllim olur. Kəlbəcərin işğalından sonra pərən-pərən düşən elimizə rəhbərlik eləyib, onları təmkinə, səbrə, öz qeyrətlərini, qürurlarını qorumağa çağıran da Qəmbər müəllimdir. Bu gün hər bir kəlbəcərlinin xeyrinin-şərinin bəzəyi, ağsaqqalı da Qənbər müəllim sayılır. Deyiləsi sözləri yığın-yığın olan ürəyimi tam boşalda bilməsəm də, bir qədər rahatlıq tapıb, nüfuzlu ictimai xadim, şair, nasir, publisist, Qızıl Qələm mükafatı laureatı, Azərbaycan Ağsaqqallar Şurasının və Yazıçılar Birliyinin üzvü, Aşıq Şəmşir Mədəniyyət ocağı İctimai Birliyinin sədri, ən əsası, sevimli insan, nurani ağsaqqal Qənbər Şəmşiroğluna hələ bundan sonra bir neçə onilliklərdə ad günləri keçirməsini, daima belə təravətli, gümrah qalmasını arzulayır və deyirəm ki, yaşa, var ol, Qənbər müəllim! Sən bu pərən-pərən düşən elimizə hələ çox gərəksən. Bir şeirlə bu ürəyimdən keçənlərə nöqtə qoyuram:

Kərəmlə yaratmış ulu yaradan,

Elinə, gününə yaraşıq olmuş.

Fəhmlər, kamalla başdan-binadan,

Əkiz xəlq olunmuş, qarışıq olmuş.

Müqəddəs ocağın pir yetirməsi,

Əbədi məşəldir eşqi, həvəsi.

Odlu sinəsində söz xəzinəsi,

Bir şair xəlq olmuş, bir aşıq olmuş.

Qurbandı, Şəmşirdi – mötəbərdi o,

Ay Zahid, əhli-hal bir Qənbərdi o.

Hə parlaq fikirdi, həm hünərdi o,

Zülmət yolumuza nur, işıq olmuş.

Zahid MUXTAR

“Kəlbəcər harayı” qəzetinin baş redaktoru

Kaspi.-2013.-16-18 noyabr.-S.24.