Saflıq nişanəsi şair Ağasəfa

Rövşən Yerfi

İddiasızlar...

Ağasəfa müəllimi 1986-cı ilin payızından tanıyıram. O zaman Yeni Əhmədlidəki Sabir adına Kitabxana-klubda mərhum şairimiz Ağacavad Əlizadənin rəhbərliyi ilə “İlham çeşməsi” adlı ədəbiyyat dərnəyi yaradılmışdı. Mən də həmin illərin ədəbiyyatsevər gənclərindən biri kimi təzə yazmağa başlayan cavanlara qoşulub hər həftə dərnəyin tədbirlərində iştirak edirdim. Ağacavad Əlizadə yaşlı və xəstə olduğundan tədbirlərin hamısında müntəzəm iştirak edə bilmirdi. Belə olanda onu Ağasəfa adlı cavan şair əvəz edirdi. Eynəkli, orta yaşlı bu şairin xoş xasiyyətinə, sadə, pafossuz nitqinə, müzakirələr zamanı dərin mühakiməsinə heyran qalırdıq. O, hər birimizi təmkinlə dinləyər, xoşluqla iradlarını bildirər, dəyərli məsləhətlər verərdi. Onun sadəliyi şeirlərində, yaşadığı həyat yoluna nəzər salanda da duyulur.

Xızı rayonunun Qarabulaq kəndində doğulan Ağasəfa Bakıda orta məktəbi bitirdikdən sonra Moskvada Maksim Qorki adına Ədəbiyyat institutunda qiyabi təhsil almışdır. İyirmi üç yaşınadək Bakı parovoz deposunda fəhlə, geoloji kəşfiyyat idarəsində qazma köməkçisi işləmişdir. Sonra mətbuat sahəsinə keçmiş “Kirpi” satirik jurnalında və “Azərbaycan qadını” jurnalında əməkdaş, “Yazıçı” nəşriyyatında böyük redaktor, “Ədəbiyyat” qəzetində məsul katib köməkçisi vəzifələrində işləmişdir. Yaşı əllini ötəndən sonra isə səs-küylü şəhəri atıb, Bakıdan saat yarımlıq məsafədə aralı olan, gözəl təbiətə malik doğulduğu Qarabulaq kəndinə qayıtmış, doğma kəndində müəllim işləməyə başlamışdır.

Hər gecə yuxuma girdi dağ-dərə,

Hər gecə ulduzlar çağırdı məni...

Bu çılğın şəhərdə azı yüz kərə,

Tale yapdı məni, yoğurdu məni...

Ağasəfa ədəbi yaradıcılığa on beş yaşında, 1957-ci ildə “Sosialist Sumqayıtı” qəzetində dərc edilmiş “Sazım” adlı ilk şeiri ilə başlamışdır. 1966-cı ildə “Yolçu yolda gərək” adlı ilk kitabı nəşr olunub. İndi bir kitabı çıxan kimi Yazıçılar Birliyinin vəsiqəsini almaq üçün əldən gedənlərdən fərqli olaraq sadəliyinə, təvözökarlığına görə, o, ilk kitabı çıxandan səkkiz il keçəndən sonra Birliyə üzv olmuşdur. 1989-cu ilədək on kitabı – doqquzu müəllifi olduğu, biri isə tərcümə kitabı çap edilib. O vaxtdan bəri, iyirmi iki ildir ki, mətbuatda Ağasəfa müəllimin yeni kitabının çıxması xəbərini eşitmirik.

Bəzən onu poeziyasında təbiəti, torpağı vəsf etdiyinə görə təbiət şairi, torpaq şairi də adlandırırlar. Şeirlərində təbiətin gözəlliklərini, adi təbiət hadisələrini elə poetik təsvirlə ifadə edir ki, misraları oxuduqca sanki, gözəl bir rəsmə baxdığını zənn edirsən:

Şimşəklərin bənzəri var qılınca,

Ağ buludu oxşatdım ağ balınca.

Qara bulud ağ buludun dalınca

Bu zirvədən o zirvəyə at çapır...

Ona yaxın poemanın müəllifi olan Ağasəfa təkcə böyüklər üçün deyil, uşaqlar üçün də çoxlu maraqlı şeirlər yazmışdır. Yeri gələndə isə dövr, zəmanə ilə bağlı iradlarını, narahatlıqlarını oxucularına satirik şeirlərlə çatdırmışdır:

Gözün kimi gəzir burda, ay yoluq,

Baxtına kim düşər bu baxabaxda.

Pulun başındadır dostluq,qohumluq,

Burda dost axtarma, cibini axtar.

Şarin yaradıcılığında daimi mövzulardan biri də Mikayıl Müşfiq poeziyasının tərənnümüdür. O, həmişə özünü böyük Müşfiq qarşısında borclu sayır:

Dağlara söykənmis bir qoca gördum

Dağları qoynunda saxlaya bilər.

Dodağı titrədi Müşfiq deyəndə

Duydum uşaq kimi ağlaya bilər.

Susdu dağlar kimi "Sındırılan saz"

Yenə də Müşfiqə borcluyam bu yaz...

Cavan yaşlarından Ağasəfa şairliyi ilə yanaşı bədii tərcümə ilə də məşğuldur. L.Tolstoyun mənzum nağıllarını, Q.Qulam, İ.Selvinski, B.Oleynik və başqa onlarla görkəmli sənətkarların əsərlərindən tərcümələr etmişdir.

Adı kimi böyük saflığa, şəxsiyyətə malik, həm də könül oxşayan yaradıcılığı olan Ağasəfa müəllim kimi şairlərin cağdaş ədəbiyyatımızda sayı çox azdır. Bu günlərdə yaşı yetmiş birdən yetmiş ikiyə adlamış poeziyamızın saflıq nişanəsi Ağasəfaya çoxsaylı oxucuları adından cansağlığı və yeni yaradıcılıq uğurları arzulayıram. Məskəni olduğu dağlar qədər vüqarlı, uzunömürlü olsun...

Hər dəfə onun kimi insanların varlığını görəndə mən sevinməyə bilmirəm. Sevinirəm ki, yaşamağa dəyər, demək dünyanın sonunun çatmağına hələ var...

Kaspi.-2013.-14-16 sentyabr.-S.19.